ភ្នំពេញ ប៉ុស្តិ៍
កណ្តាលៈ កម្មករប្រមាណ១ពាន់នាក់បម្រើការនៅរោងចក្រកាត់ដេរ ហ្គាវ័ន្ត(Gawon) ស្ថិតនៅក្រុងតាខ្មៅ ខេត្តកណ្តាល កាលពីម្សិលមិញនេះបានធ្វើកូដកម្មមិនព្រមចូលធ្វើការ ព្រោះតែថៅកែព្រមានកាត់ប្រាក់បំណាច់ឆ្នាំ ១ថ្ងៃ បើអ្នកណាឈប់សម្រាករហូតដល់ទៅ២ឬ៣ថ្ងៃ ដើម្បីទៅបោះឆ្នោតខាងមុខ។
កម្មការិនី ហុក គន្ធា បានប្រាប់ភ្នំពេញ ប៉ុស្តិ៍ពីថ្ងៃពុធថា កាលពីថ្ងៃទី២៩ ខែឧសភា ថៅកែរោងចក្របានចេញប្រកាសមួយ ហាមឃាត់ ព្រមានមិនឲ្យកម្មករឈប់សម្រាកពីការងារ ពី២ទៅ៣ថ្ងៃទេ ក្នុងពេលបោះឆ្នោតបើមិនដូច្នេះទេកម្មករនឹងត្រូវកាត់ប្រាក់ បំណាច់ឆ្នាំ១ថ្ងៃ។
កញ្ញាបញ្ជាក់ថា៖ «យើងនំាគ្នាធ្វើកូដកម្មនេះ គឺដើម្បីប្រឆាំងទៅនឹងសេចក្តីប្រកាសនេះ ដែលមិនអនុវត្តតាមសេចក្តីជូនដំណឹងរបស់ក្រសួងការងារ ដែលអនុញ្ញាតឲ្យកម្មករឈប់ពី១ថ្ងៃទៅ៣ថ្ងៃ ទៅតាមស្រុកជិតឬឆ្ងាយ ប៉ុន្តែ ពួកយើងបែរជាត្រូវប្រឈមនឹងការកាត់ប្រាក់បំណាច់ឆ្នាំទៅវិញ»។ កញ្ញាបន្ថែមថា កម្មករទាំងអស់គ្រោងនឹងធ្វើកូដកម្មរហូតដល់ថ្ងៃបោះឆ្នោត ប្រសិនបើថៅកែមិនកែតម្រូវទៅតាមសេចក្តីជូនដំណឹងរបស់ក្រសួងទេនោះ។
លោក ជា មុនី ប្រធានសហជីពសេរីកម្មករ ថ្លែងថា សេចក្តីប្រកាសរបស់ថៅកែរោងចក្រនោះមិនត្រឹមត្រូវទេ ព្រោះថា កម្មករពុំមានបំណងចង់ឈប់ដោយខ្លួនឯងទេ។ លោកថា៖«ប៉ុន្តែ ក្រសួងការងារទេ ដែលប្រកាសជូនដំណឹងឲ្យពួកគេឈប់សម្រាក ដូច្នេះថៅកែគ្មានសិទិ្ធកាត់ប្រាក់បំណាច់ឆ្នាំពួកគេទេ»។
លោកថា៖ « មានតែ គ.ជ.ប ក្រសួងការងារ និងគណបក្សនយោបាយទេ ដែលត្រូវចាត់វិធានការសម្រួលឲ្យកម្មករទាំងអស់បានទៅបោះឆ្នោត ព្រោះនេះជាសិទ្ធិពួកគេ»។
លោក ចិន សុផុន ជំនួយការគណនេយ្យរោងចក្រ ហ្គាវ័ន្ត បានឲ្យដឹងថា ក្រុមហ៊ុនបានអនុវត្តទៅតាមការបញ្ជារបស់ក្រសួងការងារប៉ុណ្ណោះ។ លោកថា ក្រោយពីមានបញ្ហានេះខាងក្រុមហ៊ុនបានចេញសេចក្តីណែនាំមួយទៀត ដើម្បីធ្វើការសម្របសម្រួលជាមួយនឹងកម្មករ ប៉ុន្តែកម្មករមិនចូលរួមស្តាប់ប្រកាសពីតំណាងក្រុមហ៊ុនទេពី រសៀលថ្ងៃម្សិលមិញ។ លោកបន្តថា៖«ពីល្ងាចមិញ(ថ្ងៃពុធ) ប្រធានក្រុមហ៊ុន បានសម្របសម្រួលត្រូវគ្នាហើយ ដូច្នេះនៅថ្ងៃស្អែក ពួកគេនឹងចូលធ្វើការវិញ។
លោក ទេព នីថា អគ្គលេខាធិការគ.ជ.បថ្លែងពាក់ព័ន្ធនឹងថ្ងៃឈប់សម្រាកបោះឆ្នោតថាវាអាស្រ័យទៅតាមទីកន្លែងបោះឆ្នោត។
លោកបញ្ជាក់ថា៖«ក្រសួងការងារចេញសេចក្តីជូនដំណឹងថា បើអ្នកមានលំនៅក្នុងខេត្តកណ្តាល ហើយការិយាល័យដែលគាត់ត្រូវបោះឆ្នោតនៅខេត្តកណ្តាលដែរនោះ ដូច្នេះគាត់អាចឈប់សម្រាកបាន១ថ្ងៃ ប៉ុន្តែ បើគាត់រស់នៅខេត្តកណ្តាល គាត់កាន់ប័ណ្ណបោះឆ្នោតនៅខេត្តផ្សេងកៀកនឹងខេត្តកណ្តាលនោះ គាត់ត្រូវឈប់សម្រាក២ថ្ងៃ ប៉ុន្តែ បើធ្វើការនៅភ្នំពេញ ហើយត្រូវទៅបោះឆ្នោតនៅខេត្តឆ្ងាយៗ ដូច្នេះគាត់អាចឈប់សម្រាក៣ថ្ងៃ៕
