ភ្នំពេញ ប៉ុស្តិ៍
ពោធិ៍សាត់ៈ មន្រ្តីប៉ូលិសស្រុកម្នាក់ប្រាប់ថា អតីតចៅអធិការវត្តម្នាក់និងគូកនពីរនាក់ ត្រូវសាលាដំបូងខេត្តពោធិ៍សាត់ចោទប្រកាន់នៅថ្ងៃម្សិលមិញពីបទប្រើប្រាស់អាវុធខុសច្បាប់ និងក្លែងបន្លំឯកសណ្ឋានយោធា។
លោកវរសេនីយ៍ត្រី ប៉ែន ទុង អធិការនគរបាលស្រុកបាកានបានប្រាប់ថា អតីតចៅអធិការវត្តទឹកត្រង់ ផង់ សោភ័ណ អាយុ៣២ឆ្នាំ និងគូកនពីរនាក់ឈ្មោះ អឿន តាត វ័យ៤៧ឆ្នាំ និង គឹម កំសត់ វ័យ២១ឆ្នាំ ត្រូវតុលាការចោទប្រកាន់ពីបទប្រើប្រាស់អាវុធខុសច្បាប់ និងក្លែងបន្លំឯកសណ្ឋានយោធា កាលពីថ្ងៃទី៦ ខែមិថុនា ឆ្នាំ២០១២។
លោកបញ្ជាក់ថា៖ «ពួកគេត្រូវប៉ូលិសចាប់ខ្លួននៅភូមិបឹងបត់កណ្តាល ឃុំបឹងបត់កណ្តាល ស្រុកបាកាន ខេត្តពោធិ៍សាត់កាលពីរាត្រីថ្ងៃទី២ ខែមិថុនាពេលកំពុងជិះម៉ូតូស្លៀកពាក់ឯកសណ្ឋានយោធាមានកាន់កាំភ្លើងអាកាមួយដើមទាំងយប់»។
លោកអះអាងថា៖«ពួកគេត្រូវបានចោទប្រកាន់ពីបទប្រើអាវុធដោយខុសច្បាប់ និងក្លែងបន្លំឯកសណ្ឋានយោធា»។
លោកថា ក្នុងការចាប់ខ្លួនពួកគេ ប៉ូលិសរឹបអូសបានកាំភ្លើងអាកាមួយដើមមាន៣០គ្រាប់។
លោក ប៉ែន ទុង បានឲ្យដឹងថា អតីតសង្ឃ ផង់ សោភ័ណ សារភាពថា គាត់ទទួលកាំភ្លើងអាកា និងខោអាវយោធាពីមេបញ្ជាការម្នាក់នៅតំបន់ប្រតិបត្តិសឹកខេត្តទុកការពារខ្លួន ហើយថា បានទទួលនិងទុកវានៅក្នុងកុដិជាច្រើនឆ្នាំមកហើយ។
លោកបានបន្តទៀតថា ផង់ សោភ័ណ ត្រូវគេផ្សឹក ហើយបណ្តេញចេញពីវត្តដោយអនុគណស្រុកបាកាន កាលពីថ្ងៃទី៤ ខែមិថុនា។ ឥឡូវនេះ លោកនិងគូកនពីរនាក់ទៀតត្រូវបញ្ជូនទៅឃុំនៅពន្ធនាគារខេត្តរង់ចាំការកាត់ទោសពេលខាងមុខ។
លោកថ្លែងបន្តថា៖ «នេះជាលើកទីបីហើយដែលចៅអធិការវត្តត្រូវគេផ្សឹកហើយត្រូវប៉ូលិសចាប់ខ្លួនឃុំ នៅស្រុកបាកាន។ សកម្មភាពអតីតសង្ឃទាំងនេះ បានធ្វើឲ្យប៉ះពាល់ជាខ្លាំងលើជំនឿ និងសាសនារបស់រដ្ឋ»។
លោកបន្តថា នៅឆ្នាំ២០០៩ អតីតចៅអធិការវត្តពីររូប ត្រូវចាប់ផ្សឹកបណ្តេញពីវត្តនៅស្រុកបាកាន ព្រោះរងការចោទពីអ្នកភូមិនិងសង្ឃដូចគ្នាថា រួមភេទជាមួយសង្ឃដូចគ្នានៅក្នុងវត្ត។
អ្នកទាំងបីដែលរងការចោទប្រកាន់ខាងលើនេះ មិនអាចទាក់ទងសុំការបំភ្លឺបានទេ កាលពីម្សិលមិញ៕ NR
