ភ្នំពេញ ប៉ុស្តិ៍
ភ្នំពេញៈ កម្ពុជាបានជួបនូវបរិត្តផរណា លើកដំបូងនៅខែឧសភា ក្នុងអត្រា១,១ភាគរយ បើធៀបនឹងខែមេសាឆ្នាំនេះ ដែលកើតចេញពីការធ្លាក់ចុះថ្លៃប្រេង និងម្ហូបអាហារ។ នេះបើតាមទិន្នន័យពីវិទ្យាស្ថានជាតិស្ថិតិ (NIS)។
ទិន្នន័យរបស់ NIS បង្ហាញថា ក្នុងខែឧសភា តម្លៃប្រេងសាំង បានធ្លាក់ចុះ៤,៩ភាគរយ តម្លៃម្ហូបអាហារធ្លាក់ចុះ ០,៨ភាគរយ តម្លៃអង្ករ១,៥ភាគរយ ត្រី និងគ្រឿងសមុទ្រស្រស់ធ្លាក់ចុះ ៣,៣ភាគរយ សាច់ជ្រូក១,៧ភាគរយ ផ្លែឈើ១,៧ភាគរយ ហ្គាស និងប្រេងចម្អិនអាហារបានធ្លាក់ចុះចំនួន១,២ភាគរយ។
លោក ឃិន សុង អនុប្រធាន NIS បានលើកឡើងថា៖ «ជាការពិតវាបានធ្លាក់ចុះទាប នៅខែឧសភា ដោយសារយើងមានសន្ទស្សន៍ម្ហូបអាហារ ធ្លាក់ចុះ ហើយការផ្គត់ផ្គង់កើនឡើង ដើម្បីបំពេញតម្រូវការទីផ្សារ ដែលធ្វើឲ្យផលិតផលមួយចំនួនធ្លាក់ចុះ ហើយផលិតផលមួយចំនួនទៀតនៅថេរដដែល។ ការណ៍នេះ ធ្វើឲ្យល្បឿនតម្លៃម្ហូបអាហាររបស់យើង នៅខែឧសភា ស្ថិតក្នុងអត្រានេះ។ នេះជាសន្ទស្សន៍ល្អ»។
លោកបន្តថា មកដល់ពេលនេះតម្លៃសាំងធ្លាក់ចុះ ដែលនេះជាកត្តាចម្បងធ្វើឲ្យមានបរិត្តផរណា ខណៈកម្ពុជាមានអត្រាប្តូរប្រាក់ថេរ។
ទិន្នន័យដដែលបានបង្ហាញថា អតិផរណា បានកើនឡើងតែ២,២ភាគរយប៉ុណ្ណោះ ក្នុងខែឧសភា បើប្រៀបធៀបនឹងខែឧសភា ឆ្នាំមុន។ តួលេខបង្ហាញថា កំណើនអតិផរណា ២,២ភាគរយ កាលពីខែឧសភា ដោយសារថ្លៃទំនិញ និងភេសជ្ជៈ បានឡើងថ្លៃ ២,១ភាគរយ អង្ករ ៤,៥ភាគរយ សាច់២,៨ភាគរយ ក្នុងនោះសាច់គោ ១៤,២ភាគរយផ្លែឈើ១,១ភាគរយ បន្លែ៨,៦ភាគរយ សម្លៀកបំពាក់ និងស្បែកជើង ៤,១ភាគរយ និងប្រេងសាំង ៤,៨ភាគរយ។
បើទោះបីយ៉ាងនេះក្តីអត្រានៅទាបជាងបណ្តាប្រទេសផ្សេងទៀតក្នុងតំបន់។
លោក ឃិន សុង ថ្លែងថា បើប្រៀបធៀបទៅប្រទេសដទៃ ដូចជាថៃ ចិន និងវៀតណាម បង្ហាញថា កម្ពុជាមានម៉ាក្រូសេដ្ឋកិច្ចល្អ។ ទោះបីជាយ៉ាងនេះក្តី លោកលើកឡើងថា តម្លៃសាច់ ពិសេសសាច់គោ និងសាច់ជ្រូក នៅតែមានតម្លៃខ្ពស់ដដែល ហើយម្ហូបអាហារមួយចំនួន ក៏នៅតែខ្ពស់ផងដែរ។ លោកបន្តថា៖ «តម្លៃសាច់គោ នៅតែខ្ពស់ដោយសារ បរិមាណនៃការចិញ្ចឹមរបស់យើង មិនឆ្លើយតបនឹងទីផ្សារ។ រដ្ឋាភិបាល កំពុងព្យាយាមលើកទឹកចិត្តប្រជាជនរបស់យើង ឲ្យបន្តចិញ្ចឹមសត្វកាន់តែច្រើន ដើម្បីផ្គត់ផ្គង់ទីផ្សារ»។
ប៉ុន្តែលោកបន្តថា អត្រាអតិផរណាស្ថិតនៅក្រោម៥ភាគរយ នៅតែល្អដដែល។ លោកព្យាករថា អតិផរណានៅខែមិថុនា នឹងស្ថិតក្នុងអត្រាដដែល ឬមានស្ថិរភាព ដោយខែឧសភាមានអត្រាអតិផរណាប្រហែល២ ទៅ ៣ភាគរយ។ លោកបន្តថាពេលអតិផរណាស្ថិតក្នុងអត្រា៥ភាគរយបង្ហាញថា ម៉ាក្រូសេដ្ឋកិច្ចល្អ៕ CS
