ភ្នំពេញ ប៉ុស្តិ៍
ក្រុងវ៉ាស៊ីនតោនៈ វិបត្តិបំណុលនៅតំបន់អឺរ៉ុប បានបង្កើនហានិភ័យចំពោះប្រទេសដែលមានសេដ្ឋកិច្ចលូតលាស់ខ្លាំងរាប់ចាប់ពីប្រទេសថៃ រហូតដល់ប្រទេសទួរគី ដែលក៏កំពុងប្រឈមនឹងបញ្ហក្នុងស្រុកផងដែរនោះ។ នេះបើយោងតាមធនាគារពិភពលោក (WB) ដែលបានទម្លាក់ការព្យាករពីកំណើនសេដ្ឋកិច្ចប្រចាំឆ្នាំ២០១៣ របស់ខ្លួនមកនៅត្រឹម ៣ភាគរយ។
ធនាគារដែលមានមូលដ្ឋាននៅទីក្រុងវ៉ាស៊ីនតោននេះ ព្យាករថា កំណើនសេដ្ឋកិច្ចពិភពលោក នឹងកើនឡើង ២,៥ភាគរយនៅឆ្នាំនេះ ពោលគឺដូចគ្នាទៅនឹងការព្យាករកាលពីខែមករា បន្ទាប់ពីកំណើនសេដ្ឋកិច្ចនៅដើមឆ្នាំនេះ ត្រូវបានធ្លាក់ចុះដោយសារការប្រែប្រួលជាថ្មីនៅទីផ្សារជុំវិញបញ្ហាប្រទេសក្រិក និងអេស្ប៉ាញ។ ការព្យាករពីកំណើនសេដ្ឋកិច្ចនៅឆ្នាំក្រោយ មានកម្រិតទាបជាងការព្យាករកាលពីខែមករា ០,១ភាគរយ។
ធនាគារពិភពលោក បានឲ្យដឹងនៅក្នុងរបាយការណ៍ដែលចេញផ្សាយពីរដងក្នុងមួយឆ្នាំរបស់ខ្លួនថា៖ «នៅក្នុងរយៈពេលដ៏ខ្លីខាងមុខនេះ ភាពតានតឹងដែលកើតចេញពីតំបន់ប្រើប្រាស់ប្រាក់អឺរ៉ូ គឺជាហានិភ័យដ៏ធ្ងន់ធ្ងរបំផុតចំពោះប្រទេសកំពុងអភិវឌ្ឍន៍។ នៅតំបន់ប្រើប្រាស់ប្រាក់អឺរ៉ូ ដែលមានសមាជិកចំនួន ១៧ប្រទេស ទិន្នផលនៃមូលបត្របំណុលរបស់ប្រទេសមួយចំនួន បានកើនឡើងដល់កម្រិតខ្ពស់ ដែលកន្លងមក កំណើននេះបានពាក់ព័ន្ធនឹងកញ្ចប់ថវិកាសង្គ្រោះរបស់អន្តរជាតិ»។
