ភ្នំពេញ ប៉ុស្តិ៍
ភ្នំពេញ: អតីតអ្នកប្រដាល់សាកលជម្រើសជាតិ ផល សោភ័ណ្ឌ ដែលប្តូរមកប្រកួតប្រដាល់ក្បាច់បុរាណខ្មែរវិញ បានធ្វើឲ្យជើងខ្លាំងមួយចំនួន បានចាញ់ក្រោមកណ្តាប់ដៃ និងជង្គង់របស់គេយ៉ាងច្រើន ទោះបីជាគេមានបទពិសោធនៅខ្ចីក៏ដោយ។
មួយរយៈចុងក្រោយនេះ ផលសោភ័ណ្ឌ ហាក់បីដូចជាតារាឆ្នើមមួយរូបដែលត្រូវបានទូរទស្សន៍ផ្តល់ឱកាស ឲ្យប្រកួតជាញឹកញាប់ហើយអ្វីដែលគួរឲ្យកត់សម្គាល់នោះ គឺគេបានយកឈ្នះកីឡាករជើងចាស់ខ្លាំងៗមួយចំនួនទៀតផង។
កំពូលអ្នកប្រយុទ្ធ សុខ សុវណ្ណ វៀត ប៊ុនឌឿន ស៊ីថា សារ៉ាន់ ពុទ្ធហ៊ុច ឈាន ហុង និងទេស សំខាន់ ជាដើមសុទ្ធតែចាញ់រូបគេទាំងអស់ ដោយអ្នកខ្លះចាញ់រហូតដលពីរដងឯណោះ។
នៅក្នុងការប្រកួតកម្រិតគូឯកកាលពីថ្ងៃសៅរ៍នៅទូរទស្សន៍បាយ័ន សោភ័ណ្ឌ បានបន្តយកឈ្នះកីឡាករលំដាប់ខ្លាំងមួយទៀតគឺ រឿម វណ្ណៈ មកពីក្លិបប្រដាល់អប្សរាគុនខ្មែរនៅក្នុងការប្រកួតយ៉ាងអស្ចារ្យ និងជក់ចិត្តពីអ្នកទស្សនា។
ទោះបី សោភ័ណ្ឌ ទទួលរងនូវការបែកឈាមខ្លះៗ ក៏ដោយ ប៉ុន្តែនៅទីបញ្ចប់គេទទួលបានជ័យជម្នះដោយពិន្ទុយ៉ាងត្រចះត្រចង់ ។
ស្ថានភាពនៃការប្រកួត
ចាប់ផ្តើមពីទឹកទី១ រហូតដល់បញ្ចប់ស្នូរជួងនៅទឹកទី២ ផលសោភ័ណ្ឌ វាយចេញបានច្រើននិងគ្រប់គ្រងស្ថានភាព ព្រមទាំងមានពិន្ទុនាំមុខខណៈដែល រឿម វណ្ណៈ បានទប់ទល់ និងវាយចេញតិចតួចជាង។
ចូលដល់ទឹកទី៣ សោភ័ណ្ឌ នៅតែបន្ថែមល្បឿនចូលវាយសម្រុកកាន់តែខ្លាំងដោយប្រើកណ្តាប់ដៃ និងការទាត់ចេញចូលពោះទឹកដៃគូកាន់តែច្រើនប៉ុន្តែបានត្រឹមពាក់ កណ្តាលទឹកទី៣កែងស្តាំរបស់ វណ្ណៈបានចូលចំសៀតផ្ការបស់ សោភ័ណ្ឌ យ៉ាងដំណំដែលបណ្តាលឲ្យបែកឈាម ហើយលោកអាជ្ញាកណ្តាល ជ័យ ប៊ុនឈឿ បានរាប់ សោភ័ណ្ឌ ដល់ចំនួន៨ទើបបន្តការប្រកួត។
ក្រោយពេលបែកឈាមដោយសារកែង សោភ័ណ្ឌ នៅតែមានភាពរឹងមាំ និងមានទឹកចិត្តប្រកួតដូចជា ខ្លារងរបួសអ៊ីចឹងដែរ គេបន្ថែមការវាយលុកទ្វេឡើងដើម្បីដណ្តើមពិន្ទុមកវិញដែលខ្លួន បានបាត់បង់ខ្លះនៅទឹកទី៣ដែលអាជ្ញាកណ្តាលរាប់នោះ។
នៅទឹកទី៤ និងទី៥ ការវាយចេញរបស់ សោភ័ណ្ឌ ច្រើនចំគោលដៅ ទោះបីកម្លាំងរបស់គេបានថយចុះក៏ដោយ។
ចប់ការប្រកួត គណៈកម្មការបានប្រកាសឲ្យ សោភ័ណ្ឌ ឈ្នះដោយផ្ទុយពីឈ្មួញប្រដាល់ដែលប្រកាសប្រាប់គ្នីគ្នា ថារឿម វណ្ណៈជាអ្នកឈ្នះ៕
