ភ្នំពេញ ប៉ុស្តិ៍
ភ្នំពេញៈ ពេល មាស សុខសោភា ឡើងយន្តហោះទៅច្រៀងនៅប្រទេសអូស្រ្តាលីផុតនោះ ឱក សុគន្ធកញ្ញា ក៏ទទួលបានឱកាសឡើងជាន់ឆាកតន្រ្តីធំថ្នាក់ជាតិក្នុងកម្មវិធីតាំង ពិព័រណ៍គ្រឿងពេជ្រជំនួស ខណៈដែលកម្មវិធីនេះ នាងមាស សុខសោភា រមែងមានមុខឡើងច្រៀងជាកិត្តិយស៣ឆ្នាំជាប់គ្នានោះ។
កម្មវិធីតាំងពិព័រណ៍គ្រឿងពេជ្រធំថ្នាក់ជាតិ ដែលមួយឆ្នាំកំណត់ធ្វើម្តង រមែងមានមុខតារាចម្រៀងជើងខ្លាំងប្រចាំនៅផលិតកម្មថោននាង មាស សុខសោភា គ្រងតំណែងជាតារាកិត្តិយសរយៈ៣ឆ្នាំជាប់ៗគ្នា។ ដោយឡែកសម្រាប់ឆ្នាំទី៤នេះ តំណែងជាតារាកិត្តិយសតំណាងជាតិនេះក៏ត្រូវធ្លាក់ទៅលើតារា ចម្រៀងជើងខ្លាំងប្រចាំនៅផលិតកម្មរស្មីហង្សមាសនាង ឱក សុគន្ធកញ្ញា វិញម្តង។
ថ្វីដ្បិតនេះជាវត្តមានលើកទី១របស់តារាចម្រៀង ជើងខ្លាំងប្រចាំផលិតកម្មរស្មីហង្សមាស ឱក សុគន្ធកញ្ញា ក្នុងពិធីពិព័រណ៍គ្រឿងអលង្ការពេជ្រ និងត្បូង តែតារារូបនេះបានទទួលការគាំទ្រយ៉ាងខ្លាំង នោះមិនត្រឹមតែលើការបកស្រាយបទចម្រៀងតែមួយផ្នែកនោះទេ តែក៏ផ្អែកលើការស្លៀកពាក់របស់នាងផងដែរ ខណៈដែលនាងបានឡើងច្រៀងស្លៀករ៉ូបមួយឈុតឆែកដល់គល់ភ្លៅលម្អ ទៅដោយគ្រឿងអលង្ការពេជ្រ។
ដោយកំដរអារម្មណ៍ទស្សនិកជនជាមួយបទមនោសញ្ចេតនាចំនួន៣បទ ដែលក្នុងនោះមានបទ«សន្យាមុនគេង» «គេល្អគ្រប់យ៉ាង តែគេមិនមែនបង» និងបទ «នៅក្បែរអូនជាសង្សារអូន» សុគុន្ធកញ្ញា បាននិយាយថា៖«ខ្ញុំមិនបានលើកយកបទញាក់មកច្រៀងទេ ដោយសារតែនោះជាវេទិកាថ្នាក់ជាតិ ដែលមានការចូលរួមពីមន្ត្រីថ្នាក់ធំៗ មកពីក្រសួង មន្ទីរ និងតំណាងមកពីបណ្ដាប្រទេសនានា»។
ជាមួយសំឡេងហ៊ោគាំទ្រយ៉ាងទ្រហឹងអឺងកងនោះ ឱក សុគន្ធកញ្ញា បានបន្តនិយាយថា៖ «ខ្ញុំសប្បាយចិត្តដែលបានឡើងច្រៀងក្នុងវេទិកាដ៏ធំនេះ ហើយអ្វីដែលខ្ញុំរំភើបបំផុត គឺបានពាក់ពេជ្រមួយឈុត ដែលមានតម្លៃដល់រាប់ម៉ឺន ដុល្លារក្នុងពេលឡើងឆាក»។
ដោយបាត់មុខមាស សុខសោភា អ្នកទស្សនានោះក៏បានលើកឡើងថា៖«ឆ្នាំនេះ កញ្ញា កំពុងវាយគ្របលើគូប្រជែងយ៉ាងខ្លាំង ខណៈនាង មាស សុខសោភា ដែលរមែងមានមុខឡើងច្រៀងក្នុងវេទិកាដ៏ធំនេះ ជាប់ដៃច្រៀងនៅប្រទេសអូស្រ្តាលីនោះ។ នេះកាន់តែធ្វើឲ្យឱក សុគន្ធកញ្ញា លេចធ្លោថែមមួយកម្រិតទៀត»។
ការលេចវត្តមានជាលើកទី១របស់ សុគន្ធកញ្ញា លើឆាកអលង្ការពេជ្រនេះ នាងមិនត្រឹមតែជាតារាចម្រៀងកិត្តិយសទេ តែនាងក៏ជាតារាម៉ូដែលបង្ហាញម៉ូដអលង្ការពេជ្រម្នាក់ដែរ៕
