ភ្នំពេញ ប៉ុស្តិ៍
កំលោះចាស់អាយុ៣២ឆ្នាំ ផល សំណាន កើតនៅភូមិព្រែកដាច់ ឃុំព្រែកដាច់ ស្រុកលើកដែកខេត្តកណ្តាល នៅក្នុងគ្រួសារក្រីក្រមួយដែលមានកូន៥នាក់។ សំណាន គឺជាកូនច្បងបង្អស់ក្នុងគ្រួសារនេះ។ ជើងស្តាំនិងដៃស្តាំរបស់គាត់ កើតជំងឺប៉ូលីយ៉ូតាំងពីកំណើត ប៉ុន្តែគាត់នៅតែអាចដើរបានដោយទប់លំនឹងជាមួយជើងឆ្វេងដែលមិន ពិការ រីឯ ដៃស្តាំវិញក៏គាត់អាចចាប់កាន់វត្ថុផ្សេងៗបានខ្លះដោយយកដៃឆ្វេង ជួយទប់។
កាលពីអាយុ៨ឆ្នាំ ឪពុកម្តាយបានបញ្ជូនគាត់ឲ្យទៅរៀននៅសាលាបឋមសិក្សានៅក្នុងភូមិ ហើយក្រោយមកទៀតគាត់បានបន្តការ សិក្សានៅវិទ្យាល័យកំពង់ភ្នំដែលមានចម្ងាយ១៤គីឡូម៉ែត្រពីផ្ទះ។ គាត់ធ្វើដំណើរទៅសាលាដោយជិះរឺម៉ករាល់ថ្ងៃ ព្រោះគាត់ពុំអាចជិះកង់ឬម៉ូតូបាន ។
ជាអកុសល ដោយឪពុកម្តាយធ្លាក់ខ្លួនក្រ បណ្តាលមកពីជួញដូរខាតបង់ច្រើនពេក នាំឲ្យគ្រួសារនោះជួបប្រទះភាពក្រីក្រ ហើយមានកង្វះខាតយ៉ាងធ្ងន់ធ្ងរ។ នេះជាកត្តាធំមួយដែលបានញ៉ាំងឲ្យយុវជន ផល សំណាន មានអារម្មណ៍តក់ស្លុតយ៉ាងខ្លាំង។ គាត់បានសម្រេចចិត្តបោះបង់ចោលការសិក្សា ត្រឹមថ្នាក់ទី១០ប៉ុណ្ណោះនៃវិទ្យាល័យនោះ។ ស្ថានភាពបែបនេះ ធ្វើឲ្យគាត់បាត់បង់សេចក្តីសង្ឃឹមក្នុងជីវិតហើយមានសេចក្តីភ័យ ព្រួយចំពោះជោគវាសនារបស់ខ្លួននៅក្នុងពេលអនាគត។ គាត់នៅផ្ទះត្រឹមតែបានជួយធ្វើការងារស្រាលៗជំនួសឪពុកម្តាយ ប៉ុណ្ណោះ។
ផល សំណាន និយាយថា៖ «ពេលនោះខ្ញុំមានអារម្មណ៍ហាក់ដូចជាវង្វេងវង្វាន់ក្នុងខួរក្បាល រកនឹកគិតអ្វីក៏លែងចេញ ព្រោះតែភាពធ្លាក់ចុះក្រីក្រនៃគ្រួសារ។ ខ្ញុំកំពុងស្ថិតនៅក្នុងភាពអស់សង្ឃឹម ពិភពលោកនេះ ប្រែក្លាយទៅជាខ្មៅងងឹតឥតរស្មីចំពោះខ្ញុំ តើខ្ញុំមានអ្វី ជាទីពឹង សម្រាប់ជីវិតនៅក្នុងពេលអនាគត?»។
ជាភ័ព្វសំណាង ថ្ងៃមួយគាត់បានមកជួបអង្គការ KAVTV (Khmer Association for Vocational Training and Vocation) ដែលបានផ្តល់វគ្គបណ្តុះបណ្តាលផ្នែកជួសជុលគ្រឿងបរិក្ខារអគ្គិសនី-អេឡិចត្រូនិកដល់ជនពិការ។ គាត់អាចស្គាល់អង្គការនេះតាមរយៈសិស្ស ម្នាក់ដែលបាន ទទួលវគ្គបណ្តុះបណ្តាលនៅទីនោះរួចហើយគាត់ក៏បានមកចុះឈ្មោះសុំ ចូលរៀនវគ្គបណ្តុះបណ្តាលជំនាញ ។
នៅខែមករា ឆ្នាំ២០១០ គាត់ទទួលបានអាហារូបករណ៍ឧបត្ថម្ភដោយ ធនាគារ ANZ Royal Bank Cambodia, អង្គការ CSG កាណាដា និងគ្រួសារ WoodFall Nix Family។ តាមរយៈកម្មវិធីនេះ សិក្ខាកាមជនពិការចំនួន៣០នាក់ ទទួលបាននូវការជួយឧបត្ថម្ភរាល់ចំណាយលើការស្នាក់នៅ និងចំណីអាហារក្នុងពេលកំពុងបំពេញសកម្មភាពសិក្សាជំនាញជួសជុល គ្រឿងបរិក្ខារអគ្គិសនី និងអេឡិចត្រូនិក រយៈពេល៦ខែ។ កម្មវិធី បណ្តុះបណ្តាលនេះត្រូវបានរៀបរៀងអនុវត្ត និង គ្រប់គ្រងដោយអង្គការសមាគមខ្មែរបណ្តុះបណ្តាលវិជ្ជាជីវៈ និង បណ្តុះគំនិតអាជីវកម្ម (KAVTV)។ ពេលនេះសំណានមានសេចក្តីសោមនស្ស ហើយការរស់នៅរបស់គាត់បានប្រសើរជាងមុន ក្តីសង្ឃឹមក៏កើតមានឡើងសម្រាប់ពេល អនាគតផងដែរ។
នៅខែមិថុនា ២០១០ សំណានបានទទួលវិញ្ញាបនបត្របញ្ចប់វគ្គបណ្តុះបណ្តាលអគ្គិសនីអេឡិច ត្រូនិក ប្រកបដោយនិទ្ទេសល្អ បន្ទាប់មក ត្រូវបានបញ្ជូនទៅអនុវត្តជំនាញបន្ថែម រយៈពេល៦ខែទៀតនៅក្នុងរោងជាងរបស់អង្គការ KAVTV ក្នុងភូមិកំពង់ព្រីងឃុំសិត្បូស្រុកស្អាង ខេត្តកណ្តាល។ នៅពេលដែលគាត់បានបញ្ចប់ការអនុវត្តជំនាញបន្ថែមនៅរោងជាងនោះ សំណានត្រូវបានអង្គការ KAVTV ហៅមកធ្វើជាបុគ្គលិក ជួសជុលបរិក្ខារ នៅឯរោងជាងរបស់ KAVTV នៅការិយាល័យទួលគោក។ ក្នុងរយៈពេលប្រហែលមួយឆ្នាំដែលគាត់បានធ្វើការទីនោះ សំណាន មានសេចក្តីរីករាយណាស់ ហើយការរស់នៅមានភាពប្រសើរជាងមុន។ គាត់អាចរកបានប្រាក់ចំណូលសម្រាប់ទ្រទ្រង់ជីវភាពប្រចាំថ្ងៃ និងផ្ញើ មួយចំណែកជូនដល់ម្តាយនៅឯផ្ទះទៀតផង។
សំណាន ថ្លែងថា៖ «ខ្ញុំសប្បាយចិត្តណាស់ ព្រោះពេលនេះ ខ្ញុំទទួលបានមុខជំនាញសម្រាប់ប្រកបរបរចិញ្ចឹមជីវិតដោយខ្លួនឯង ខ្ញុំឈប់ពឹងពាក់លើអ្នកដទៃទៀត ហើយមនុស្សទាំងឡាយរាប់រកខ្ញុំយ៉ាងរាក់ទាក់មិនមានភាពរើសអើងកើត ឡើងចំពោះខ្ញុំទៀតទេ ជាពិសេសក្រុមគ្រួសាររបស់ខ្ញុំមានមោទនភាព និងជួយជំរុញលើកទឹកចិត្តដល់ខ្ញុំ។ ខ្ញុំបានជួបវត្ថុដែលប៉ងប្រាថ្នាក្នុងជីវិតរបស់ខ្ញុំហើយ»។
សំណាន បន្ថែមទៀតថា៖ «ខ្ញុំសូមថ្លែងអំណរគុណ និងការដឹងគុណជាអនេកប្បការដល់ធនាគារ ANZ Royal Bank Cambodia អង្គការ CSG កាណាដា និងគ្រួសារ WoodFall Nix Family ដែលបានជួយជ្រោមជ្រែងផ្តល់អាហារូបករណ៍ដល់រូបខ្ញុំដើម្បីអាចមានឱកាសបានរៀនមុខជំនាញនេះ ជាពិសេសដល់អង្គការ KAVTV ដែលបានយកចិត្តទុកដាក់ជួយបណ្តុះបណ្តាលមុខជំនាញវិជ្ជាជីវៈដល់ រូបខ្ញុំ ទើបខ្ញុំមាន អនាគតភ្លឺស្វាងដូចសព្វថ្ងៃនេះ៕
(អង្គការKAVTV អាចទក់ទងបានតាមរយៈអាសយដ្ឋានផ្ទះលេខ ១២ FE0 ផ្លូវ ៦១៤ និង២៩៥ សង្កាត់បឹងកក់២ ខណ្ឌទួលគោក រាជធានីភ្នំពេញ។ ទូរស័ព្ទ ០១២ ៨៥០ ៦៤៩, ០១២ ៥០៨ ២១៩ ឬ អ៊ីមែល hem_phang@yahoo.com, ប្រអប់សំបុត្រ ៧០១)
