ភ្នំពេញ ប៉ុស្តិ៍
ភ្នំពេញៈ ក្រុមហ៊ុនឈានមុខគេផ្នែកស្ថាបត្យកម្មក្នុងប្លុកប្រទេស អឺរ៉ុបខាងជើងបានចុះហត្ថលេខាជាមួយក្រុមហ៊ុនស្ថាបត្យកម្មដែលមាន មូលដ្ឋាននៅរាជធានីភ្នំពេញដើម្បីពង្រឹងវត្តមានរបស់ខ្លួននៅ ក្នុងប្រទេសនេះ។
Tengbom គឺជាក្រុមហ៊ុនដ៏ធំនិងទទួលជោគជ័យបំផុតនៅលើពិភពលោកផ្នែក ស្ថាបត្យកម្ម និងនគរូបនីយកម្ម បានកំណត់យកប្រទេសកម្ពុជាជាគោលដៅចម្បងដើម្បីដោតទង់របស់ ក្រុមហ៊ុន និងពង្រីកការរកស៊ីចូលប្រទេសមួយនេះ និងនៅក្នុងតំបន់នេះ។
ក្រុមហ៊ុននេះបានចុះហត្ថលេខាសហការជាមួយក្រុមហ៊ុន Room Design Studio នៅភ្នំពេញដែលបង្កើតឡើងក្រុមស្ថាបត្យករជនជាតិស៊ុយអែតមួយក្រុម និងបានចាប់ផ្តើមអាជីវកម្មចាប់តាំងពីឆ្នាំ ២០០៨ មកដោយបានផ្តល់ការងារដល់មនុស្សប្រមាណ១៥នាក់ផ្នែកស្ថាបត្យកម្ម និងរចនាតុបតែងលម្អផ្នែកខាងក្នុង។
លោក Bernard Wouters ប្រធានក្រុមហ៊ុន The Room Design បានថ្លែងថា លោករំភើបចំពោះការចងសម្ព័ន្ធភាពនេះ។ លោកបានថ្លែងថា៖«បច្ចុប្បន្ននេះ ក្នុងនាមជាក្រុមហ៊ុនតូចមួយវាមិនមែនជាការងាយស្រួលប៉ុន្មានទេ ក្នុងការផ្តល់ទំនុកចិត្តទៅដល់អតិថិជនរបស់យើង។ ជានិច្ចកាល គម្រោងមួយអាចតម្រូវឲ្យមានការដាក់ទុនច្រើន ហើយអតិថិជនចង់ធានាថា យើងអាចទទួលគម្រោង និងទទួលបានជោគជ័យដូចក្រុមហ៊ុនធំៗផ្សេងៗទៀត»។
លោក Wouters បានបន្តថា៖«ដោយសារក្រុមហ៊ុន Tengbom ជាក្រុមហ៊ុនធំ ដែលមានបុគ្គលិកជាង៥០០នាក់ ដែលតាមខ្ញុំគិតថាជាក្រុមហ៊ុនលំដាប់ថ្នាក់លេខ ២៨ នៅលើពិភពលោក និងជាក្រុមហ៊ុនមួយដែលគេមានទំនុកចិត្តជាខ្លាំង។ ភ្នាក់ងាររបស់ក្រុមហ៊ុនមានសមត្ថភាពទាក់ទាញអតិថិជនធំៗ ពីព្រោះពួកគេដឹងថា នេះជាក្រុមហ៊ុនមួយដ៏ល្អបំផុត និងមានហានិភ័យទាប»។
ក្រុមហ៊ុន Tengbom បានហក់ចូលមករកស៊ីនៅទ្វីបអាស៊ីជាច្រើនឆ្នាំមកហើយ ប៉ុន្តែនៅពេលនេះក្រុមហ៊ុនកំពុងមានបំណងបង្កើនឥទ្ធិពលរបស់ ខ្លួននៅកម្ពុជាបន្ថែមទៀត។ កាលពីឆ្នាំ២០១១ ក្រុមហ៊ុនទទួលបានរង្វាន់ស្ថាបត្យកម្មដ៏មានកិត្យានុភាពបំផុតលើ ពិភពលោកមួយគឺពានរង្វាន់គម្រោងអនាគត MIPIM សម្រាប់គម្រោងនគរូបនីយកម្មរបស់ក្រុមហ៊ុនប្រកបដោយចីរភាពនៅ ក្រុងទីហ៊្វូស៊ីដែលស្ថិតនៅខាងក្រៅក្រុងស៊ាងហៃ ប្រទេសចិន។
លោក Wouters បានថ្លែងថាមានមូលហេតុជាច្រើនដែលក្រុមហ៊ុន Tengbom ជ្រើសរើសកម្ពុជាដើម្បីកសាងកេរ្តិ៍ឈ្មោះរបស់ខ្លួន។ លោកបានគូសបញ្ជាក់ថា៖«ទី ១ ពួកគេពិតណាស់ចង់ពង្រីកចូលក្នុងទីផ្សារអាស៊ី ហើយឈានជើងចូលផ្ទាល់ទៅក្នុងទីផ្សារនោះ»។
ប្រធានក្រុមហ៊ុនរូបនេះក៏បានច្រានចោលគំនិតដែលអះអាងថា ក្រុមហ៊ុន Tengbom បានចូលមកកម្ពុជាដោយសារតែកម្រៃសេវាកម្មនៅថោកចំពោះការរកស៊ីនៅ ក្នុងប្រទេសនេះ។ លោកបានបន្តថា៖«វាមិនត្រឹមត្រូវទេដែលគេអះអាងថា យើងបានផ្តល់នូវកម្លាំងពលកម្មក្នុងតម្លៃថោកតែយើងបាននាំស្ថាបត្យ ករក្រុមហ៊ុន Tengbom មកកាន់ទីនេះ និងនាំមកនូវវប្បធម៌ថ្មីដែលជាតម្លៃបន្ថែម និងជាចំណុចសម្រាប់ការរៀនសូត្រទាំងសម្រាប់ជនជាតិស៊ុយអែតដែលមក ទីនេះ ហើយយើងសង្ឃឹមថា សម្រាប់ពលរដ្ឋខ្មែរដែលទៅប្រទេសស៊ុយអែត អាចបង្កើតឲ្យមាននូវទំនាក់ទំនងទូលំទូលាយជាងមុនរវាងស្ថាបត្យកម្ម បែបស៊ុយអែត និងបែបខ្មែរ»។
លោក Wouters បានបន្តថា វាអាចជាឧបសគ្គមួយក្នុងការធ្វើការនៅកម្ពុជា។ លោកគូសបញ្ជាក់ថា វាតម្រូវឲ្យមានជំនាញ និងចំណេះដឹងច្រើនពីរបៀបដែលទីផ្សារក្នុងស្រុកដំណើរការ វាមានរបត់ដែលលោកត្រូវតែរៀនសូត្រនៅទីនេះ ហើយវាមានដែនកំណត់មួយចំនួនលើអ្វីដែលលោកអាចធ្វើបាន។
លោក Viking មកពីក្រុមហ៊ុន Tengbom បានថ្លែងថា ក្រុមហ៊ុននឹងផ្តោតការយកចិត្តទុកដាក់លើប្រទេសកម្ពុជាសម្រាប់ ថ្ងៃអនាគតដ៏ខ្លីខាងមុខ។ លោកគូសបញ្ជាក់ថា៖«យើងត្រូវការពេលវេលារួបរួមគ្នា ហើយគម្រោងជាមួយក្រុមហ៊ុន The Room Design នេះជាការផ្តោតយកចិត្តទុកដាក់ដ៏ខ្លាំងរបស់យើងនាពេលបច្ចុប្បន្ន ដែលគួរឲ្យចាប់អារម្មណ៍ខ្លាំង ហើយអ្នកគ្រប់គ្នាមានការរំភើបយ៉ាងខ្លាំងចំពោះគម្រោងនេះ។ កម្ពុជាជាប្រទេសដ៏អស្ចារ្យដែលមានមនុស្សពិសេសៗ ហើយមកដល់ពេលនេះ អ្វីគ្រប់យ៉ាងគឺវាសមដូចការរំពឹងទុករបស់ខ្ញុំទាំងអស់។ ខ្ញុំមានអារម្មណ៍សុទិដ្ឋិនិយមយ៉ាងខ្លាំងជាមួយនឹងគម្រោងមួយ នេះ»៕ CR