ភ្នំពេញ ប៉ុស្តិ៍
ស្វាយរៀងៈ មន្ត្រីនគរបាលស្រុកម្នាក់បានអះអាងថា ជនជាតិវៀតណាមបីនាក់ត្រូវសាលាដំបូងខេត្តចោទប្រកាន់កាលពីថ្ងៃសៅរ៍ ពាក់ព័ន្ធនឹងការឃុំខ្លួនអ្នកលេងល្បែងម្នាក់់ដែលបានជំពាក់លុយម្ចាស់កាស៊ីណូចំនួន៣ពាន់ដុល្លារ ដោយខុសច្បាប់ក្នុងការលេងល្បែងនៅកាស៊ីណូនៅក្រុងបាវិត ខេត្តស្វាយរៀង។
លោក សុខ វាសនា មន្ត្រីនគរបាលផ្នែកព្រហ្មទណ្ឌកម្រិតធ្ងន់ក្នុងក្រុងបាវិតបានប្រាប់ថា បុរសជនជាតិវៀតណាមបីនាក់គឺ ឈឿង វ៉ាន់ជីង, ទ្រឿង វ៉ាំង តាំនិង ឡាំ យីវី ជាបុគ្គលិកកាស៊ីណូនិងសណ្ឋាគារម៉ុកបៃ(Moc Bay)ត្រូវចោទប្រកាន់កាលពីថ្ងៃទី២ មិថុនា ពីបទបង្ខាំងមនុស្សខុសច្បាប់។
លោកបញ្ជាក់ថា ពួកគេត្រូវកម្លាំងនគរបាលចាប់ខ្លួននៅកាស៊ីណូនិងសណ្ឋាគារ Moc Bay ស្ថិតនៅក្នុងក្រុងបាវិត ខេត្តស្វាយរៀងកាលពីថ្ងៃទី២៩ ខែឧសភាបន្ទាប់ពីបានឃុំខ្លួនបុរសអ្នកលេងល្បែងវៀតណាមឈ្មោះ ង្វៀន យ៉ាំងធឺ ដោយខុសច្បាប់ព្រោះតែជំពាក់ប្រាក់ថៅកែកាស៊ីណូ៣ពាន់ដុល្លារ ។
លោកបន្តថា៖«ជនរងគ្រោះបានខ្ចីប្រាក់ពីថៅកែកាស៊ីណូដើម្បីលេងល្បែងនៅក្នុងកាស៊ីណូនោះ។ ប៉ុន្តែគាត់ចាញ់ប្រាក់អស់ ហើយគ្មានប្រាក់សងថៅកែវិញ។គាត់ក៏ត្រូវជនសង្ស័យទាំងបីនាក់ឃុំខ្លួនតាមការបញ្ជាពីថៅកែកាស៊ីណូធ្វើទារុណកម្ម(វាយដំ)ដើម្បីបង្ខំឲ្យគាត់សងប្រាក់ដែលបានជំពាក់»។
លោកបានបញ្ជាក់ថា៖«ដោយជនរងគ្រោះមិនអាចទ្រាំនឹងការធ្វើទារុណកម្មនេះ គាត់បានយកកាំបិតចាក់សម្លាប់ខ្លួនឯងនៅក្នុងបន្ទប់សណ្ឋាគារនេះ»។
លោកប្រាប់ដែរថា ជនសង្ស័យទាំងបីនាក់ខាងលើនេះត្រូវនគរបាលចាប់ខ្លួន ខណៈកំពុងព្យាយាមដឹកជនរងគ្រោះដែលរងរបួសចេញពីកាស៊ីណូម៉ុកបៃទៅជួយសង្គ្រោះនៅគ្លីនិកឯកជនមួយកន្លែងនៅក្នុងក្រុងបាវិត។
លោក កែវ គង់ អធិការនគរបាលក្រុងបាវិតមានប្រសាសន៍ថា ថៅកែកាស៊ីណូរូបនេះជាជនជាតិវៀតណាម ឥឡូវនេះគាត់កំពុងរត់គេចខ្លួន។ លោកថា ៖«នគរបាលស្គាល់ថៅកែកាស៊ីណូម្នាក់នេះហើយ។ យើងកំពុងធ្វើការតាមចាប់ខ្លួនគាត់»។
តែលោកបដិសេធមិនអធិប្បាយលម្អិតពីអត្តសញ្ញាណ និងប្រវត្តិថៅកែកាស៊ីណូនេះទេ។
ជនសង្ស័យទាំងបីនិងមេធាវីពួកគេមិនអាចទាក់ទងសុំការបំភ្លឺបានទេពីម្សិលមិញ៕ PN
