ភ្នំពេញ ប៉ុស្តិ៍
ក្រុងបាងកកៈ ក្រុមហ៊ុនប្រេងដ៏ធំរបស់ប្រទេសថៃ PTT បានជំរុញឲ្យរដ្ឋាភិបាលបង្កើនការទិញប្រេងរបស់ខ្លួនសម្រាប់ជាប្រេងបម្រុងយុទ្ធសាស្រ្តរបស់ថៃ ខណៈតម្លៃប្រេងនាពេលបច្ចុប្បន្នទាបជាង ១០០ដុល្លារក្នុងមួយធុង អាចនឹងឡើងថ្លៃដល់ ១២០ដុល្លារវិញ នៅពេលដែលសេដ្ឋកិច្ចអឺរ៉ុបដែលកំពុងអន់ថយ ស្ទុះងើបឡើងវិញនោះ។
លោក Pailin Chuchottaworn អគ្គនាយកក្រុមហ៊ុន PTT បានឲ្យដឹងថា៖ «ការទិញប្រេងស្តុក គួរតែធ្វើបន្តិចម្តងៗ ដើម្បីការពារការចំណាយច្រើន តែការទិញប្រេងទុកនេះ ក៏ត្រូវចាប់ផ្តើមធ្វើឲ្យបានឆាប់រហ័សផងដែរ»។
កាលពីថ្ងៃសុក្រសប្តាហ៍មុន រដ្ឋាភិបាលថៃ បានព្រមព្រៀងជាគោលការណ៍បង្កើនស្តុកប្រេង យុទ្ធសាស្ត្ររបស់ជាតិ ពោលគឺបង្កើនស្តុកសម្រាប់ប្រើប្រាស់រហូតដល់ ៩០ថ្ងៃ ពី ៦០ថ្ងៃនាពេលបច្ចុប្បន្ន។ នេះគឺជាវិធានការមួយ ដែលត្រូវចំណាយថវិកាវិនិយោគអស់ ២០០ពាន់លានបាត (ជាង ៦,៣ពាន់លានដុល្លារ)។
