ភ្នំពេញ ប៉ុស្តិ៍
កោះគ្រីស្មាស់ៈ ភារកិច្ចដ៏ក្រៀមក្រំក្នុងការស្វែងរកសាកសពរហូតដល់៩០នាក់ នៅក្នុងសោកនាដកម្មទូកអ្នកស្វែងរកសិទ្ធិជ្រកកោន នៅតែបន្ត ប៉ុន្តែក្ដីសង្ឃឹមថានឹង បានជួបអ្នកនៅរស់ ស្ទើរតែពុំមាន នោះទេនៅថ្ងៃទីបីនេះ។
សាកសពមនុស្ស១៧នាក់ ត្រូវបានគេរកឃើញ ប៉ុន្តែកាលពីថ្ងៃអាទិត្យ ខណៈក្រុមអ្នករុករក បានបោះបង់ចោលក្តីសង្ឃឹមក្នុងការ ស្វែងរកអ្នកនៅរស់នោះប្រតិបត្តិ ការជួយសង្គ្រោះ បានប្តូរទៅជាការស្វែងរកសាកសពទៅវិញ។
ក្រុមអ្នកជួយសង្គ្រោះ បានរកឃើញអ្នកនៅរស់១១០នាក់ដែលបានជិះនៅលើនាវាមួយដែលបាន ក្រឡាប់កាលពីថ្ងៃព្រហស្បតិ៍នៅចន្លោះកោះគ្រីសស្មាស់ និងច្រកសមុទ្រស៊ុនដា ឥណ្ឌូនេស៊ី។
ស្រ្តីអ្នកនាំពាក្យការពារព្រំដែនម្នាក់ បាននិយាយថា ក្នុងចំណោមអ្នកដែលនៅរស់មាន ក្មេងប្រុស៩នាក់ ក្នុងនោះក្មេងប្រុសអាយុ១៣ឆ្នាំម្នាក់ ត្រូវបានគេរកឃើញនៅប៉ុន្មានម៉ោងដំបូង នៃប្រតិបត្តិការជួយសង្គ្រោះ។
អាជ្ញាធរសុវត្ថិភាពផ្លូវទឹកអូស្រ្តា លី (ASMA) បានអះអាងកាលពីថ្ងៃសៅរ៍ថា ពុំមានអ្នកនៅរស់ក្នុងរង្វង់នៃតំបន់រុករកដ៏ធំនោះទេ។
ស្រ្តីអ្នកនាំពាក្យការពារព្រំដែន បានថ្លែងថា៖ «ពេលព្រះអាទិត្យរះ ពួកគេ នឹងបន្តការរុករកជាថ្មី»។
អ្នកស្រី បានបញ្ជាក់ថា ពេលនេះ អ្នកនៅរស់ទាំង១១០នាក់ ស្ថិតនៅលើកោះគ្រីស្មាស់។
AMSA និយាយថា មានមនុស្សជាង២០០នាក់នៅលើទូកនេះ នៅពេលវា បានចាកចេញពីឥណ្ឌូនេ ស៊ី ប៉ុន្តែតួលេខពិតប្រាកដ គេមិនអាចដឹងបានទេ។
មូលហេតុនៃការក្រឡាប់ទូកនេះ គេនៅតែពុំទាន់ដឹងនៅឡើយទេ។
កិច្ចប្រឹងប្រែងរុករក និងសង្គ្រោះ មានការចូលរួមពីកងទ័ពជើងទឹក និងនាវាពាណិជ្ជកម្មជាច្រើនគ្រឿង កងទ័ពអាកាសចរណ៍ភូមិន្ទអូស្ត្រាលី យន្តហោះស៊ីវិល និងក្រុមយន្តហោះគយ។
ក្រុមអាជ្ញាធរបាននិយាយថា គេ ទំនងជា មិនអាចរកឃើញអ្នកដែលនៅរស់ទៀតទេ។
រដ្ឋមន្រ្តីដឹកជញ្ជូន លោក អាន ថូនី អាល់បានីស បានប្រាប់ក្រុមអ្នកសារព័ត៌មានអំពីការវិវត្តថ្មីបំផុត នៅក្រុងស៊ីដនីកាលពីរាត្រី ថ្ងៃសៅរ៍៕ NR
