ភ្នំពេញ ប៉ុស្តិ៍
ភ្នំពេញៈ លោក ខៀវ កុសល ដែលជាសិល្បករកំណាព្យម្នាក់ ត្រូវបានឃាត់ខ្លួនកាលពីថ្ងៃសៅរ៍អស់ប៉ុន្មានម៉ោង បន្ទាប់ពីទៅដល់ព្រលានយន្តហោះដើម្បីចូលរួមពិធីបុណ្យ Poetry Parnassus ដែលជាពិធីបុណ្យអក្សរសាស្រ្តអន្តរជាតិ និងរៀបចំធ្វើតាមបែបវប្បធម៌នៃអូឡាំពិកនៅទីក្រុងឡុងដ៍។
លោក កុសល ដែលរត់គេចទៅរស់នៅរដ្ឋ កាលីហ្វ័រនីញ៉ា ជាជនភៀសខ្លួនតាំងពីវ័យកុមារ ត្រូវបាននិរទេសពីសហរដ្ឋអាមេរិកមកកម្ពុជា កាលពីឆ្នាំមុនបន្ទាប់ពីការបញ្ចប់ទោសជាប់ពន្ធនាគារពីបទឧក្រិដ្ឋដែលបានប្រព្រឹត្តតាំងពីនៅវ័យជំទង់។
ថ្លែងពីកន្លែងឃុំនៅមណ្ឌលអន្តោប្រវេសន៍ Colnbrook Immigration Removal នៅជាយទីក្រុងឡុងដ៍ លោក កុសល ប្រាប់ថា លោកត្រូវឃាត់ខ្លួនដោយ«ការមិនបានផ្តល់នូវចម្លើយពេញចិត្តទៅមន្រ្តីអន្តោប្រវេសន៍»។
លោកប្រាប់ភ្នំពេញ ប៉ុស្តិ៍ថា៖ «ខ្ញុំមិនដែលកុហកនៅក្នុងការដាក់ពាក្យសុំទិដ្ឋាការទេ »។ខ្ញុំមានលិខិតបញ្ជាក់ការធានាឧបត្ថម្ភអំពីហេតុផលដែលខ្ញុំ មកទីនេះ អ្វីដែលខ្ញុំនឹងត្រូវធ្វើនៅទីនេះ លេខទំនាក់ទំនងអ្នករៀបចំពិធីបុណ្យ ដែលគេអាចទូរស័ព្ទទៅបាន។
Linda Kwon ជាអ្នកគ្រប់គ្រងផ្លូវធ្វើដំណើរដែលមានមូលដ្ឋាននៅទីក្រុងឡុងដ៍ បានមកដល់ព្រលានយន្តហោះ Heathrow Airport ពីល្ងាចថ្ងៃសៅរ៍មកទទួលលោក កុសល និងលោក Masahiro Sugano អ្នកផលិតខ្សែភាពយន្តដែលអមដំណើរលោកបានឃើញសិល្បកររូបនេះត្រូវ អាជ្ញាធរអន្តោប្រវេសន៍អង់គ្លេសឃាត់ខ្លួន។ Kwonថា៖ «ពួកគេត្រូវដកយកលិខិតឆ្លងដែន និងឯកសារដែលគាត់បានផ្តល់ឲ្យ ប៉ុន្តែគេមិនប្រាប់អ្វីនោះទេ»។
លោកត្រូវអញ្ជើញកាលពីខែមេសាឲ្យតំណាងកម្ពុជានៅពិធីបុណ្យ នៅទីក្រុងឡុងដ៍ ដែលគ្រោងប្រព្រឹត្តទៅពីថ្ងៃទី២៦ ខែមិថុនា ដល់ថ្ងៃទី១ កក្កដា។
យោងតាម Anida Yoeu Ali សហស្ថាបនិកនៃ Studio Revolt ថា អាជ្ញាធរអន្តោប្រវេសន៍អង់គ្លេស អះអាងថា ទិដ្ឋាការចេញឲ្យគាត់ដោយស្ថានទូតអង់គ្លេសនៅភ្នំពេញប្រហែល ជាមិនត្រឹមត្រូវ ហើយថា គាត់ប្រហែលជានឹងត្រូវឃាត់ខ្លួនរយៈពេលយ៉ាងហោចណាស់៣៦ម៉ោង។
លោកបានថ្លែងថា៖ «ខ្ញុំបានទទួលរងការប្រព្រឹត្តមកលើខ្លួនខ្ញុំដូចជាឧក្រិដ្ឋជន នៅពេលខ្ញុំមិនបានធ្វើអ្វីខុសទាល់តែសោះពីសំណាក់ប្រទេស ដែលអញ្ជើញខ្ញុំ»។
តាមសេចក្តីរាយការណ៍ព័ត៌មានចុងក្រោយបានឲ្យដឹងថា លោក កុសល ត្រូវបានដោះលែងវិញកាលពីល្ងាចម្សិលមិញ ប៉ុន្តែលិខិតឆ្លងដែនរបស់លោក សមត្ថកិច្ចអន្តោប្រវេសន៍ ក្រុងឡុងដ៍ មិនទាន់ប្រគល់ឲ្យលោកវិញនៅឡើយ។ មន្ត្រីអង់គ្លេសពាក់ព័ន្ធនឹងទូតប្រចាំនៅភ្នំពេញមិនអាចទាក់ទងបាន ទេ៕ PS
