ភ្នំពេញ ប៉ុស្តិ៍
ក្រុងបាងកកៈ ប្រទេសថៃ កំពុងប្រឈមនឹងការបាត់បង់តំណែងរបស់ខ្លួនក្នុងនាមជាមជ្ឈមណ្ឌលផលិតគ្រឿងអគ្គិសនី និងអេឡិចត្រូនិកនៅក្នុងសហគមអាស៊ាន ព្រមទាំង ប្រឈមនឹងការបាត់បង់ការងារពាក់កណ្តាលនៅក្នុងវិស័យនេះ ពោលគឺប្រហែល ១០ម៉ឺនកន្លែងនៅក្នុងរយៈពេល ៣ឆ្នាំខាងមុខ បើប្រទេសនេះ មិនលើកកម្ពស់កម្មករជំនាញរបស់ខ្លួនទេនោះ។
លោក Sampan Silapanad ប្រធានសមាគមក្រុមហ៊ុនផលិតគ្រឿងអេឡិចត្រូនិក និងកុំព្យូទ័រ បានឲ្យដឹងថា ប្រទេសថៃ បានបាត់បង់ភាពប្រកួតប្រជែងរបស់ខ្លួនក្នុងវិស័យធនធានមនុស្សដែលមានជំនាញ។ ជាងនេះទៀត ការដំឡើងប្រាក់ឈ្នួលអប្បបរមាដល់ចំនួន ៣០០បាតក្នុងមួយថ្ងៃកាលពីខែមេសា បានធ្វើឲ្យប្រាក់ឈ្នួលនៅប្រទេសថៃ មិនអាចប្រកួតប្រជែងជាមួយនឹងប្រទេសម៉ាឡេស៊ីបាន។
លោក បានថ្លែងនៅក្នុងវេទិកាមួយស្តីពីសហគមន៍សេដ្ឋកិច្ចអាស៊ាន (AEC) ដែលសហការរៀបចំដោយសមាគមគ្រប់គ្រងថៃ (TMA) កាលពីថ្ងៃចន្ទថា៖ «ប្រទេសថៃ បានជាប់គាំងនៅក្នុងចន្លោះផលិតកម្មរវាងផលិតកម្មតម្លៃទាប និងផលិតកម្មតម្លៃខ្ពស់ ដោយពុំមានលទ្ធភាពឈានឡើងទៅកាន់ខ្សែសង្វាក់ផលិតកម្មដែលមានតម្លៃខ្ពស់ និងមិនអាចថយក្រោយទៅរកផលិតកម្មមានតម្លៃទាប»។
