ភ្នំពេញ ប៉ុស្តិ៍
ភ្នំពេញៈ រដ្ឋាភិបាលជប៉ុន បានផ្តល់ទឹកប្រាក់ ២៨៣ លានយ៉េន ស្មើនឹង៣,៤៩លានដុល្លារ បន្ថែមទៀតដល់កម្ពុជា ក្នុងការអភិវឌ្ឍធនធានមនុស្ស។
ក្នុងពិធីចុះហត្ថលេខាលើជំនួយឥតសំណងកាលពីថ្ងៃសុក្រ លោក ម៉ាសាហ្វូមី គូរ៉ូគី ឯកអគ្គរាជទូតជប៉ុនប្រចាំនៅកម្ពុជា បានថ្លែងថា គម្រោង «កម្មវិធីអាហារូបករណ៍អភិវឌ្ឍន៍ធនធានមនុស្សរបស់ជប៉ុន» គឺជាគម្រោងមួយសម្រាប់និស្សិតអាហារូបករណ៍ថ្មីចំនួន ២៤ នាក់ ដើម្បីទៅសិក្សានៅប្រទេសជប៉ុន រយៈពេល ២ ឆ្នាំ។ លោកថ្លែងថា ៖ «អាហារូបករណ៍ ត្រូវបានផ្តល់ជូនជាពិសេស ចំពោះមន្ត្រីរដ្ឋាភិបាលវ័យក្មេង និងមានសមត្ថភាព ដែលត្រូវបានរំពឹងថា នឹងរួមចំណែកដល់ការអភិវឌ្ឍសេដ្ឋកិច្ច និងសង្គមរបស់ប្រទេសកម្ពុជា បន្ទាប់ពីពួកគេវិលត្រឡប់មកកម្ពុជាវិញ»។
លោក ឡុង វិសាលោ រដ្ឋលេខាធិការក្រសួងការបរទេស ដែលបានចុះហត្ថលេខា លើសារលិខិតទទួលជំនួយឥតសំណងនេះ បានថ្លែងអំណរគុណ ចំពោះស្ថានទូត និងរាជរដ្ឋាភិបាលជប៉ុន ដែលតែងតែផ្តល់ជំនួយ ជាបន្តបន្ទាប់ជួយដល់ការអភិវឌ្ឍប្រទេសកម្ពុជា ក្នុងការ «កាត់បន្ថយភាពក្រីក្រ និងលើកស្ទួយកម្រិតជីវភាពរបស់ពលរដ្ឋ»។
តាមរយៈអ្នកនាំពាក្យក្រសួង ការបរទេស លោក កុយ គួង ដែលថ្លែងប្រាប់អ្នកសារព័ត៌មាន នៅបន្ទាប់ពីពិធីចុះហត្ថលេខា ថា លោក ឡុង វិសាលោ រំឭកថា ជប៉ុន ដែលផ្តល់អាហារូបករណ៍អភិវឌ្ឍន៍គម្រោងធនធានមនុស្សនេះ តាំងពីឆ្នាំ ២០០០ ដល់ ២០១២ មានទឹកប្រាក់ប្រមាណជាង ៣៤ លានដុល្លារហើយ។
ជប៉ុនបានចូលរួមចំណែកយ៉ាងសកម្ម នៅក្នុងការអភិវឌ្ឍសេដ្ឋកិច្ច និងសង្គមកម្ពុជា តាមរយៈការផ្តល់ជំនួយឥតសំណងជាច្រើនពាន់លានដុល្លារ ចាប់តាំងពីក្រោយការបោះឆ្នោតជាតិ ឆ្នាំ ១៩៩៣ មក។ សមិទ្ធផល ដែលជាជំនួយឥតសំណង របស់រដ្ឋាភិបាលជប៉ុន ក្នុងនោះ ក៏មានស្ពានជ្រោយចង្វារ ឆ្លងកាត់ទន្លេសាបក្នុងរាជធានីភ្នំពេញ ស្ពានទន្លេបិទ ឆ្លងកាត់ទន្លេមេគង្គ ក្នុងទីរួមខេត្តកំពង់ចាម និងស្ពានអ្នកលឿង ដែលកំពុងតែដំណើរការសាងសង់ ព្រមទាំងផ្លូវ និងហេដ្ឋារចនាសម្ព័ន្ធជាច្រើនទៀត៕
