ភ្នំពេញ ប៉ុស្តិ៍
ក្រុងញូវយ៉កៈ ក្នុងរយៈពេលបីថ្ងៃជាប់គ្នា ប្រេងឆៅត្រូវបានជួញដូរក្នុងតម្លៃក្រោម ៨០ដុល្លារក្នុងមួយធុង នៅទីក្រុងញូវយ៉ក ខណៈព្យុះត្រូពិច Debby បានបក់ចេញផុតពីតំបន់ជីកយកប្រេង និងតំបន់រុករកឧស្ម័នធម្មជាតិនៅឈូងសមុទ្រម៉ិកស៊ិក។
តម្លៃប្រេងក្នុងកិច្ចសន្យាអនាគត បានប្រែប្រួលតិចតួច បន្ទាប់ពីបានកើនឡើង ១,២ភាគរយមក។ យោងតាមមជ្ឈមណ្ឌលជាតិព្យាករពីខ្យល់ព្យុះរបស់អាមេរិក បានឲ្យដឹងថា ព្យុះ Debby បានបក់ឆ្ពោះទៅទិសខាងកើតវិញកាលពីថ្ងៃអាទិត្យ ដោយបក់ឆ្ងាយចេញពីកន្លែងរុករកថាមពលនៅក្នុងសមុទ្រ។ ការិយាល័យការពារសុវត្ថិភាព និងបរិស្ថានអាមេរិក បានឲ្យដឹងថា ក្រុមហ៊ុនជាច្រើន រួមមានក្រុមហ៊ុន ConocoPhillips ក្រុមហ៊ុន Anadarko Petroleum Corp និងក្រុមហ៊ុន BP Plc បានបិទទ្វារផលិតកម្មរុករកប្រេងរបស់ខ្លួននៅក្នុងឈូងសមុទ្រប្រមាណ ២៣ភាគរយ។
លោក Jeremy Friesen អ្នកយុទ្ធសាស្ត្រផ្នែកប្រេងប្រចាំក្រុមហ៊ុន Societe Generale SA នៅទីក្រុងហុងកុង មានប្រសាសន៍ថា៖ «វាហាក់ថាព្យុះ Debby មិនមែនជាព្រឹត្តិការណ៍អាកាសធាតុធំនោះទេ។ ហានិភ័យនៃការផ្គត់ផ្គង់ប្រេង ត្រូវបានកាត់បន្ថយ ដូច្នេះ វានឹងមិនធ្វើឲ្យតម្លៃប្រេងកើនឡើងខ្លាំង ដូចដែលវាធ្លាប់កើនឡើងនោះទេ»។
