ភ្នំពេញ ប៉ុស្តិ៍
បាត់ដំបងៈ ក្រុមហ៊ុនរុករករ៉ែមួយនៅខេត្តបាត់ដំបងនឹងចាប់ផ្តើមទាញយករ៉ែ ទង់ដែង និងប្រាក់ពីការរុករករបស់ខ្លួនក្នុងរយៈពេល២ឆ្នាំទៀត។ នេះបើតាមប្រធាននាយកប្រតិបត្តិក្រុមហ៊ុន។
Wild Bull Resources ដែលជាក្រុមហ៊ុនអូស្ត្រាលី ចាប់ដៃគូជាមួយក្រុមហ៊ុនក្នុងស្រុក Angkor Thumopich Resources (ATR) នឹងចូលរួមជាមួយក្រុមហ៊ុនតូចៗ បន្ទាប់ពីបើកអាជីវកម្មរយៈពេលជាង៧ខែមក។
លោក Paul Menere ប្រធាននាយកប្រតិបត្តិរបស់ក្រុមហ៊ុន Wild Bull បានឲ្យដឹងថា ក្រុមហ៊ុនរបស់លោក បានដាក់ពាក្យសុំអាជ្ញាប័ណ្ណ ហើយនឹងស្វែងរករណ្តៅរុករករ៉ែនៅតំបន់ដូនត្រេត ខេត្តបាត់ដំបង យ៉ាងហោចណាស់រយៈពេល៦ខែ។ លោកបានលើកឡើងថា៖ «យើងនឹងអនុវត្តកម្មវិធីរុករករ៉ែ ព្រោះយើងប្រាកដថា យើងមិនបង្កផលប៉ះពាល់អវិជ្ជមានដល់ប្រជាជនក្នុងតំបន់ឡើយ»។ លោកបានបន្ថែមថា ក្រុមហ៊ុនរបស់លោក នឹងផ្តល់ការងារដល់ប្រជាជនកម្ពុជា។ លោកបានបញ្ជាក់ថា៖ «យើងនឹងទាញយករ៉ែទាំងនោះក្នុងរយៈពេល ២ឆ្នាំ»។ លោក Menere បានឲ្យដឹងថា Wild Bull នឹងវិនិយោគរហូតដល់ ៦លានដុល្លារអាមេរិក។
លោក សូ យៀង ទីប្រឹក្សាលោក ជា ស៊ីម ប្រធានព្រឹទ្ធសភា ដែលលោកក៏ជាម្ចាស់ភាគហ៊ុន និងប្រធានផ្នែកប្រតិបត្តិនៅក្នុងក្រុមហ៊ុននេះឲ្យដឹងថា លោកមានទំនុកចិត្តថា ការជីកខួងនេះនឹងចាប់ផ្តើមក្នុងពេលឆាប់ៗ ហើយនាំឲ្យមានការទាញយករ៉ែយ៉ាងឆាប់រហ័ស។
កាលពីខែកញ្ញា ឆ្នាំ២០១១ ក្រុមហ៊ុនបណ្តាក់ទុនរួមគ្នារវាងកម្ពុជា និងកូវ៉ែត គឺក្រុមហ៊ុន PIMA-D&D International បានឲ្យដឹងថា ខ្លួននឹងទាញយករ៉ែមាស និងដែក ក្នុងរយៈពេលពីរឆ្នាំ។ នេះបើតាមការរាយការណ៍របស់ភ្នំពេញ ប៉ុស្តិ៍ នៅពេលនោះ។
ក្រុមហ៊ុន Astra Resources ដែលជាក្រុមហ៊ុនចុះបញ្ជីនៅក្នុងក្រុមហ៊ុន Frankfurt Stock Exchange ប្រទេសអាល្លឺម៉ង់ បានប្រកាសស្រដៀងគ្នា កាលពីខែតុលា ដោយបញ្ជាក់ថា ខ្លួននឹងកំណត់រ៉ែមាស៣៥០ ០០០អោន ហើយនឹងចាប់ផ្តើមទាញយករ៉ែទាំងនោះក្នុងរយៈពេល១ឆ្នាំ។
ជាមួយគ្នានេះដែរ អ្នកមកពីខាងក្នុងឧស្សាហកម្មនេះបានឲ្យដឹងថា ពួកគេជឿ ដរាបណាគេឃើញរ៉ែទាំងនោះជាក់ស្តែង។
លោក Richard Stanger អគ្គនាយក ក្រុមហ៊ុន Liberty និងជាប្រធានសមាគមរុករករ៉ែនៅកម្ពុជា ឲ្យដឹងកាលពីម្សិលមិញថា Renaissance Minerals ដែលបានទិញភាគហ៊ុនរបស់ Oz Mineral នៅកម្ពុជា ក្នុងឆ្នាំនេះ និង Liberty Mining International បានចាប់ផ្តើមការរុករករ៉ែ ពី២០០៥។ ក្រោយ៧ឆ្នាំ ការរុករកនោះ នៅតែត្រូវការពេលប៉ុន្មានឆ្នាំទៀត។ លោកបន្តថា៖ «ក្នុងរយៈពេល ២ ទៅ៥ឆ្នាំ Renaissance អាចស្ថិតក្នុងទីតាំងមួយ ដើម្បីប្រកាសថា ពួកគេមានធនធានរ៉ែ»៕ CS
