ភ្នំពេញ ប៉ុស្តិ៍
សុខភាព និង ការងារ សុទ្ធតែជារឿងសំខាន់ដើម្បីឲ្យមនុស្សទទួលបានភាពជោគជ័យក្នុង ជីវិត។ បើសិនជាសុខភាពមិនល្អ លទ្ធផលនៃការសិក្សា និងការងារក៏ធ្លាក់ចុះទៅតាមនោះដែរ។ ដូច្នេះហើយ វាជារឿងចាំបាច់បំផុតក្នុងនាមជាយុវវ័យដែលកំពុងតែមមាញឹកចំពោះការ សិក្សា និងការងារ ឲ្យចេះលៃលកចំពោះពេលវេលាចំពោះកត្តាទាំង២ និងថែទាំសុខភាពឲ្យដើរទន្ទឹមគ្នា និងដើម្បីចៀសវាងជំងឺដែលអាចជួបប្រទះនាពេលខាងមុខ។ ដោយបច្ចុប្បន្ននេះ អ្នកដែលសិក្សា និងធ្វើការងារគ្មានពេលម៉ោងកំណត់ច្បាស់លាស់ ប្រឈមមុខនឹងជំងឺមួយចំនួន។
បើយោងទៅតាម លោក ដួង តារារិទ្ធ ជាអតីតវេជ្ជបណ្ឌិតនៃមន្ទីរពេទ្យមិត្តភាពសូវៀត និងបច្ចុប្បន្នជាសាស្ត្រាចារ្យនៃសាកលវិទ្យាល័យវិទ្យាសាស្រ្ត សុខាភិបាល បានពន្យល់ថា នាពេលបច្ចុប្បន្នលោកសង្កេតឃើញថា ជំងឺដាច់សរសៃឈាមក្នុងខួរក្បាលកំពុងតែមានការកើនឡើងក្នុង ប្រទេសកម្ពុជា ដែលបញ្ហានោះកើតមានឡើងបណ្តាលមកពីបញ្ហាគួបផ្សំដូចជាការតស៊ូ នឹងការងារច្រើនដោយមិនមានពេលសម្រាកគ្រប់គ្រាន់ បញ្ហាស្រេ្តសនៃការងារ ឬក៏គ្រួសារ និងបញ្ហាលើសឈាមដែលវាស្តែងឡើងតាមរយៈជីវភាពក្រីក្រ ហូបចុកមិនសមស្រប ដូចជាការបរិភោគអាហារដែលមានជាតិខ្លាញ់ច្រើនជាដើម។
លោក តារារិទ្ធ បញ្ជាក់ទៀតថា៖ «ក្នុងនោះការអង្គុយធ្វើការច្រើននៅក្នុងការិយាល័យ ក៏ជាហេតុចម្បងដែលនាំឲ្យកើតបញ្ហាឈឺក្រពះផងដែរ»។
ចំណែកឯលោក កែវ ច័ន្ទសុធា វ័យ៣១ឆ្នាំ ជាបុគ្គលិកនៃក្រុមហ៊ុន Cellcard បាននិយាយពីបទពិសោធដែលលោកធ្លាប់ជួបប្រទះនៅពេលដែលលោកខិត ខំធ្វើការងារច្រើនម៉ោងថា លោកតែងតែមានអារម្មណ៍ស្ដ្រេស និងឈឺក្បាល។ លោកបន្តថា លោកធ្លាប់កើតជំងឺក្រពះកាលពីនៅសិក្សា ពីព្រោះលោកខិតខំរៀនពេលយប់ពេក និងបរិភោគមិនទៀងពេលវេលា តែមកទល់ពេលនេះ លោកពុំសូវជួបប្រទះបញ្ហាផ្នែកសុខភាពនោះទេ។
លោក សុធា បានប្រាប់ឲ្យដឹងថា៖ «នៅពេលដែលខ្ញុំធ្វើការងារច្រើនពេក និងមិនអាចបញ្ចប់ទាន់ពេលវេលា ខ្ញុំតែងតែមានអារម្មណ៍មួម៉ៅ។ បើធ្វើការដល់យប់ជ្រៅ វាបានធ្វើឲ្យខ្ញុំកើតស្ដ្រេស និងអត់ស្រឡះក្នុងខ្លួនទេ»។
យ៉ាងណាមិញ ការខិតខំប្រឹងប្រែងធ្វើការហួសហេតុដោយមិនបានគិតដល់សុខភាព វាមិនត្រឹមតែអាចជះឥទ្ធិពលដល់បញ្ហាផ្លូវកាយប៉ុណ្ណោះទេ ប៉ុន្តែបញ្ហាផ្លូវចិត្តក៏អាចទទួលរងផលប៉ះពាល់អវិជ្ជមានផងដែរ។
ជាក់ស្តែង លោក ខាន់ សារ៉េត ជាសាស្រ្ដាចារ្យឯកទេសចិត្តវិទ្យាគ្លីនិក និងទីប្រឹក្សាផ្លូវចិត្តនៃសាកលវិទ្យាល័យភូមិន្ទភ្នំពេញ បាននិយាយថា កាលដែលមនុស្សធ្វើការងារច្រើន នោះទំនួលខុសត្រូវក៏ច្រើន វាជាហេតុធ្វើឲ្យពួកគេមានភាពតានតឹងក្នុងចិត្តធ្ងន់ធ្ងរជាង អ្វីៗទាំងអស់ ខណៈពេលដែលពួកគាត់គ្មានពេលវលាសម្រាក និងទទួលទានគ្រប់គ្រាន់ ពួកគេងាយប្រឈមនឹងបញ្ហាផ្លូវចិត្ត។
លោក សារ៉េត បានរៀបរាប់ពីរោគសញ្ញាត្រួសៗថា ជំងឺផ្លូវចិត្តអាចបង្ហាញឲ្យឃើញតាមរយៈមុខសញ្ញាមួយចំនួន ដូចជា មានអារម្មណ៍ឆេវឆាវ ឆាប់ខឹង មានបញ្ហាដំណេក សម្ពាធឈាមឡើងខ្ពស់ ឈឺក្បាល និងស្ដីបន្ទោសខ្លួនឯងជាដើម។
លោក សារ៉េត បានបកស្រាយថា៖ «ជំងឺផ្លូវចិត្ត មិនខុសជំងឺផ្លូវកាយទេ បើទុកយូរវាអាចនឹងធ្ងន់ធ្ងរដោយប្រែក្លាយទៅជាជំងឺរ៉ាំរ៉ៃ ហើយពេលខ្លះអាចឈានកើតជារោគធ្លាក់ទឹកចិត្ត និងសម្លាប់ខ្លួនទៀត។ ការចេះគ្រប់គ្រងពេលវេលា និងការពិចារណាបានល្អ គឺជាវិធីសាស្រ្តក្នុងការកាត់បន្ថយស្ដ្រេស ហើយបើយើងដឹងថាមានជំងឺទាក់ទងនឹងផ្លូវចិត្ត គួរតែទៅជួបអ្នកជំនាញជាបន្ទាន់»។
ទោះជាយ៉ាងនេះក្តី ក៏មានវិធីសាស្រ្តជាច្រើនដែលអាចឲ្យយើងគេចផុតពីបញ្ហាទាំងនោះ បាន តាមរយៈការបង្កើតកាលវិភាគប្រចាំខ្លួនដែលបែងចែកពេលវេលាធ្វើ ការ និងពេលវេលាលម្ហែកាយផ្ទាល់ខ្លួនជាដើម។ ដោយឡែក លោក សុធា ក៏បានប្រាប់ពីវិធីសាស្រ្តដែលលោកតែងតែធ្វើដើម្បីចៀសវាង បញ្ហាប៉ះពាល់ដល់សុខភាពថា លោកត្រូវតែកំណត់ពេលវេលាធ្វើការងារឲ្យបានច្បាស់ ថាតើលោកអាចស៊ូបានប៉ុន្មានម៉ោង? ហើយរាល់ពេលដែលលោកបញ្ចប់ការងារ តើលោកត្រូវការពេលវេលាសម្រាកប៉ុន្មានម៉ោង? បើមិនដូច្នោះទេ លោកត្រូវតែឆ្លៀតពេលហាត់ប្រាណ។
លោក សុធា បានប្រាប់ពីបទពិសោធរបស់ខ្លួនទៀតថា៖ «ការស្តាប់ចម្រៀងនៅពេលដែលនឿយហត់ គឺគ្មានប្រសិទ្ធភាពទេចំពោះខ្ញុំ ប៉ុន្ដែខ្ញុំចូលចិត្តនិយាយលេងសើចច្រើនជាមួយអ្នកដទៃ និងមិនព្យាយាមគិតខ្លាំងពេក»។
រីឯកញ្ញា ម៉ី ចាន់ធី ជាមន្រ្តីផ្នែកគ្រប់គ្រងធនធានមនុស្ស នៃសណ្ឋាគារ Hotel de la Paix បាននិយាយប្រាប់ពីទ្រឹស្តី៣យ៉ាងរបស់ខ្លួនក្នុងការថែរក្សា សុខភាពថា ដំបូងគឺផ្ដើមចេញពីខ្លួនឯងផ្ទាល់ ទី២ កត្តាផ្លូវចិត្ត ដូចជាអារម្មណ៍ស្ដ្រេស ឬការមិនសប្បាយចិត្ត និង ចុងក្រោយ របបអាហារ និងការកម្សាន្ត។ កញ្ញាបានបន្តថា ទោះបីជាកញ្ញាមានទ្រឹស្តីប្រចាំខ្លួនយ៉ាងនេះក៏ដោយ ក៏កញ្ញាទទួលស្គាល់ថា គ្មាននរណាអាចអនុវត្ដតាមទ្រឹស្ដីបាន១០០ភាគរយនោះទេ។
ថ្វីដ្បិតតែការងាររវល់យ៉ាងណាក៏ដោយ ក៏កញ្ញា ចាន់ធី មិនធ្វេសប្រហែសចំពោះសុខភាពនោះទេ។ កញ្ញា បាននិយាយថា៖ «តុល្យភាពរវាងការងារ និងពេលវេលាសម្រាក ជាសេចក្តីត្រូវការដ៏ចាំបាច់របស់មនុស្សគ្រប់រូប ហើយបើសិនជាជីវិតមិនមានតុល្យភាពនោះទេ យើងនឹងជួបវិបត្តិស្មុគស្មាញជាច្រើន ដូចជា ការខាតបង់ថវិកា បញ្ហាសុខភាពទាំងផ្លូវកាយ និងផ្លូវចិត្ដ ព្រមទាំងការបែកបាក់ទំនាក់ទំនងមិត្តភាពជាដើម»៕
