ភ្នំពេញ ប៉ុស្តិ៍
បាត់ដំបងៈអាជីវករលក់ដូរនៅផ្សារអប្សរាផ្សារលើ ប្រមាណ៥០នាក់ បាននាំគ្នាមកធ្វើការតវ៉ានៅមុខសាលាខេត្ដបាត់ដំបង នៅថ្ងៃនេះ ដើម្បីស្នើសុំឱ្យមន្ត្រីសាលាខេត្ដជួយអន្ដរាគមន៍បញ្ចុះតម្លៃតូបចំនួន៣០ ភាគរយ ដោយពួកគេបានអះអាងថា ដំណើរការលក់ដូររបស់ពួកគេលក់មិនសូវដាច់។
លោក ជឿន សុភា អាជីវករម្នាក់ ចំណោមអ្នកតវ៉ាបានថ្លែងឲ្យដឹងតាមទូរស័ព្ទថ្ងៃនេះថា ដោយសារតែការលក់ដូរមិនសូវដាច់ ក្រោយពីផ្សារនេះត្រូវបានដាក់ឲ្យអាជីវករប្រកបរបរលក់ដូរកាលពីឆ្នាំ២០១០កន្លងមក អ្នកលក់មានការត្អូញត្អែរអំពីតម្លៃជួលតូបក៏ព្រោះតែមិនសូវមានភ្ញៀវ និងមិនអាចទ្រំាទ្រការបង់ឈ្នួលតូបប្រចាំឆ្នាំបាន។
លោកបានបន្តថា កន្លងមកតូបនៅក្នុងផ្សារអប្សរាផ្នែកខាងក្នុងត្រូវបានបញ្ចុះតម្លៃ ចំនួន១៥ភាគរយ និងតូបខាងក្រៅចំនួន ៥ភាគរយដែលតម្លៃជួលតូបក្នុង១ឆ្នាំ ថ្លៃ ៩៩០ដុល្លារ។ ប៉ុន្ដែដោយសារតែអាជីវករលក់ដូរមិនសូវដាច់ក៏ទាមទារបន្ថែមសុំឱ្យបញ្ចុះ ចំនួន៣០ភាគរយ និងស្នើឲ្យមានការបង់ជាពីរដំណាក់កាលក្នុងមួយឆ្នាំ ប៉ុន្តែត្រូវបានអ្នកគ្រប់គ្រងផ្សារបដិសេធ។
លោកបានបញ្ជាក់ថា៖« ការតវ៉ារបស់ពួកយើងចង់ឲ្យ អ្នកគ្រប់គ្រងផ្សារ មានការយោគយល់បញ្ចុះតម្លៃជួលតូបដល់អាជីវកអ្នកលក់ដូរ ដោយសារតែផ្សារនៅមិនទាន់ដំណើរបានល្អនៅឡើយ»។
សូមរង់ចាំអានព័ត៌មានពិស្តារក្នុងកាសែតភ្នំពេញ ប៉ុស្តិ៍
