ភ្នំពេញ ប៉ុស្តិ៍
យោងតាមសេចក្តីប្រកាសព័ត៌មានរបស់ស្ថានទូតអាមេរិក បានឲ្យដឹងថានៅថ្ងៃនេះថា ចៅក្រមតុលាការសហព័ន្ធសហរដ្ឋអាមេរិកនឹងធ្វើទស្សនកិច្ចមកប្រទេសកម្ពុជា ពីថ្ងៃទី ៤ ខែមិថុនាដល់ថ្ងៃទី ៨ ខែមិថុនា ឆ្នាំ ២០១២នេះ។
សេចក្តីប្រកាសព័ត៌មាននោះបញ្ជាក់ថា លោកចៅក្រម James Wynn ដែលជាចៅក្រមសាលាឧទ្ទរណ៍សហព័ន្ធ សម្រាប់សាខាទី ៤ របស់សហរដ្ឋអាមេរិក នឹងមកធ្វើបទបង្ហាញមួយចំនួនស្តីពីឯករាជ្យភាពនៃតុលាការ និងចំណុចដទៃទៀតនៃច្បាប់ដល់ចៅក្រម មេធាវី ក្រឡាបញ្ជី អ្នកសារព័ត៌មាន និស្សិតច្បាប់ និងអង្គការមិនមែនរដ្ឋាភិបាល។
ការធ្វើបទបង្ហាញនេះ ជាផ្នែកមួយនៃកម្មវិធីវាគ្មិន ដែលឧបត្ថម្ភដោយការិយាល័យកម្មវិធីព័ត៌មានអន្តរជាតិរបស់ក្រសួងការបរទេសសហរដ្ឋអាមេរិក៕
