ភ្នំពេញ ប៉ុស្តិ៍
ខេត្តតាក់: មេដឹកនាំគណបក្សប្រឆាំងរបស់មីយ៉ាន់ម៉ាលោកស្រី អ៊ុងសាន ស៊ូជី កាលពីថ្ងៃសៅរ៍ត្រូវបានគេស្វាគមន៍យ៉ាងកត់ក្ដៅ ខណៈចុះទៅសួរសុខទុក្ខពលរដ្ឋមីយ៉ាន់ម៉ាដែលរស់នៅក្នុងជុំរុំបណ្ដោយព្រំដែនថៃ-មីយ៉ាន់ម៉ា នៅក្នុងខេត្តតាក់ភាគខាងលិចថៃ។
លោកស្រីស៊ូជី បានធ្វើការសន្យាចំពោះជនភៀសខ្លួនរាប់ពាន់នាក់នៅឯជុំរុំព្រំដែននោះថា ពួកគេនឹងមិនត្រូវគេបំភ្លេចចោលទេ ប៉ុន្តែបានថ្លែងថា សន្តិភាព និងភាពរុងរឿងត្រូវតែបង្កើតនៅមីយ៉ាន់ម៉ាសិន មុនពេលពួកគេអាចត្រឡប់ទៅស្រុកវិញ។
ដោយទទួលបដិសណ្ឋារកិច្ចពីអ្នកគាំទ្រប្រមាណ៥ម៉ឺននាក់ លោកស្រី ស៊ូជី បានថ្លែងសង្ខេបពីស្ថានភាពរស់នៅ និងបញ្ហារបស់ពលរដ្ឋមីយ៉ាន់ម៉ាដែលរស់នៅទីនេះ និងបានជួបជាមួយក្រុមមេដឹកនាំសហគមន៍នៅឯមន្ទីរពេទ្យនៅក្នុងជុំរុំនេះ។
បន្ទាប់ពីដំណើរសួរសុខទុក្ខនោះ លោកស្រីស៊ូជីបានថ្លែងថា៖ «ខ្ញុំចង់ឲ្យពួកគេយល់ថាយើងនឹងមិនបំភ្លេចទេ ហើយយើង នឹងធ្វើអ្វីគ្រប់យ៉ាងតាមលទ្ធភាព ដើម្បីធ្វើឲ្យស្ថានភាពពួកគេកាន់តែប្រសើរ»។
ដោយត្រូវសួរថា តើក្រុមជនភៀសខ្លួនចង់ត្រឡប់ទៅស្រុមវិញទេ លោកស្រីបានថ្លែងថា អ្វីដែលសំខាន់ជាមុននោះ គឺសន្តិភាព និងការពង្រឹងស្ថានភាពសេដ្ឋកិច្ច នៅក្នុងមីយ៉ាន់ម៉ាជាមុនសិន ធ្វើដូច្នោះ នឹងមានការងារគ្រប់គ្រាន់សម្រាប់ពួកគេ។
សូមអានព័ត៌មានពិស្តារនៅក្នុងកាសែតភ្នំពេញប៉ុស្តិ៍ ភាសារខ្មែរ។
