ភ្នំពេញ ប៉ុស្តិ៍
ភ្នំពេញៈ រោងម៉ាងកែច្នៃអង្ករ តម្លៃជាង១០លានដុល្លាររបស់ធនាគារកាណាឌីយ៉ានឹងចាប់ផ្តើម ដំណើរការដំណាក់កាលទីមួយនៅក្នុងខែតុលា ខណៈដែលដំណាក់កាលទីពីរនឹងចាប់ផ្តើមនៅដើមឆ្នាំ២០១៣។ នេះបើតាម មន្រ្តីធនាគារកាណាឌីយ៉ា។
រោងម៉ាស៊ីកិនស្រូវនេះមានទីតាំងនៅស្រុកដូនកែវ ខេត្តតាកែវ។
លោក ប៊ុន ឃីម អ្នកទទួលខុសត្រូវរោងម៉ាស៊ីនកិនស្រូវបានឲ្យដឹងថា ក្នុងដំណាក់កាលដំបូងនេះគេអាចកែច្នៃអង្ករបាន៦០តោនក្នុង មួយថ្ងៃ ខណៈម៉ាស៊ីនមានសមត្ថភាពផលិតអង្ករ៦០០តោនក្នុងមួយថ្ងៃនឹង ដំណើរការនៅខែមីនា ឆ្នាំ២០១៣។
លោកបន្តថា មន្ត្រីក្រុមហ៊ុនបានទំនាក់ទំនងជាមួយប្រទេសមួយចំនួនដូចជា ហ្វីលីពីន ចិន និង ទីផ្សារអឺរ៉ុប ដើម្បីនាំអង្ករចេញ។ លោកថ្លែងថា៖ «ថ្ងៃនេះយើងទាក់ទងគេសិន ដល់ថ្ងៃក្រោយយើងមានអង្ករ យើងទទួលការបញ្ជាទិញ ហើយយើងលក់ឲ្យគេ»។
លោកបានឲ្យដឹងទៀតថាក្រុមហ៊ុន បានចាប់ផ្តើមទិញស្រូវស្តុកទុកជាបណ្តើរចាប់តាំងពីថ្ងៃទី២៣ ខែឧសភាដែលដល់ពេលនេះបានទិញស្រូវប្រាំងប្រភេទអ៊ីអ៊ែរបានជិត ២០០០តោន ក្នុងតម្លៃចន្លោះពីជាង ១ ១០០រៀលដល់ជាង១២០០រៀលក្នុងមួយគីឡូក្រាម។
លោក ពុង ឃាវសែ ប្រធានក្រុមប្រឹក្សាភិបាលធនាគារ ធ្លាប់បាននិយាយកាលពីចុងឆ្នាំ ២០១១ថា ធនាគារនេះផ្តល់ប្រាក់កម្ចីដល់វិស័យកសិកម្មមានចំនួនត្រឹមតែ៧ភាគរយនៃប្រាក់កម្ចីរបស់ខ្លួនសរុប៧១៥លានដុល្លារ។
នៅពេលនោះលោកបានប៉ាន់ប្រមាណថា ប្រាក់កម្ចីដល់វិស័យកសិកម្មនឹងឡើងដល់១២ភាគរយ គឺជាង១០០លានដុល្លារនៅក្នុងឆ្នាំនេះ។
លោក ឌួង ហេង ប្រធានសមាគមរោងម៉ាស៊ីនកិនស្រូវនៅខេត្តតាកែវ បាននិយាយថា ការដំណើរការរោងម៉ាស៊ីននឹងមិនក្លាយជាការប្រកួតប្រជែងរវាងរោង ម៉ាស៊ីន ដែលមានស្រាប់នៅក្នុងតំបន់នោះទេ តែផ្ទុយទៅវិញ នឹងជួយទប់ស្កាត់បានការហូរចេញស្រូវទៅប្រទេសវៀតណាម។ លោកបន្តថា៖ «ការធ្វើដំណើរទៅបែបនេះ គឺល្អសម្រាប់ការកាត់បន្ថយការនាំចេញស្រូវជាបណ្តើរៗទៅកាន់ ប្រទេសជិតខាង។ យើងមិនអាចកាត់បន្ថយទាំងស្រុងតែម្តងនោះទេ តែយើងអាចកាត់បន្ថយតាមមធ្យោបាយវិនិយោគនេះ»។
កាលពីចុងឆ្នាំ២០១១ លោក រស់ សីលវ៉ា អគ្គលេខាធិការរងក្រសួងសេដ្ឋកិច្ច និងហិរញ្ញវត្ថុ បាននិយាយថា កម្ពុជាបាននាំចេញអង្ករ ៥១ ០០០តោននៅឆ្នាំ ២០១០ ហើយ ៩០ភាគរយនាំទៅអឺរ៉ុប។ នៅឆ្នាំ២០១១ នាំចេញ១៥០ ០០០តោន ហើយ៧៨ភាគរយនាំទៅទីផ្សារអឺរ៉ុប។
កសិកម្មកម្ពុជាកំពុងក្លាយជាទិសដៅជំរុញសេដ្ឋកិច្ចមួយយ៉ាងសំខាន់។ រដ្ឋាភិបាលនឹងនាំចេញអង្ករឲ្យបាន១លានតោននៅត្រឹមឆ្នាំ២០១៥៕
