ភ្នំពេញ ប៉ុស្តិ៍
ភ្នំពេញ: កីឡាករ-ការិនីរបស់កម្ពុជាចំនួន៨រូបបានចេញដំណើរទៅកាន់ទីក្រុង ប៉េកាំង កាលពីព្រឹកថ្ងៃម្សិលមិញ ដើម្បីធ្វើការហ្វឹកហាត់រយៈពេលពីរសប្តាហ៍ដើម្បីត្រៀមលក្ខណៈ សម្រាប់ព្រឹត្តិការណ៍អូឡាំពិកទីក្រុងឡុងដ៍ និងការប្រកួតអន្តរជាតិនានា។
ជំហានដែលនាំឲ្យមានការបញ្ជូនប្រតិភូ និងអត្តពលិកគឺយោងតាមអនុស្សរណៈនៃការយោគយល់គ្នារវាងគណៈកម្មាធិការជាតិអូឡាំពិកកម្ពុជា (NOCC) និងគណៈកម្មាធិការជាតិអូឡាំពិកនៃសាធារណរដ្ឋប្រជាមានិតចិន (COC) កាលពីឆ្នាំ២០១១។
លោក វ៉ាត់ ចំរើន អគ្គលេខាធិការ NOCC បានឲ្យភ្នំពេញ ប៉ុស្តិ៍ដឹងនាពិធីជូនដំណើរនៅអាកាសយានដ្ឋានអន្តរជាតិភ្នំពេញថា ភាគីកម្ពុជាទទួលបន្ទុកលើតម្លៃសំបុត្រយន្តហោះ ហើយភាគីចិន ជាអ្នកទទួលបន្ទុករ៉ាប់រងលើការហូបចុក ការស្នាក់នៅ រហូតដល់បញ្ចប់ការហ្វឹកហាត់នៅថ្ងៃទី៧ ខែកក្កដា ដែលនេះគឺជាដំណាក់កាលចាប់ផ្តើមអនុវត្តកិច្ចព្រមព្រៀង។
ប្រតិភូពីរនាក់គឺលោក ហែម សំណាង អគ្គលេខាធិការរង និង លោក ញាន សុខវិសាល មន្ត្រីសម្របសម្រួលនៃ NOCC ក៏បានរួមដំណើរជាមួយក្រុម កីឡាករ-កីឡាការិនីផងដែរ។
លោក កាំង សុធា មន្ត្រីព័ត៌មាននៃ NOCC បានបញ្ជាក់ថា ក្នុងចំណោមកីឡាករ-កីឡាការិនីទាំង៨រូបនោះ មាន៤រូបគឺជាអត្តពលិកដែលត្រៀមខ្លួនសម្រាប់យុទ្ធនាការកីឡាអូឡាំពិកទីក្រុងឡុងដ៍ ដូចជា កីឡាករហែលទឹក ហែម ថុនពន្លឺ កីឡាការិនីហែលទឹក ហែម ថុនវិទិនី កីឡាករអត្តពលកម្ម កៀង សាម៉ន កីឡាការិនីអត្តពលកម្ម ចាន់ សីហា។
រីឯកីឡាករ-ការិនីបួនរូបទៀត មិនមែនជាបេក្ខភាពសម្រាប់ព្រឹត្តិការណ៍កីឡាអូឡាំពិកទេ ប៉ុន្តែពួកគេហ្វឹកហាត់ដើម្បីត្រៀមខ្លួនក្នុងជំនួបអន្តរជាតិនានា ដែលក្នុងនោះរួមមាន កីឡាការិនីតេក្វាន់ដូ ស៊ន សៀវម៉ី កីឡាករតេក្វាន់ដូ ជ័យ រិទ្ធី កីឡាករវាយកូនឃ្លីលើតុ តាំង ហាវ និង ណៃ សារ៉ាវ័យ។
ដោយឡែក អត្តពលិកពីររូបទៀតដែលត្រៀមខ្លួនសម្រាប់ព្រឹត្តិការណ៍ទីក្រុង ឡុងដ៍ដែរនោះ គឺកីឡាករយូដូ ខុម រតនៈមុនី និង កីឡាការិនីតេក្វាន់ដូ ស៊ន ដាវីន។ រតនៈមុនី កំពុងតែហ្វឹកហាត់នៅក្នុងប្រទេសបារាំង ខណៈ ដាវីន បានចេញទៅហ្វឹកហាត់នៅអង់គ្លេសចាប់តាំងពីថ្ងៃទី១៣ ខែមិថុនា មកម៉េ្លះ។
ទោះបីមានការប្រឹងប្រែងពីកីឡាករកីឡាការិនី និងមានការជួយជ្រោមជ្រែងពីថ្នាក់ដឹកនាំ និងបណ្តាប្រទេសជាមិត្តនៅលើពិភពលោកយ៉ាងណាក៏ដោយ ប៉ុន្តែតាមការបញ្ជាក់ពីលោក វ៉ាត់ ចំរើន ការប្រឹងប្រែងទាំងនេះ មិនរំពឹងថា កម្ពុជាទទួលបានមេដាយភ្លាមៗពីព្រឹត្តិការណ៍ កីឡាអូឡាំពិក ឬព្រឹត្តិការណ៍អន្តរជាតិនានានោះទេ ប៉ុន្តែយើងត្រូវតែមានការខំប្រឹងប្រែងដើម្បីឲ្យមានបច្ចេកទេស រីកចម្រើនទៅមុខជាលំដាប់។
សម្រាប់លោកអគ្គលេខាធិការ NOCC កត្តាដែលសំខាន់នោះ គឺអត្តពលិកអាចបំបែកកំណត់ត្រាខ្លួនឯង៕
