ភ្នំពេញ ប៉ុស្តិ៍
ក្រុងឡូសកាបូសៈ លោក Stephen Harper នាយករដ្ឋមន្ត្រីកាណាដា បានប្រកាសកាលពីថ្ងៃអង្គារថា កាណាដា នឹងចូលរួមពិភាក្សាជាមួយប្រទេសចំនួន ១០ផ្សេងទៀត ក្នុងគោលបំណងបង្កើតកិច្ចព្រមព្រៀងពាណិជ្ជកម្មស៊េរីអាស៊ីប៉ាស៊ីហ្វិក ក្នុងគោលបំណងកាត់បន្ថយការពឹងផ្អែកលើទីផ្សារអាមេរិក និងគាំទ្រដល់ប្រទេសដែលមានសេដ្ឋកិច្ចរីកចម្រើនខ្លាំង។
កិច្ចព្រមព្រៀងភាពជាដៃគូអន្តរប៉ាស៊ីហ្វិក (TPP) មានគោលបំណងបង្កើតតំបន់ពាណិជ្ជកម្មសេរីមួយជាមួយនឹងតំបន់ដែលមានប្រជាជនចម្រុះចំនួន ៦៥៨លាននាក់ និងមានផលិតផលក្នុងស្រុកសរុបច្រើនជាង ២០ពាន់ពាន់លានដុល្លារកាណាដា (១៩,៦៥ពាន់ពាន់លានដុល្លារអាមេរិក)។
លោក Harper បានប្រាប់មកក្រុមអ្នកយកព័ត៌មាននៅខាងក្រៅកិច្ចប្រជុំកំពូល G-20 ដែលបានរៀបចំឡើងនៅរមណីយដ្ឋានមាត់សមុទ្រម៉ិកស៊ិកនៃទីក្រុង Los Cabos ថា៖ «នេះគឺជាគំរូបន្ថែមមួយនៃការប្តេជ្ញាចិត្តរបស់យើង ដើម្បីធ្វើពិពិធកម្មការនាំចេញទំនិញរបស់យើង និងដើម្បីបង្កើតការងារ កំណើនសេដ្ឋកិច្ច និងភាពរីកចម្រើនរយៈពេលវែងរបស់គ្រួសារប្រជាពលរដ្ឋកាណាដា»។
