ភ្នំពេញ ប៉ុស្តិ៍
ប៉ោយប៉ែតៈ ស្ត្រីខ្មែរម្នាក់ត្រូវបានប៉ូលិសថៃចាប់ខ្លួនបង្គាប់ឲ្យបង់ប្រាក់ជាង១ពាន់ដុល្លារ បន្ទាប់ពីបើកឡានចូលទៅបង្កគ្រោះថ្នាក់ចរាចរណ៍ក្នុងទឹកដីថៃ ដោយខុសច្បាប់ កាលពីព្រឹកថ្ងៃពុធកន្លងទៅ។
លោក ជិន ពិសិដ្ឋ អនុប្រធានការិយាល័យទំនាក់ទំនងព្រំដែនកម្ពុជាថៃទទួលបន្ទុករដ្ឋបាល បានឲ្យដឹងកាលពីម្សិញមិញថា ស្ត្រីឈ្មោះ នង ស្រីម៉ាច អាយុ ៣៦ ឆ្នាំ ស្នាក់នៅក្រុងប៉ោយប៉ែត ខេត្តបន្ទាយមានជ័យ បានបើកឡានម៉ាក ទីកូ ចូលទៅក្នុងទឹកដីប្រទេសថៃ តាមច្រកប៉ោយប៉ែត កាលពីព្រឹកថ្ងៃពុធ ដោយពុំមានការអនុញ្ញាតឬលិខិតស្នាមអ្វីទាំងអស់ពីភាគីថៃ។
លោក ជិន ពិសិដ្ឋ បានបន្ថែមថា ពេលបើកចូលទៅដីថៃបានប្រហែលជាជិត១០គីឡូម៉ែត្រ ក៏មានគ្រោះចរាចរណ៍កើតឡើង នៅស្រុកអារញ្ញ ខេត្តស្រះកែវ ។
លោកបានបញ្ជាក់ថា ៖ «នាងមិនសូវជាចេះបើកឡានស្ទាត់នោះទេ ម៉្យាងនៅស្រុកគេប្រកាន់ឆ្វេងហើយគេបើកលឿនៗ។ ខណៈមានឡានម៉ាកវីហ្គោមួយបើកពីក្រោយនាងយ៉ាងលឿន មកវ៉ាឡាននាងដែលបានរេចង្កូតចុះឡើង ម្ចាស់ឡានវីហ្គោក៏បើកគេចបណ្តាលឲ្យក្រឡាប់ ប៉ុន្តែ អ្នកបើកបររបួសស្រាល»។
តាមលោក ជិន ពិសិដ្ឋ បានអះអាងថា ប៉ូលិសថៃបានចាប់ឃាត់នាងនៅប៉ុស្តិ៍របស់គេដើម្បីឲ្យដោះស្រាយ សំណងជូនភាគីម្ខាងទៀត។
លោក សៅ វាសនា ប៉ូលិសការិយាល័យទំនាក់ទំនងព្រំដែនកម្ពុជា-ថៃបានឲ្យដឹងថា នង ស្រីម៉ាច ត្រូវអាជ្ញាធរថៃតម្រូវឲ្យបង់សំណងជំងឺចិត្តជាង ១ ពាន់ដុល្លារអាមេរិក ទៅឲ្យភាគីម្ខាងទៀត ព្រោះថា គ្រោះថ្នាក់នោះនាងជាអ្នកបង្កឡើង។
លោក សៅ វាសនា បានអះអាងថា៖ «ប៉ូលិសថៃបានដោះលែងនាង បន្ទាប់ពីនាងសងសំណងទៅអ្នករងគ្រោះ។ នាងបានវិលមកក្នុងដីខ្មែរវិញនៅល្ងាចថ្ងៃដដែលនោះ»។
លោក វាសនា បានបន្ថែមថា កន្លងមកប្តីរបស់ នង ស្រីម៉ាច ដែលជាអាជីវករម្នាក់នៅប៉ោយប៉ែត ជាអ្នកបើកឡានចូលទៅក្នុងទឹកដីថៃ។ ប៉ុន្តែ ថ្ងៃនោះប្រហែលជាប្តីជាប់រវល់ ទើបនាងបើកឡានខ្លួនឯង ហើយក៏ជួបគ្រោះថ្នាក់បែបនេះ៕
