ភ្នំពេញ ប៉ុស្តិ៍
- Prev
- 1 of 4
- Next
ភ្នំពេញ : សម្រាប់ការចេញដំណើរជាក្រុមរបស់តារាចម្រៀងកម្ពុជាល្បីៗ រួមជាមួយនឹងក្រុមតន្ត្រីករល្បីឈ្មោះចចកសមុទ្រ ទៅសម្តែងនៅប្រទេសអូស្ត្រាលី បានធ្វើឡើងកាលពីល្ងាចថ្ងៃទី៦ ខែឧសភា។ ប៉ុន្តែតារាចម្រៀងល្បីម្នាក់ក្នុងចំណោម៣នាក់ដែលត្រូវចេញដំណើរ នៅល្ងាចថ្ងៃនោះ គឺតារាចម្រៀង ពេជ្រ សោភា មិនបានទៅជាមួយគេទេ ពោលគឺនាងខកជើងមួយថ្ងៃ ដោយសារបញ្ហាលិខិតឆ្លងដែន។
តារាចម្រៀង៣ដួងរួមមាន មាស សុខសោភា ពេជ្រ សោភា និង ឆាយ វីរៈយុទ្ធ រួមនឹងក្រុមភ្លេងចចកសមុទ្រ ត្រូវចេញដំណើររួមគ្នា ក៏ប៉ុន្តែតារាចម្រៀង ពេជ្រ សោភា មិនបានរួមដំណើរជាមួយគេទេ ដោយសារតែលិខិតឆ្លងដែនដែលនាងធ្លាប់ប្រើជិះយន្តហោះទៅច្រៀងនៅ បរទេសជាច្រើនលើកកន្លងមកមានបញ្ហា ហើយមិនត្រូវបានទទួលការអនុញ្ញាតឲ្យចេញទៅទេ។
ក្រុមអ្នកសិល្បៈដែលឈរត្រៀបត្រាជាមួយនឹងអ្នកគាំទ្រនោះបានឲ្យ ដឹងថា អ្នកនាង ពេជ្រ សោភា មានបញ្ហាតិចតួចរឿងលិខិតឆ្លងដែន ប៉ុន្តែមិនមែនមានន័យថា នាងមិនបានទៅសម្តែងនោះទេ។ ក្រុមអ្នកសិល្បៈទាំងនោះ បានបញ្ជាក់ថា ដោយសារមានបញ្ហានេះកើតឡើង អ្នកនាង ពេជ្រ សោភា ត្រូវចេញដំណើរក្រោយពួកយើងមួយថ្ងៃ ពោលគឺគាត់ចេញដំណើរនៅថ្ងៃទី៧ ខែឧសភា។ សម្រាប់ថ្ងៃចេញដំណើរនោះ គេសង្កេតឃើញថា អ្នកគាំទ្រជាច្រើនបានជូនដំណើរ៕
