ភ្នំពេញ ប៉ុស្តិ៍
ភ្នំពេញៈ កាលពីឆ្នាំ១៩៩៧ Philippe Janowski ដែលជាជនជាតិបែលហ្ស៊ិក បានជិះម៉ូតូហុងដាកម្លាំង ៦៥០ CC តាមផ្លូវជុំវិញតំបន់អឺរ៉ុប និងអាស៊ី។
លោកបានមកដល់ប្រទេសកម្ពុជា កាលពីឆ្នាំ២០០៣ ហើយនៅឆ្នាំ២០០៤ លោកបានក្លាយទៅជាដៃគូដ៏ជោគជ័យនៅក្នុងក្រុមហ៊ុន Pocket Guide ដែលផ្តោតជាសំខាន់លើអាជីវកម្មបោះផ្យាយបង្ហាញពីប្រភេទ ភេសជ្ជៈ ម្ហូបអាហារ និងផែនទីនៅភ្នំពេញ សៀមរាប និងបាត់ដំបង។
លោក Janowski បានលើកឡើងថា៖ «វាជាព្រេងសំណាងដែលបាននាំខ្ញុំមកដល់ទីនេះ»។ លោកបានឲ្យដឹងថា គន្លឹះដែលនាំឲ្យលោកក្លាយទៅជាដៃគូដ៏ជោគជ័យនេះ គឺក្រមសីលធម៌ការងារ និងបែបបទរស់នៅ។ លោកបន្តថា៖ «ក្រមសីលធម៌ការងារ ពិតជាសំខាន់ណាស់។ ដៃគូរបស់អ្នក ត្រូវការបង្ហាញសមត្ថភាព ដើម្បីប្រយុទ្ធ និងដោះស្រាយឧបសគ្គ។ របៀបរស់នៅរបស់ដៃគូដ៏មានសក្តានុពលរបស់អ្នក នឹងប្រាប់អ្នកថាពួកគេខ្ជិល ឬតស៊ូ និងការគោរពដែលពួកគេនឹងបង្ហាញដល់អតិថិជនរបស់អ្នក»។
ដៃគូរបស់លោក ចាប់តាំងពីឆ្នាំ ២០០៤ នៅក្នុងក្រុមហ៊ុន Pocket Guide (Cambodia) Ltd គឺលោក Tim Gibbons ជនជាតិអង់គ្លេស និងលោក Dean Lennox ជនជាតិអូស្ត្រាលី។
លោក Janowski ដឹកនាំផ្នែកលក់ លោក Gibbons គ្រប់គ្រងគណនី រីឯលោក Lennox ទទួលខុសត្រូវផ្នែករចនា។
លោក Janowski បានឲ្យដឹងថា៖ «យើងអាចខុសពីដៃគូម្នាក់ទៀត ប៉ុន្តែនេះជាសម្រស់នៃការចាប់ដៃគូ។ ក្នុងរយៈពេល៨ឆ្នាំកន្លះ យើងមិនមានវិបត្តិពិតប្រាកដដែលត្រូវដោះស្រាយឡើយ»។
តួនាទីរបស់លោក Janowski គឺរកទំនាក់ទំនងជាមួយក្រុមហ៊ុនធំៗដូចជា Sofitel, កូកាកូឡា និង Smart Mobile ដែលស្ថិតក្នុងចំណោមអតិថិជនរបស់លោក។
សៀវភៅដំបូង ឈ្មោះថា ការEating & Drinking ដែលបានប្តូរឈ្មោះទៅជា Drinking & Dining ត្រូវបានចេញផ្សាយកាលពីខែធ្នូ ឆ្នាំ២០០៤ ដោយកាលពីមុន មាន ៤០ទំព័រ។
នាពេលបច្ចុប្បន្ន សៀវភៅនេះ មាន១២០ទំព័រ ហើយ Pocket Guide បានបោះពុម្ពផ្សាយ១០ដងរួចមកហើយ។
អតិថិជនរបស់ Pocket Guide រួមមាន ណាហ្គាវើល ក្រុមហ៊ុនប៊ីឡាញ KFC និងភោជនីយដ្ឋាន និងហាងរាប់រយកន្លែងទៀត។ លោក Janowski បានឲ្យដឹងថា ដៃគូ ត្រូវបំពេញការរំពឹងទុករបស់បុគ្គលិក និងអតិថិជន។
លោកបន្តថា៖ «អ្នកមិនគួរធ្វើទៅលើអ្នកទាំងនោះ ដូចអ្វីដែលអ្នកចង់ធ្វើនោះទេ ប៉ុន្តែត្រូវប្រព្រឹត្តទៅលើមនុស្សទាំងឡាយណា ដែលពួកគេចង់ឲ្យអ្នកធ្វើ។ នោះជាការពិត មិនថាអ្នកនោះជាអ្នកចេះដឹង ជាកសិករ ឬជាប្រធាននាយកប្រតិបត្តិមកពីក្រុមហ៊ុនចម្រុះជាតិសាសន៍ឡើយ»។
លោក Philippe បានលើកឡើងថា៖ «អ្វីដែលខ្ញុំគិតថាជាបញ្ហាធំនៅលើពិភពលោក គឺកង្វះការយល់ដឹងចំពោះអ្នកដទៃ»។ លោកបានពន្យល់នៅពេលសាកសួរពីសារៈសំខាន់នៃការធ្វើដំណើររបស់ លោក ជុំវិញពិភពលោក នៅក្នុងការបង្កើតក្រមសីលធម៌ការងារ និងឥរិយាបថរបស់លោក។
លោកបានបញ្ជាក់ថា៖ «ការធ្វើដំណើរ ជួយអ្នកឲ្យផ្សារភ្ជាប់ជាមួយមនុស្សមកពីជាតិសាសន៍ផ្សេង។ ការធ្វើដំណើរ នឹងជួយបង្កើតភាពអត់ធ្មត់របស់អ្នក ហើយពិតជាមានតម្លៃណាស់»។
លោកបន្ថែមទៀតថា ចំណេះដឹងបានមករាប់បញ្ចូលទាំងការវិភាគ ការកត់សម្គាល់ និងការលើកយកហេតុផល ហើយទាំងនេះនឹងស្ថិតក្នុងខួរក្បាលរបស់អ្នក។ ចំពោះអាជីវករ និងបុគ្គលិកផ្នែកលក់ លោកឲ្យដឹងថា ការដឹងអំពីផលិតផល និងអតិថិជនរបស់អ្នក អាចនាំពួកគេទៅរកផលិតផលដែលពួកគេជឿទុកចិត្ត។
លោក Janowski ក៏ជាម្ចាស់ Mekong Orchards ដែលជាហាងផលិតអាហារធ្វើពីសណ្តែកដីផងដែរ។ Mekong Orchards ត្រូវបានបង្កើតឡើង ដោយសារតែលោកទទួលបានអំណោយសៀវភៅមុខម្ហូបពីជីដូនរបស់មិត្ត ភក្តិ ដែលនេះជាសៀវភៅមុខម្ហូបពិសេសដែលបង្កើតឡើងសម្រាប់សណ្តែកដី កាលពីឆ្នាំ២០០៨។
លោកបន្តថា៖ «គ្រប់ៗគ្នា ញ៉ាំសណ្តែកដី តាមរបៀបផ្សេងៗគ្នា ហើយគ្មាននរណាម្នាក់ នៅកម្ពុជា មានសៀវភៅមុខម្ហូបនោះទេ»។ គ្រាប់ស្វាយចន្ទី ត្រូវបានដាក់បន្ថែមរសជាតិនៅក្នុងផលិតផលដែលលោកបានផ្តល់សេវា។
លោក Janowski បានលើកឡើងថា៖ «ខ្ញុំគ្រាន់តែចង់លក់ផលិតផលជារបស់ខ្ញុំប៉ុណ្ណោះ។ ខ្ញុំគ្រាន់តែចង់បង្ហាញការពេញចិត្តនឹងការលក់ផលិតផលដែល ខ្ញុំឈរពីក្រោយប៉ុណ្ណោះ»។ លោកពន្យល់អំពីជោគជ័យរបស់លោក នៅកម្ពុជា ប៉ុន្តែលោកមិនបញ្ជាក់ថា ការណ៍នេះមកពីសមត្ថភាពរបស់លោក ក្នុងការស្រុះស្រួលជាមួយអ្នកដទៃ និងលក្ខណៈផ្ទាល់ខ្លួនរបស់លោកជាមួយអ្នកដទៃឡើយ។ លោកបានលើកឡើងថា៖ «អ្នកត្រូវផ្តល់សេវាលក់ដែលអំណោយផលដល់អតិថិជន។ អ្នកត្រូវតាមដាន បន្ទាប់ពីមានការលក់ ហើយត្រូវទទួលខុសត្រូវចំពោះកំហុសឆ្គងដែលកើតឡើង ហើយត្រូវដោះស្រាយវា»។ លោកថា ការរក្សាទំនាក់ទំនងជាមួយអតិថិជនជាកត្តាសំខាន់ ហើយថាអ្នកទាំងនោះក្លាយជាមិត្ត ហើយនៅតែធ្វើពាណិជ្ជកម្មនឹងអ្នក៕ CS
