ភ្នំពេញ ប៉ុស្តិ៍
- Prev
- 1 of 2
- Next
ក្រុងគៀវ: ក្រុមម្ចាស់ការពារតំណែងជើងឯកអេស្ប៉ាញ បានឈានទៅកាន់ការប្រកួតវគ្គពាក់កណ្តាលផ្តាច់ព្រ័ត្រនៃព្រឹត្តិការណ៍ Euro ឆ្នាំ២០១២ ក្រោយខ្សែបម្រើ Xabi Alonso បានស៊ុតបាល់បញ្ចូលទីចំនួនពីរគ្រាប់លើក្រុមជម្រើសជាតិបារាំងកាល ពីរាត្រីថ្ងៃសៅរ៍ នាការបង្ហាញខ្លួនជាលើកទី១០០ របស់គេ។
ជាមួយគ្នានេះកីឡាករ Cristiano Ronaldo និង Nani របស់ក្រុមបាល់ទាត់ជម្រើសជាតិព័រទុយហ្គាល់ នឹងធ្វើឲ្យអេស្ប៉ាញធ្វើការពិចារណាឲ្យបានច្រើនបន្ថែមទៀតជាងអ្វី ដែលពួកគេបានធ្វើជាមួយបារាំងនៅក្នុងការប្រកួតមួយដែលបាន បង្កើតនូវភាពរន្ធត់ ឬក៏រំភើបតិចតួចប៉ុណ្ណោះ បើទោះបីស្ថិតក្នុងចំណោមក្រុមខ្លាំងទាំងពីរនៃកីឡាបាល់ទាត់ ប្រចាំទ្វីបអឺរ៉ុបក៏ដោយ។
អេស្ប៉ាញ នឹងប្រកួតម្តងទៀតដោយគ្មានខ្សែប្រយុទ្ធច្បាស់លាស់ម្នាក់ ខណៈខ្សែប្រយុទ្ធ Fernando Torres បានលេងជាកីឡាករបម្រុង ហើយបច្ចេកទេស «បញ្ជូនបាល់ខ្លីៗ» ដោយការអត់ធ្មត់របស់ពួកគេនៅពេលនោះ បានធ្វើឲ្យក្រុមជម្រើសជាតិបារាំងទទួលបាននូវផលវិជ្ជមានតិច តួចប៉ុណ្ណោះ ក្នុងការបំបែកតំបន់ការពាររបស់ពួកគេ។
បន្ថែមពីនេះទៅទៀត អ្នកចាំទី Iker Casillas របស់អេស្ប៉ាញ បានធ្វើការព្យាយាមត្រឹមតែ១លើកប៉ុណ្ណោះដើម្បីសង្គ្រោះគ្រាប់ បាល់ស៊ុតសំដៅទី ខណៈដែលក្រុមម្ចាស់ជើងឯកពិភពលោកមួយនេះ បានឆ្លងផុតវគ្គខ្វែងនៅវគ្គមួយភាគបួនផ្តាច់ព្រ័ត្រជាលើកទី៨ ជាប់ៗគ្នាក្នុងយុទ្ធនាការដ៏សំខាន់មួយ ដោយគ្មានការបណ្តោយឲ្យមានគ្រាប់បាល់បញ្ចូលទីរបស់ខ្លួនណាមួយ ឡើយ។
លោក Laurent Blanc គ្រូបង្វឹករបស់ក្រុមជម្រើសជាតិបារាំង បាននិយាយថា៖ «វាពិតជាមានការលំបាកណាស់ក្នុងការបង្កើតការគ្រោះថ្នាក់សម្រាប់ ពួកគេ ដោយពួកគេគឺជាក្រុមពិបាកក្នុងការផ្តួល ហើយអ្នកពិតជាមានឱកាសតិចតួចប៉ុណ្ណោះ នៅពេលអ្នកមានឱកាសគ្រប់គ្រងបាល់ត្រឹមតែ៣០ទៅ៣៥ភាគរយ»។
ការទទួលជ័យជម្នះនេះ គឺជាលើកទីមួយហើយសម្រាប់ក្រុមជម្រើសជាតិអេស្ប៉ាញនៅក្នុងការ ប្រកួតដ៏សំខាន់មួយនៅពេលពួកគេបានជួបជាមួយក្រុមបារាំងក្នុង ចំណោមការជួបគ្នាចំនួន៧លើក និងព្រមទាំងបានធ្វើការសងសឹកចំពោះការបរាជ័យរបស់ពួកគេនៅក្នុង ជុំទី២នៃព្រឹត្តិការណ៍ World Cup ឆ្នាំ២០០៦។
Alonso បានជួយឲ្យអេស្ប៉ាញធ្វើការនាំមុខមុននៅក្នុងនាទី ទី១៩ជាមួយនឹងការតែតបាល់បញ្ចូលទីយ៉ាងខ្លាំង និងបានបំពេញនូវជ័យជម្នះយ៉ាងពិតប្រាកដសម្រាប់ក្រុមដោយការ ស៊ុតបាល់ប៉េណាល់ទីក្នុងនាទីបន្ថែម។
នៅក្នុងចន្លោះការប្រកួតទាំងពីរតង់ ក្រុមម្ចាស់ជើងឯកពិភពលោកមួយនេះ បានធ្វើការគ្រប់គ្រងបាល់យ៉ាងច្រើន និងជារឿយៗ ពួកគេធ្វើឲ្យក្រុមបារាំងមានការវាយបកវិញតិចតួចប៉ុណ្ណោះ។
លោក Vicente Del Bosque គ្រូបង្វឹករបស់ក្រុមអេស៉្បាញ បានមានប្រសាសន៍ថា៖ «យើងបានគ្រប់គ្រងការប្រកួតយ៉ាងល្អតាំងពីចាប់ផ្តើមប្រកួតរហូត បញ្ចប់ ហើយ Iker កម្រនឹងមានគ្រាប់បាល់ដើម្បីសង្គ្រោះឡើយ។ រឿងដ៏សំខាន់បំផុតនៅពេលនេះ គឺថា យើងត្រូវប្រមូលអារម្មណ៍ឡើងវិញសម្រាប់ការប្រកួតបន្ទាប់ទៀត»។
បារាំង បានធ្វើការបង្ហាញខ្លួននៅក្នុងយុទ្ធនាការនេះ បន្ទាប់ពីពួកគេបានដោះស្រាយរួចជាស្រេចជាមួយនឹងជម្លោះផ្ទៃ ក្នុងដែលបានធ្វើឲ្យពួកគេបែកបាក់ក្នុងយុទ្ធនាការ World Cup ឆ្នាំ២០១០ ប៉ុន្តែពួកគេបានចាកចេញជាមួយនឹងជ័យជម្នះត្រឹមតែ១លើកប៉ុណ្ណោះ លើក្រុមអ៊ុយក្រែន ហើយពួកគេបានធ្លាក់ចេញដោយសារតែការខ្វះនូវការប្តេជ្ញាចិត្តដ៏ ខ្លាំងក្លារបស់ខ្លួន។
បច្ចុប្បន្ន ក្រុមជម្រើសជាតិអេស្ប៉ាញ នឹងត្រូវសម្លឹងឆ្ពោះទៅមុខនៅក្នុងប្រកួតរវាងក្រុមស្ថិតក្នុង តំបន់អ៊ីប៊ើរីដូចគ្នាថ្ងៃពុធក្នុងទីក្រុង Donetsk ដែលជាកន្លែងអ្នកគាំទ្រយ៉ាងហោចណាស់អាចរំពឹងទុកថា បច្ចេកទេសនៃការវាយសម្រុករបស់ក្រុមព័រទុយហ្គាល់នឹងផ្តល់ឲ្យពួក គេនូវភាពរំភើបផ្សេងៗ។
ប៉ុន្តែទោះបីជាយ៉ាងណាក៏ដោយ ក្រុមបាល់ទាត់ជម្រើសជាតិព័រទុយហ្គាល់ បានរងនូវការខកចិត្តជាមួយនឹងព័ត៌មានថា ខ្សែប្រយុទ្ធ Helder Postiga របស់ពួកគេ នឹងអវត្តមាននៅក្នុងការប្រកួតដែលនៅសល់នៃព្រឹត្តិការណ៍ Euro ឆ្នាំ២០១២ ដោយសារតែបញ្ហារបួសភ្លៅយ៉ាងធ្ងន់ធ្ងរដែលបានកើតឡើងក្នុងពេលការ ទទួលជ័យជម្នះវគ្គ១ភាគ៤លើក្រុមសាធារណរដ្ឋឆែកកាលពីថ្ងៃ ព្រហស្បតិ៍។ នេះបើយោងទៅតាមរបាយការណ៍នៃគេហទំព័ររបស់ប៉ូឡូញ Sport.pl ដែលបានធ្វើការបញ្ជាក់ទៅលើលទ្ធផលផ្សេងៗនៃការត្រួតពិនិត្យដោយ ម៉ាស៊ីនស្កែននៅក្នុងជំរំរបស់ក្រុមភាគខាងលិចប្រទេសប៉ូឡូញ។
Postiga ដែលជាខ្សែប្រយុទ្ធកណ្តាលជម្រើសទី១របស់ព័រទុយហ្គាល់នោះ ត្រូវបានប្តូរចេញក្រោយពីបានដួលនៅជិតបញ្ចប់តង់ទី១ នៅពេលប្រកួតជាមួយនឹងឆែកនៅក្នុងទីក្រុងវ៉ាសូវី។
ប៉ុន្តែទោះបីជាយ៉ាងណាក៏ដោយ ខ្សែការពារ Ricardo Costa បាននិយាយប្រាប់សន្និសីទសារព័ត៌មានកាលពីថ្ងៃសៅរ៍កន្លងមកថា ក្រុមជើងឯករងឆ្នាំ២០០៤មួយនេះ ជឿជាក់ថា ពួកគេអាចមានលទ្ធភាពផ្តួលក្រុមអាល្លឺម៉ង់ ប្រសិនបើក្រុមទាំងពីរជួបគ្នានៅក្នុង Euro ឆ្នាំ២០១២ វគ្គផ្តាច់ព្រ័ត្រ។
សូមបញ្ជាក់ថា ព័រទុយហ្គាល់ បានស៊ុតបាល់ប៉ះនឹងបង្គោលទីចំនួនពីរលើកនៅក្នុងតង់ទី២ ក្នុងពេលពួកគេរងបរាជ័យ ១-០ ក្នុងការប្រកួតជម្រុះតាមពូលក្រោមស្នាដៃក្រុមអាល្លឺម៉ង់។
ការទទួលជ័យជម្នះយ៉ាងកក់ក្តៅក្នុងលទ្ធផល ៤-២ លើក្រុមជម្រើសជាតិក្រិកកាលពីថ្ងៃសុក្រ បានធ្វើឲ្យក្រុមរបស់លោក Joachim Loew ស្ថិតក្នុងទីតាំងយ៉ាងមានលំនឹងក្នុងនាមជាក្រុមមានក្តីសង្ឃឹម ច្រើនក្នុងឈ្នះពាន រួមជាមួយនឹងក្រុមការពារតំណែងជើងឯកអេស្ប៉ាញ។
Nasri ប្រើពាក្យសម្តីគ្រោតគ្រាតទៅកាន់អ្នកយកព័ត៌មាន
ខ្សែបម្រើនៃក្រុមបាល់ទាត់ជម្រើសជាតិបារាំង Samir Nasri ដែលបានប្តូរឲ្យចូលលេងក្នុងតង់ទី២នោះ បានទាក់ទិននៅក្នុងជម្លោះមួយជាមួយនឹងអ្នកសារព័ត៌មានបារាំង ម្នាក់ ក្រោយពីបញ្ចប់ការប្រកួតកាលពីថ្ងៃសៅរ៍។
នៅពេលត្រូវបានចោទសួរដោយអ្នកយកសារព័ត៌មានម្នាក់សម្រាប់ការចេញ មតិមួយ រូបគេបានឆ្លើយថា៖ «អ្នកកំពុងតែសម្លឹងរកលាមក ហើយអ្នកកំពុងតែសម្លឹងរកបញ្ហា»។
អ្នកសារព័ត៌មានរូបនោះបានតបវិញថា៖ «ទទួលការបរាជ័យ»។
បន្ទាប់មក Nasri បានងាកត្រឡប់ក្រោយវិញ ហើយបានប្រើពាក្យសម្តី «អសុរោះ» បន្ទាប់ពីបានផ្ទុះកំហឹងយ៉ាងខ្លាំង និងព្រមទាំងបានហៅអ្នកយកព័ត៌មាននោះដើម្បីធ្វើការពិភាក្សាមួយ ជាមួយរូបគេមួយទល់នឹងមួយទៀតផង៕ IS
