ភ្នំពេញ ប៉ុស្តិ៍
ភ្នំពេញ: អ្នកប្រដាល់ក្បាច់ចម្រុះមកពីក្លិបកងពលតូចឆត្រយោង៩១១ ឡៅ ស៊ីណាត បានក្លាយជាម្ចាស់ប្រាក់ក្នុងធនាគារដែលមានទឹកប្រាក់២លានរៀល បន្ទាប់ពីរូបគេបានប្រើបច្ចេកទេសផ្ទាល់ខ្លួនយកឈ្នះអ្នកលេង ទម្ងន់ដៃ ពេជ្រ សីហា នាការប្រកួតផ្តាច់ព្រ័ត្រ នៅលើសង្វៀនប៉ុស្តិ៍លេខ៣ កាលពីល្ងាចថ្ងៃសៅរ៍ កន្លងមកនេះ។
នៅក្នុងកម្មវិធីប្រកួត ដែលមានកីឡាករចំនួន៤នាក់ចូលរួមប្រកួតនេះ ឡៅ ស៊ីណាត ធ្លាប់បានចាញ់ក្រោមទម្ងន់ដៃ ពេជ្រ សីហា ម្តងរួចមកហើយ នាជំនួបវិលជុំសប្តាហ៍ទី២ ខណៈរូបគេបានធ្លាក់កម្លាំងនៅចុងទឹកទី៥។ ប៉ុន្តែក្នុងការប្រកួតលើកនេះ ស៊ីណាត បានកែប្រែស្ថានភាពប្រកួតដ៏គួរឲ្យភ្ញាក់ផ្អើល ដើម្បីលាងជម្រះការបរាជ័យលើកមុន។
ចាប់ផ្តើមការប្រកួតភ្លាម សីហា ដែលបានអះអាងមុនថា ខ្លួនមានសមត្ថភាពគ្រប់គ្រាន់ក្នុងការយកឈ្នះ ស៊ីណាត ម្តងទៀតនោះ បានបង្ហាញភាពខ្លាំងតាមរយៈការម៉ាត់ចេញលឿនៗ ហើយវាក៏ជាស្នៀតដែលដាក់គំនាបដល់ការចូលបុកជង្គង់ និងវាយកែងរបស់ ស៊ីណាត ផងដែរ។ នៅទឹកទី២ និងទី៣ សីហា បានបង្កើនការម៉ាត់យ៉ាងខ្លាំង ប៉ុន្តែស្របពេលជាមួយគ្នានោះ ស៊ីណាត បានព្យាយាមប្តូរកណ្តាប់ដៃ រួចស្ទុះចូលបុកជង្គង់ និងច្រាសកែងចូលចំផ្ទៃមុខ សីហា វិញបានយ៉ាងណាល្អ។ តែទោះបីជាយ៉ាងណា កណ្តាប់ដៃវាយសន្ធាប់ចំផ្ទៃមុខនិងចូលធុងទឹកពេញៗរបស់ សីហា បានធ្វើឲ្យ ស៊ីណាត ស្រុតកម្លាំងយ៉ាងខ្លាំង នៅចុងទឹកទី៣។
ស្ថានភាពនេះ បានធ្វើអ្នកឲ្យទស្សនាមួយចំនួនធំធ្វើការវាយតម្លៃថា «ស៊ីណាតនឹងអស់ថាមពលនៅទឹកទី៤ឬទី៥ ហើយពេលនោះរូបគេនឹងបរាជ័យក្រោមកណ្តាប់ដៃ សីហា ជាថ្មីម្តងទៀត»។
ប៉ុន្តែ ឡៅ ស៊ីណាត មិនបានបណ្តោយឲ្យស្ថានភាពច្រំដែល កើតមានឡើងចំពោះរូបគេម្តងទៀតនោះឡើយ។ គ្រាន់តែទឹកទី៤ចាប់ដំណើរការភ្លាម ស៊ីណាត បានទាត់ស្កាត់ចូលកណ្តៀតក្អម សីហា ពេញៗ មុនពេលរូបគេចូលម៉ាត់ និង ច្រាសកែងបន្ថែម។
ស្នៀតទាំងនេះ បានធ្វើឲ្យមហិច្ឆតាចូលវាយលុករបស់ សីហា រងការលំបាកយ៉ាងខ្លាំង ប៉ុន្តែនៅចុងទឹកនេះ សីហា បានម៉ាត់ចំផ្ទៃមុខ ស៊ីណាត ពេញៗចំនួន៣ទៅ៤ដៃ ហើយ១ដៃចុងក្រោយរបស់គេ ស្ទើរតែបណ្តាលឲ្យ ស៊ីណាត ដួលអុកគូទ។ តែទោះបីជាយ៉ាងណា សម្រាប់ការប្រកួតកាត់សេចក្តីនៅទឹកទី៥ ស៊ីណាត មិនធ្វើឲ្យអ្នកគាំទ្ររបស់ខ្លួនបាក់ទឹកចិត្តនោះឡើយ។ រូបគេបានប្រើប្រាស់កម្លាំងចុងក្រោយ វាយសង្គ្រប់យ៉ាងខ្លាំង ហើយការទាត់ស្កាត់ចូលចំពេញៗរបស់គេបានធ្វើឲ្យ សីហា ហាក់មានការថមថយកម្លាំងច្រើន។ ជាងនេះទៅទៀតនៅពេល សីហា ព្យាយាមចូលប្តូរជង្គង់នោះ ស៊ីណាត បានច្រាសកែងចូលចំថ្គាម សីហា មួយទំហឹង និងបុកថែម២ទៅ៣ជង្គង់ទៀត បណ្តាលឲ្យ សីហា ឡើងគ្រាំតែម្តង។
ការវាយផ្តាច់នៅទឹកទី៥នេះ បានធ្វើឲ្យការបូកសរុបពិន្ទុរបស់ចៅក្រមទាំង៥នាក់ បានផ្តល់ពិន្ទុឲ្យ ស៊ីណាត ឈ្នះ សីហា ទាំង៥នាក់តែម្តង ដោយក្នុងនោះចៅក្រមលោក រាម កុសល ឲ្យ ស៊ីណាត ឈ្នះ សីហា ជាមួយពិន្ទុ ៩៨-៩៧ លោក ឡុង សាលវ័ន្ត ៩៨-៩៧ លោក មាស វណ្ណឌី ៩៨-៩៧ លោក រ័ត្ន សត្ថា ៩៩-៩៦ និង លោក ទេស សារិន បានផ្តល់ឲ្យ ស៊ីណាត ឈ្នះ សីហា ជាមួយពិន្ទុ ៩៩-៩៦។
ឆ្លើយតបទៅនឹងការដាក់ពិន្ទុនៃការប្រកួតនេះ លោក តែម ម៉ឺន ប្រធានសហព័ន្ធកីឡាប្រដាល់កម្ពុជា បានថ្លែងប្រាប់ភ្នំពេញ ប៉ុស្តិ៍ទាំងទឹកមុខញញឹមថា៖«ការប្រកួតថ្ងៃនេះដំណើរការបាន ល្អគ្រប់យ៉ាង ជាពិសេសគូឯកដណ្តើមប្រាក់ក្នុងធនាគារតែម្តង ដោយអ្នកវាយក៏ល្អ អ្នកផ្តល់ពិន្ទុក៏ល្អ ហើយសណ្តាប់ធ្នាប់នៃការប្រកួតក៏បានល្អទៀត»។
ចំណែក ពេជ្រ សីហា ក៏បានទទួលស្គាល់ពីការបរាជ័យរបស់ខ្លួនផងដែរ។ សីហា បានបញ្ជាក់ក្រោយការប្រកួតថា៖ «ថ្វីបើរបួសចាស់នៅត្រង់កណ្តាប់ដៃខាងស្តាំរបស់ខ្ញុំ នៅមានការឈឺចាប់ក៏ដោយចុះ ប៉ុន្តែខ្ញុំបានកំណត់ហើយថា ការប្រកួតផ្តាច់ព្រ័ត្រលើកនេះ ខ្ញុំនឹងចូលម៉ាត់គេរហូតបាក់ដៃខ្លួនឯងក៏មិនរាថយនោះដែរ។ ផ្ទុយទៅវិញខ្ញុំបែរជាមិនអាចធ្វើបាន ខណៈកម្លាំងស៊ុហ្វរបស់ខ្ញុំត្រូវបានធ្លាក់ចុះ ក្រោមការទាត់ស្កាត់ចូលពេញៗរបស់គេ នៅទឹកទី៤ និងទី៥នោះ»៕
