ភ្នំពេញ ប៉ុស្តិ៍
កោះកុងៈសាលាខេត្តកោះកុងបានបង្កើតគណៈកម្មការចុះអនុវត្តអនុសាសន៍លោកនាយករដ្ឋមន្ត្រីដើម្បីចុះយុទ្ធនាការសិក្សា ប្រមូលទិន្នន័យនិងវាស់វែងដីធ្លីជូនប្រជាពលរដ្ឋដែលកំពុងមានទំនាស់នៅក្នុងស្រុកបុទុមសាគរ គីរីសាគរ ជាមួយក្រុមហ៊ុនចិនដែលវិនិយោគលើវិស័យទេសចរ រមណីយដ្ឋាន និងសណ្ឋាគារដែលបានធ្វើអោយប៉ះពាល់ប្រជាពលរដ្ឋប្រមាណជាង១០០០គ្រួសារក្នុងស្រុកចំនួនពីរមិនហ៊ានធ្វើការសម្រេចចិត្តកាត់ដីជូនប្រជាពលរដ្ឋទេ ដោយត្រូវរង់ចាំគោលការណ៍ពីលោកនាយករដ្ឋមន្ត្រី។
លោកសាយ សុជាតិ អភិបាលរងខេត្តកោះកុង ដែលជាប្រធានគណៈកម្មការទទួលបន្ទុកចុះអនុវត្តផ្ទាល់នៅក្នុងស្រុកបុទុមសាគរ និងគីរីសាគរបានចុះទៅអនុវត្តន៍នៅថ្ងៃម្សិលមិញបានថ្លែងឲ្យដឹងថា គណៈកម្មការរបស់លោកបានចុះមកស្រង់ស្ថិតិនិងទិន្នន័យពលរដ្ឋជាក់ស្តែងដែលកំពុងរស់នៅក្នុងស្រុកចំនួនពីរដែលមានទំនាស់ដីធ្លីជាមួយក្រុមហ៊ុន Union Development Group Co., Ltd ដើម្បីរាយការណ៍ទៅខេត្ត។
លោកបានឲ្យដឹងទៀតថា ៖«តំបន់នេះ អង្ករបានក្លាយទៅជាបាយទៅហើយ គឺមិនអាចកាត់ចេញពីដីរបស់ក្រុមហ៊ុនបានទេគឺយើងត្រូវតែធ្វើរបាយការណ៍ទៅខេត្តដើម្បីសុំគោលការណ៍ពីសម្តេចនាយរដ្ឋមន្ត្រី»។
លោកបានបន្តថា សម្តេចបានមានប្រសាសន៍ថារាល់កន្លែងណាដែលមានទំនាស់ដីធ្លីជាមួយក្រុមហ៊ុនគឺត្រូវកាត់ដីចេញក្រុមហ៊ុនអោយមកប្រជាពលរដ្ឋ តែវាមានករណីពិសេសខ្លះដែរខេត្តមិនអាចសម្រេចចិត្តបានទេ។ លោកបានអោយដឹងទៀតថា ៖«តំបន់នោះគឺករណីពិសេសដូច្នេះយើងត្រូវតែសុំគោលការណ៍ពីសម្តេច គឺសម្តេចជាអ្នកសម្រេចចិត្ត»។
សូមរង់ចាំអានព័ត៌មានពិស្តារក្នុងកាសែតភ្នំពេញ ប៉ុស្តិ៍
