ភ្នំពេញ ប៉ុស្តិ៍
ភ្នំពេញៈ ក្រសួងរៀបចំដែនដី នគរូបនីយកម្ម និងសំណង់ នៅពេលនេះកំពុងរៀបចំអនុក្រឹត្យស្តីអំពីបទដ្ឋានដែលពាក់ព័ន្ធនឹង វិស័យសំណង់មួយចំនួនបន្ថែមទៀត ដើម្បីជាការឆ្លើយតបទៅនឹងកំណើនវិស័យសំណង់នាពេលបច្ចុប្បន្ន។
លោក ឡៅ ទិព្វសីហា អគ្គនាយករងនៃអគ្គនាយកដ្ឋានសំណង់ និងជាអគ្គលេខាធិការរងនៃគណៈស្ថាបត្យករកម្ពុជាបានប្រាប់ឲ្យដឹងថា បច្ចុប្បន្នក្រសួងកំពុងមមាញឹកយ៉ាងខ្លាំងក្នុងការរៀបចំច្បាប់ សំណង់ មានជាដូចជា ការកែសម្រួលអនុក្រឹត្យលេខ៨៦ ស្តីពីលិខិតអនុញ្ញាតសាងសង់ អនុក្រឹត្យស្តីពីការផាកពិន័យបទល្មើសសំណង់ អនុក្រឹត្យស្តីពីការជួសជុលសំណង់អគារ អនុក្រឹត្យស្តីពីនគរូបនីយកម្ម សំណង់ រាជធានី-ខេត្ត ក្រុង អនុក្រឹត្យស្តីពីការរៀបចំ ទឹកដី និងច្បាប់ផ្សេងៗជាច្រើនទៀតសម្រាប់ផែនការឆ្នាំ២០១២ និង២០១៣។
លោកអគ្គនាយករងនៃអគ្គនាយកដ្ឋានសំណង់រូបនេះបានថ្លែងថា៖«ខ្ញុំ គិតថា វិស័យសំណង់នៅកម្ពុជាពេលនេះកំពុងកើនឡើង ដូច្នេះត្រូវការមានច្បាប់សម្រាប់ធ្វើការគ្រប់គ្រង ហើយណាមួយវាជាតម្រូវការយ៉ាងទទូចពីអ្នកវិនិយោគទុន ដើម្បីឲ្យការសាងសង់របស់គេប្រកបដោយសុវត្ថិភាព គុណភាព សោភ័ណភាពនៃបរិស្ថានទីក្រុងល្អ សម្រាប់ការរស់នៅផង»។
លោកបានថ្លែងបន្តទៀតថា បើទោះបីជាច្បាប់នេះកំពុងរៀបចំយ៉ាងខ្លាំងក្លាក៏ដោយ ប៉ុន្តែយើងមិនដឹងច្បាស់ថាបញ្ចប់នៅពេលណានោះទេ គឺវាអាស្រ័យលើពេលវេលានៃការរៀបចំតែប៉ុណ្ណោះ។
លោក ច្រឹក សុខនីម អនុប្រធានក្រុមហ៊ុនអចលនទ្រព្យវីត្រាស់ បានឲ្យដឹងថា ការរៀបចំធ្វើច្បាប់នេះជារឿងល្អ សម្រាប់អ្នកវិនិយោគទាំងអស់ដើម្បីពង្រឹងគុណភាពសំណង់សម្រាប់ជាការ ឆ្លើយតបទៅនឹងការរីកចម្រើននៃវិស័យសំណង់អគារនៅកម្ពុជា។ លោកបន្តថា បើច្បាប់ទាំងអស់នេះបានអនុម័តហើយដាក់ឲ្យប្រើប្រាស់ជាផ្លូវការ នោះអ្នកវិនិយោគទាំងអស់នឹងមានទំនុកចិត្តលើការសាងសង់ដោយយកគុណ ភាពជាមូលដ្ឋាន។
លោកអនុប្រធានក្រុមហ៊ុនរូបនេះបានបញ្ជាក់ថា៖«ច្បាប់នេះហាក់បី ដូចជាកំពុងរឹតបន្តឹងដល់អ្នកវិនិយោគលើការសាងសង់ ប៉ុន្តែការពិតបែរជាវាផ្តល់អត្ថប្រយោជន៍ដល់ពួកគេទៅវិញទេក្នុង ការពង្រឹងការវិនិយោគឲ្យមានភាពច្បាស់លាស់អាចឲ្យពួកគេគេចផុត ពីហានិភ័យផ្សេងៗដែលបង្កឡើងពីសំណង់អគារគ្មានគុណភាព និងធ្វើឲ្យមានទំនុកចិត្តពីសាធារណជនទូទៅ ដោយសំណង់មានការត្រួតពិនិត្យត្រឹមត្រូវពីប្រព័ន្ធច្បាប់សំណង់ របស់រដ្ឋាភិបាលកម្ពុជា»។
លោកបន្ថែមថា ច្បាប់នេះមិនត្រឹមតែធ្វើឲ្យអ្នកវិនិយោគសប្បាយចិត្តទេ ប៉ុន្តែក៏ធ្វើឲ្យអ្នកវិនិយោគមួយចំនួនមានការបារម្ភពីការរៀបចំ ធ្វើច្បាប់នេះដែរ។
លោក អ៊ូច ពិសាល ជំនួយការក្រុមហ៊ុនអភិវឌ្ឍន៍លំនៅដ្ឋានបុរីវិមានភ្នំពេញបាន ថ្លែងថា ច្បាប់នីមួយៗគួរតែពិនិត្យឲ្យបានច្បាស់លាល់ ពិសេសស្ថាប័នពាក់ព័ន្ធមេត្តាពិនិត្យឲ្យបានហ្មត់ចត់ទៅតាមបច្ចេក ទេសឲ្យបានលឿនចៀសវាងធ្វើឲ្យការស្នើសុំរបស់ក្រុមហ៊ុនអភិវឌ្ឍន៍លំនៅដ្ឋានមានភាពយឺតយ៉ាវ ដែលអាចរាំងស្ទះដល់ការសាងសង់។
លោក ពិសាល បានបញ្ជាក់ថា៖«វាល្អនៅពេលច្បាប់នេះចាប់ផ្តើមអនុវត្តជាផ្លូវការ ប៉ុន្តែគ្រប់ស្ថាប័នទាំងអស់ដែលពាក់ព័ន្ធសូមជួយសហការពន្លឿន សកម្មភាពស្នើសុំរបស់វិនិយោគិនឲ្យបានលឿនកាន់តែល្អ»។ លោកបន្តថា បើលក្ខខណ្ឌនៅក្នុងច្បាប់មានភាពសមស្របគ្មានគំនាបដល់ក្រុមហ៊ុន សាងសង់ពោលគឺដើម្បីការពារ គាំទ្រ និងលើកទឹកចិត្តដល់អ្នកវិនិយោគនោះលោកក៏គ្មានអី្វបារម្ភទេ ហើយបែរជាសាទរទៅវិញ៕