ភ្នំពេញ ប៉ុស្តិ៍
ការសម្រេចចិត្តរបស់មនុស្សម្នាក់ៗ តែងតែមានហេតុផលផ្សេងៗពីគ្នា ជាពិសេសគឺការសម្រេចចិត្តក្នុងការជ្រើសរើសយកអ្នកណាម្នាក់មក ធ្វើជាគូជីវិត និងអាចរស់នៅជាមួយគ្នារហូតដល់ចាស់ព្រឹទ្ធចាស់ព្រេង។ ដោយឡែកអ្នកគ្រូនៅវិទ្យាល័យបាក់ទូកម្នាក់ឈ្មោះ ជា គឹមអៀង បានតាំងចិត្តយ៉ាងមុតមាំតាំងពីកុមារភាពថា អ្នកគ្រូនឹងមិនយកស្វាមីទេ ពីព្រោះអ្នកគ្រូមើលឃើញនូវគុណវិបត្តិជាច្រើនអំពីជីវិតគូស្រករ និងផ្ដោតតែពីការសិក្សាប៉ុណ្ណោះ។ និយាយបណ្តើរ សម្រាកបណ្តើរ ស្រ្ដីវ័យជិត៦០ឆ្នាំរូបនេះ បានរៀបរាប់ថា៖ «ខ្ញុំមើលឃើញអ្នកខ្លះ ក្រោយពេលរៀបការរួច រស់នៅជាមួយគ្នារកាំរកូសយ៉ាងខ្លាំង ហើយបានឮស្រ្ដីមួយចំនួនទៀតត្អូញត្អែរថា បើអត់ពីប្តីទៅមិនដឹងជាទៅពឹងអ្នកណា»។ បញ្ហានេះ កាន់តែជំរុញទឹកចិត្ដស្រ្ដីចំណាស់នេះ ខ្លាចរអានឹងគូជីវិតថែមទៀត។
យ៉ាងណាមិញ អ្នកគ្រូ គឹមអៀង បានអះអាងទៀតថា បើទោះជាអ្នកគ្រូរងការរិះគន់ខ្លះក្ដី ក៏អ្នកគ្រូជាមនុស្សដែលមានសមត្ថភាពក្នុងការចិញ្ចឹមជីវិតរបស់ ខ្លួនយ៉ាងសប្បាយរីករាយរហូតមកដល់សព្វថ្ងៃដែរ។ អ្នកគ្រូ បានរំឭករឿងពីអតីតកាលថា៖ «អ្នកខ្លះបាននិយាយចំៗ ដោយគិតថា ខ្ញុំគ្មានអ្នកស្តីដណ្តឹង ឬធ្លាប់មានប្រវត្ដិមិនល្អរឿងសេ្នហា ប៉ុន្តែពួកគេមិនស្គាល់ខ្ញុំច្បាស់នោះទេ»។ ទោះជាយ៉ាងនេះក្តី អ្នកគ្រូមិនខ្វល់ពីសម្តីរបស់អ្នកដទៃឡើយ ដោយអ្នកគ្រូបន្តរស់នៅលីវរហូតដល់បច្ចុប្បន្ន។ ដោយមានអាយុកាន់តែជ្រេ និងសុខភាពមិនសូវល្អទៀតនោះ អ្នកគ្រូក៏ជួបផលវិបាកដូចអ្នកដទៃដែរ នោះគឺជំងឺ និងរោគចាស់ជរា ប៉ុន្តែវាខុសត្រង់ថា អ្នកគ្រូមិនមានកូនចៅនៅមើលថែ ដែលមានត្រឹមតែបងស្រីម្នាក់តែប៉ុណ្ណោះ។
អ្នកគ្រូជា មិនរួញរាក្នុងជីវិត ឬក៏មានពាក្យថាស្តាយក្រោយឡើយ។ អ្នកគ្រូសង្ឃឹមថា ក្រោយពេលចូលនិវត្តន៍ទៅ គាត់នឹងមានពេលទំនេរសម្រាប់ថែរក្សាសុខភាព និងទៅវត្ត ស្វែងយល់អំពីធម៌៕
