ភ្នំពេញ ប៉ុស្តិ៍
ភ្នំពេញៈ ស្រ្តីកម្ពុជាចំនួនបួននាក់ដែលធ្វើការនៅរោងចក្រកាត់ដេរមួយ នៅទីក្រុង Dongguan ប្រទេសចិន ត្រូវបាននាំត្រឡប់មកស្រុកកំណើតវិញហើយកាលពីម្សិលមិញ បន្ទាប់ពីទទួលរងនូវបទពិសោធយ៉ាងអាក្រក់អស់រយៈពេល៩ខែ ដែលក្នុងរយៈពេលនោះពួកគេបានទទួលរងនូវជំងឺឈឺថ្កាត់ផ្សេងៗ ធ្វើការងារលើសការកំណត់ និងទទួលរងការមិនឲ្យលិខិតឆ្លងដែនវិញនៅទីនោះ។
យិន សុភី អាយុ ២៧ឆ្នាំ សុខ គន្ធា អាយុ២៥ នន់ សុភាព អាយុ២១ឆ្នាំ និង យិន សុភា អាយុ២០ បានធ្វើដំណើរទៅប្រទេសចិនកាលពីខែសីហា ឆ្នាំ២០១១ បន្ទាប់ពីមេខ្យល់ម្នាក់ បានសន្យាថានឹងផ្តល់ប្រាក់ខែខ្ពស់ដល់ពួកគេ។ ក្រុមស្រ្តីទាំងនេះត្រូវបានបញ្ជូនត្រឡប់មកប្រទេសវិញកាលពី ម្សិលមិញ បន្ទាប់ពីមជ្ឈមណ្ឌលអប់រំច្បាប់សម្រាប់សហគមន៍ (CLEC) និងស្ថានទូតកម្ពុជា បានធ្វើអន្តរាគមន៍ជួយពួកគេ។ ក្រុមស្រ្តីទាំងនោះមានស្រុកកំណើតនៅស្រុកកៀនស្វាយ ខេត្តកណ្តាល។
នៅពេលមកដល់រាជធានីភ្នំពេញ យិន សុភា ដែលជាស្រ្តីរងគ្រោះម្នាក់ក្នុងចំណោមពួកគេ បានធ្វើការក្រើនរំលឹកទៅប្រជាជនដទៃៗមិនឲ្យធ្វើដូចពួក នាង។
នាង បន្តថា៖ «សូមប្រជាជនកម្ពុជាទាំងឡាយ កុំជឿមេខ្យល់លឿនពេក»។
បើតាម អ្នកនាង យិន សុភី ដែលជាជនរងគ្រោះម្នាក់ទៀត ក្រុមស្រ្តីទាំងនេះ បានព្យាយាមគេចចេញកាលពីខែមុនបន្ទាប់ពីពីរនាក់ក្នុងចំណោម ពួកគេមានបញ្ហាជំងឺក្រពះ និងដង្ហើម ហើយពីរនាក់ទៀតបានយល់ឃើញថាពួកគេទទួលរងការធ្វើការងារលើសហួស ប្រមាណ។ ប៉ុន្តែនិយោជករបស់ពួកគេបានបដិសេធមិនឲ្យពួកគេចេញ ដោយទុកប្រាក់ខែ និងលិខិតឆ្លងដែនរបស់ពួកគេ។
នៅទីបំផុត ក្រុមស្រ្តីទាំងនេះ បានព្យាយាម និងអាចទូរស័ព្ទមកក្រុមគ្រួសាររបស់ពួកគេ និង មជ្ឈមណ្ឌលអប់រំច្បាប់សម្រាប់សហគមន៍ ដែលបានស្វែងរកជំនួយពីស្ថានទូតកម្ពុជានៅទីនោះ។
នន់ សុភាព បានថ្លែងថា នាងត្រូវបានបោកដោយមេខ្យល់ ហើយបាននិយាយបន្តថា នេះជាលើកទីមួយនៃការចង់ទៅធ្វើការនៅបរទេស បានជួបបទពិសោធយ៉ាងដូច្នេះ។
អ្នកស្រី បានបន្តថា៖ «ខ្ញុំធ្វើការពី១២ម៉ោងទៅ១៤ម៉ោងក្នុងមួយថ្ងៃ ហើយទទួលទានអាហារបានតែ២ពេលប៉ុណ្ណោះ»។ «ខ្ញុំមិនអាចទ្រាំបានទេ»។
អ្នកស្រី នន់ សុផល អាយុ៤២ឆ្នាំ ម្តាយរបស់ នន់ សុភាព បានថ្លែងថា ពួកគេបានព្យាយាមពន្យល់កូនស្រីរបស់ខ្លួននៅកម្ពុជា ប៉ុន្តែពួកគេមិនព្រម។
អ្នកស្រីបានបន្តថា៖ «មុននោះ ខ្ញុំមិនចង់ឲ្យកូនស្រីរបស់ខ្ញុំទៅធ្វើការនៅបរទេសនោះទេ ប៉ុន្តែនាងចង់ទៅដោយសារគ្រួសារក្រីក្រ»។ «យើងឮគេនិយាយថា នាងនឹងអាចរកប្រាក់ខែបានច្រើនជាងធ្វើការនៅក្នុងស្រុក ប៉ុន្តែឥឡូវនេះ យើងដឹងហើយ»។
ហ៊ុយ ពេជ្រសុវណ្ណ មន្រ្តីកម្មវិធីម្នាក់នៅ CLEC បានថ្លែងថា ការបញ្ជូនពលករត្រឡប់មកពីប្រទេសចិនមកវិញនេះ គឺជាករណីទីមួយដែល CLEC បានជួប។
លោក បន្តថា៖ «វាជាករណីកម្រមួយ ដែលមានកម្មករជនជាតិកម្ពុជាក្លាយជាជនរងគ្រោះនៅប្រទេសចិន»។ «យើងជួបភាគច្រើន គឺនៅប្រទេសម៉ាឡេស៊ី និងថៃ»។
លោក បន្តថា ក្រុមស្រ្តីទាំងនេះត្រូវបានបញ្ជូនទៅអង្គការ លីកាដូ ដើម្បីទទួលការពិនិត្យព្យាបាលសុខភាព៕ PS
