ភ្នំពេញ ប៉ុស្តិ៍
ក្រុងវីយែន/ក្រុងឌូបៃៈ អ៊ីរ៉ង់ បានចោទសួរដល់ការត្រៀមខ្លួនរបស់ប្រទេសមហាអំណាចពិភពលោក សម្រាប់កិច្ចចរចាជុំវិញកម្មវិធីនុយក្លេអ៊ែរដែលមានជម្លោះរបស់ ខ្លួន និងបានចោទប្រកាន់អង្គការឃ្លាំមើលអ.ស.ប. កាលពីថ្ងៃពុធពីបទមានអាកប្បកិរិយាដូចទីភ្នាក់ងារចារកម្មដែល ប្រើល្បិចរបស់លោកខាងលិច ដោយបន្តសម្តីចាក់ដោតរបស់ខ្លួន។
ប្រព័ន្ធឃោសនាអ៊ីរ៉ង់ បាននិយាយថា ក្រុងតេអេរ៉ង់បានសរសេរលិខិតពីរដងទៅឲ្យអង់គ្លេស បារាំង រុស្ស៊ី ចិន អាមេរិក និងអា ល្លឺម៉ង់ ដែលគេស្គាល់ថាមហាអំណាច P5+1 ដោយស្វែងរកជំនួប ត្រៀមមួយមុនកិច្ចចរចាដែលគេគ្រោងធ្វើនៅថ្ងៃទី១៨ មិថុនា ប៉ុន្តែពុំទាន់ទទួលការឆ្លើយនៅឡើយ។
ក្នុងលិខិតផ្ញើជូនប្រមុខ គោលនយោបាយបរទេសអឺរ៉ុប លោកស្រី ខេធើរីន អាស្តុន ប្រធានអ្នកចរចារបស់អ៊ីរ៉ង់ លោក សាអិដ ចាលីលី បានថ្លែងថា៖«ការពន្យារពេលនៃភាគីផ្សេងទៀត ក្នុងជំនួបអ្នកតំណាង និងក្រុមអ្នកជំនាញ បានបង្ហាញនូវមន្ទិល និងភាពមិនប្រាកដប្រជាស្តីពីការត្រៀមខ្លួនសម្រាប់កិច្ច ចរចាដោយជោគជ័យ»។លោក ស្រី អាស្តុន កំពុងចាត់ចែងទំនាក់ទំនងជាមួយនឹងអ៊ីរ៉ង់ តាងនាមឲ្យមហាអំណាចទាំង៦។ លោកអះម៉ាឌីនេចាដ បានថ្លែងថា មហាអំណាចលោកខាងលិច កំពុង ស្វែងរកវិធី ដើម្បី«ខ្ជះខ្ជាយពេលវេលា» និង«កំពុងរកលេស»បដិសេធការចរចា៕ NR
