ភ្នំពេញ ប៉ុស្តិ៍
ក្រុងហាណូយៈ អតិផរណារបស់វៀតណាម បានធ្លាក់ចុះជាលើកទី១០ គិតត្រឹមខែមិថុនា ពោលគឺដល់កម្រិតទាបបំផុតក្នុងរយៈពេលជាងពីរឆ្នាំ ដែលផ្តល់ឱកាសដល់ប្រទេសនេះក្នុងការបន្តទម្លាក់អត្រាការប្រាក់ ដើម្បីជំរុញកំណើនសេដ្ឋកិច្ច។
ការិយាល័យស្ថិតិវៀតណាម បានឲ្យដឹងនៅទីក្រុងហាណូយ កាលពីម្សិលមិញថា តម្លៃទំនិញប្រើប្រាស់ បានកើនឡើង ៦,៩ភាគរយកាលពីខែមិថុនា ធៀបនឹងរយៈពេលដូចគ្នាកាលពីឆ្នាំមុន ពោលគឺនេះជាកំណើនទាបបំផុតចាប់តាំងពីខែធ្នូ ឆ្នាំ២០០៩ មក ខណៈកំណើនថ្លៃនៅខែឧសភាក្នុងឆ្នាំនេះ បានកើនឡើង៨,៣៤ភាគរយ។ តាមការព្យាករជាមធ្យមចំនួន ៥ លើក ដែលអង្កេតដោយទីភ្នាក់ងារព័ត៌មាន Bloomberg បានឲ្យដឹងថា កំណើនថ្លៃក្នុងខែមិថុនាកន្លងទៅនេះ អាចនឹងកើនឡើង ៧,៥ភាគរយ។
កំណើនថ្លៃគ្រាប់ធញ្ញជាតិ បានធ្លាក់ចុះ ដោយសារកំណើនសេដ្ឋកិច្ចទាប បានកាត់បន្ថយតម្រូវការប្រើប្រាស់ និងដោយសារក្តីបារម្ភជុំវិញស្ថានភាពឧស្សាហកម្មធនាគាររបស់វៀត ណាម ដែលបានបង្កឲ្យការផ្តល់ឥណទាន ធ្លាក់ចុះក្នុងខែមេសា។
ផលិតផលក្នុងស្រុកសរុប បានកើនឡើងក្នុងកម្រិតទាបបំផុតចាប់តាំងពីត្រីមាសចុងក្រោយឆ្នាំ ២០០៩ មក ហើយធនាគារកណ្តាលវៀតណាម បានទម្លាក់អត្រាការប្រាក់កម្ចីរយៈពេល៤ខែជាប់គ្នា ដើម្បីប្រឆាំងនឹងការធ្លាក់ចុះនៃកំណើនសេដ្ឋកិច្ចពិភពលោក។
លោក Hai Pham អ្នកវិភាគប្រចាំក្រុមហ៊ុន Australia & New Zealand Banking Group Ltd ដែលមានមូលដ្ឋាននៅប្រទេសសិង្ហបុរី បានសរសេរក្នុងរបាយការណ៍មួយក្នុងខែនេះថា៖ «ការធ្លាក់ចុះតម្លៃទំនិញពិភពលោក ជាពិសេសតម្លៃស្បៀងអាហារ និងកំណើនតម្រូវការក្នុងស្រុក ដែលមានកម្រិតទាបជាងការរំពឹងទុក កំពុងជួយកាត់បន្ថយអត្រាអតិផរណា»។
ធនាគារ ANZ បានបន្តឲ្យដឹងថា ខ្លួនបានវាយតម្លៃការព្យាករពីអតិផរណារបស់ប្រទេសវៀតណាមនៅចុង ឆ្នាំរួចហើយ ពោលគឺមានកម្រិតជិត៧ភាគរយ ធៀបនឹងអតិផរណាចន្លោះពី ៩ ទៅ ១០ភាគរយ ដែលបានព្យាករនាពេលកន្លងមក៕ BP
