ភ្នំពេញ ប៉ុស្តិ៍
បាត់ដំបង:យ៉ាងហោចណាស់ក្មេងប្រុសបីនាក់បានរងរបួសធ្ងន់ធ្ងរ ដោយសារពួកគេបានរើសគ្រាប់មិនផ្ទុះមួយគ្រាប់ប្រភេទគ្រាប់ឡង់ យកមកគប់លេង បណ្តាលអំបែងគ្រាប់ផ្ទុះត្រូវពេញខ្លួនប្រាណ កាលពីថ្ងៃទី ២៩ នៅភូមិអូរស្ងួត ឃុំតាសាញ ស្រុកសំឡូត ខេត្តបាត់ដំបង។
លោក កោ ស៊ុនកាំង នាយផ្នែកប៉ូលិសព្រហ្មទណ្ឌស្រុកសំឡូត បានឲ្យដឹងថា ក្មេងប្រុសទាំងបីនាក់នោះជាបងប្អូនបង្កើតនឹងគ្នាដែលមាន ឈ្មោះ សាន សីហា អាយុ ៧ឆ្នាំ រងរបួសធ្ងន់, សាន មេសា អាយុ ៥ឆ្នាំ និង សាន កក្កដា អាយុ ៤ឆ្នាំ ។
លោកបានបញ្ជាក់ថា៖ «ពួកគេមិនស្គាល់ថាជាគ្រាប់មិនទាន់ផ្ទុះ ហើយបានរើសយកគប់លេង នៅក្បែរអូរទឹកមួយ ស្ថិតនៅក្រោយផ្ទះរបស់ពួកគេប្រហែល៣០០ម៉ែត្រ បណ្តាលឲ្យផ្ទុះរងរបួសទាំងអស់គ្នា»។
លោកបានបន្ថែមថា ក្រោយកើតហេតុ ពួកគេត្រូវបានគ្រួសារបញ្ជូនទៅព្យាបាលនៅមន្ទីរពេទ្យខេត្តបាត់ដំបង ខណៈដែលក្រុមដោះមីនអង្គការស៊ីម៉ាក់បានចុះពិនិត្យមើលកន្លែងកើតហេតុ ដោយបានណែនាំអប់រំបន្ថែម អំពីគ្រោះថ្នាក់ដោយគ្រាប់មីន ដល់ពលរដ្ឋនៅក្នុងស្រុកភូមិ។
លោកបានប្រាប់ឲ្យដឹងថា យ៉ាងហោចមានករណីផ្ទុះគ្រាប់ចំនួនបីលើក រួចមកហើយនៅក្នុងរយះពេលបីខែកន្លងទៅនេះ ដោយបណ្តាលឲ្យមនុស្សជិត១០រងបួស និងម្នាក់បានស្លាប់។
សូមរង់ចាំអានព័ត៌មានពិស្តារក្នុងកាសែតភ្នំពេញ ប៉ុស្តិ៍
