ភ្នំពេញ ប៉ុស្តិ៍
ក្រុងតូក្យូៈ ខណៈដែលប្រទេសជប៉ុនកំពុងតែមមាញឹកនឹងការរកមធ្យោបាយដោះស្រាយ រឿងថាមពលអគ្គិសនីដើម្បីយកទៅផ្គត់ផ្គង់ម៉ាស៊ីនត្រជាក់ នារដូវក្តៅនេះផងនោះ ស្រាប់តែក្រុមហ៊ុនផលិតស្រាបៀរ គិរីន បានបង្កើនរូបមន្តភេសជ្ជៈថ្មីនោះគឺ «ការ៉េមស្រាបៀរ» ដែលប្រើឧបករណ៍ក្លាសេ្សទឹកស្រាបៀរឲ្យកក ដើម្បីជួយរក្សាសីតុណ្ហភាពឲ្យនៅត្រជាក់ស្រេបបានយូរពេលទទួលទាន។
វាជាឧបករណ៍ម៉ាស៊ីនម្យ៉ាងគេប្រើសម្រាប់ក្លាសេ្សទឹកដោះគោជូរ ឬ ក៏ស្រាបៀរឲ្យត្រជាក់។ នៅកែវស្រាបៀរត្រូវបានបណ្ដែតដោយដុំការ៉េម ដែលគេយកទឹកស្រាបៀរទៅក្លាស្សេឲ្យកក។
ម៉ាស៊ីននោះ ធ្វើឲ្យស្រាបៀរអាចរក្សាសីតុណ្ហភាពត្រជាក់ជាមធ្យម២០នាទី ដូច្នេះអ្នកដែលនិយមក្រេបស្រាបៀរតិចៗ មិនចាំបាច់បារម្ភខ្លាចស្រាបៀររបស់ខ្លួនអស់ត្រជាក់ ហើយប្រែរសជាតិនោះទេ។
លោក គូនីហ៊ីកូ កាដូតា ប្រធានផ្នែកគ្រប់គ្រងទីផ្សារក្រុមហ៊ុនគិរីនបាននិយាយថា៖ «ក្រុមស្ត្រី និងអ្នកចូលចិត្តផឹកស្រាបៀរមួយចំនួន បានចំណាយពេលច្រើនម៉ោងដោយរង់ចាំក្លាសេ្សទឹកកកឲ្យត្រជាក់សិនទើប ផឹក ហើយពួកគេមិនចូលចិត្តផឹកវាទេ បើមិនត្រជាក់នោះ។ ដូច្នេះហើយបានជាយើងត្រូវបង្កើតឲ្យមានឧបករណ៍បង្កកទឹកស្រាបៀរ នោះឲ្យទៅជាការ៉េមតែម្ដង»។
បច្ចុប្បន្នឧបករណ៍នោះ មានចរាចរណ៍ជាង២០០គ្រឿងហើយនៅប្រទេសជប៉ុន។ ក្រុមហ៊ុនគិរីន មានគោលបំណងចង់បង្កើតឲ្យបាន១ពាន់គ្រឿងតាមបណ្តាភោជនីយដ្ឋាននានា ទូទាំងប្រទេស ដើម្បីបម្រើការ៉េមស្រាបៀរដល់អតិថិជន។ ក្រុមហ៊ុនក៏នឹងបន្តទីផ្សារខ្លួនទៅដល់សហរដ្ឋអាមេរិក និងតំបន់អឺរ៉ុបផងដែរ នេះបើតាមប្រធានទីផ្សារបានឲ្យដឹងនោះ។
លោក គូនីហ៊ីកូ កាដូតា បានលើកឡើងថា៖ «យើងចង់សាកល្បងងាកមកភ្លក្សការ៉េមស្រាបៀរ ដែលត្រជាក់បានយូរ និងកាត់បន្ថយការប្រើប្រាស់ថាមពលដែលអាចជួយដល់បរិស្ថានថែមទៀតផង»៕ PR
