ភ្នំពេញ ប៉ុស្តិ៍
ក្រុងកុលកាតាៈ ប្រទេសឥណ្ឌានឹងដាក់ចេញពីវិធានការដើម្បីបង្កើនតម្លៃប្រាក់រូបពី បន្ទាប់ពីការធ្លាក់ថ្លៃរបស់រូបិយប័ណ្ណនេះ ដល់កម្រិតទាបបំផុតធៀបនឹងប្រាក់ដុល្លារ បានគំរាមកំហែងធ្វើឲ្យសម្ពាធថ្លៃកើនឡើងកាន់តែខ្លាំង និងបង្កើនចំណាយរបស់បណ្តាក្រុមហ៊ុននានា ក្នុងការទូទាត់បំណុលបរទេស។
លោក Pranab Mukherjee រដ្ឋមន្ត្រីហិរញ្ញវត្ថុឥណ្ឌាបានថ្លែងប្រាប់ក្រុមអ្នកយកព័ត៌មាននៅ ទីក្រុង Kolkata កាលពីថ្ងៃសៅរ៍ថា រដ្ឋាភិបាល និងធនាគារកណ្តាល នឹងដាក់ចេញវិធានការបង្កើតតម្លៃប្រាក់រូបពីនៅថ្ងៃនេះ។ ប្រាក់រូបពី ដែលធ្លាក់ថ្លៃខ្លាំងជាងគេក្នុងចំណោមរូបិយប័ណ្ណនៅអាស៊ីក្នុងរយៈ ពេល ១២ខែចុងក្រោយនេះ បានធ្លាក់ថ្លៃ ២១ភាគរយ។ ប្រាក់រូបពីបានចូលរួមចំណែកធ្វើឲ្យមានអត្រាអតិផរណា ដែលកាលពីសប្តាហ៍មុន ធនាគារកណ្តាលយល់ថា រូបិយប័ណ្ណនេះ មានតម្លៃខ្ពស់ពេកដែលអាចឲ្យមានការទម្លាក់អត្រាការប្រាក់។ លោក Chakravarthy Rangarajan អ្នកផ្តល់ប្រឹក្សាជាន់ខ្ពស់ផ្នែកសេដ្ឋកិច្ចរបស់នាយករដ្ឋមន្ត្រី ឥណា្ឌ បានឲ្យដឹងកាលពីខែមុននេះថា មានមធ្យោបាយមួយ នោះគឺកម្មវិធីប្រាក់បញ្ញើ ដើម្បីទាក់ទាញរូបិយប័ណ្ណបរទេសពីប្រជាពលរដ្ឋឥណ្ឌាដែលរស់នៅក្រៅ ប្រទេស។
លោក Dharmakirti Joshi ប្រធានសេដ្ឋវិទូប្រចាំក្រុមហ៊ុន Crisil Ltd បានឲ្យដឹងក្នុងបទសម្ភាសមួយថា៖ «ស្ថានភាពនេះ គឺជាស្ថានភាពដ៏គួរឲ្យព្រួយបារម្ភ។ យើងត្រូវបង្កើនការផ្គត់ផ្គង់ប្រាក់ដុល្លារ»៕ BP
