ភ្នំពេញ ប៉ុស្តិ៍
ក្រុងតូក្យូៈ ក្រុមហ៊ុន Sony Corp និងក្រុមហ៊ុន Panasonic Corp ដែលជាក្រុមហ៊ុនផលិតទូរទស្សន៍ធំជាងគេរបស់ជប៉ុន បានព្រមព្រៀងផលិតទូរទស្សន៍ OLED រួមគ្នា ដោយសារក្រុមហ៊ុនទាំងពីរព្យាយាមងើបឲ្យផុតពីការខាតបង់ដែលមានទឹកប្រាក់ចំនួនសរុប ១,២ពាន់ពាន់លានយ៉េន (១៥ពាន់លានដុល្លារ) កាលពីឆ្នាំមុន។
ក្រុមហ៊ុនទាំងពីរនេះ បានឲ្យដឹងក្នុងសេចក្តីថ្លែងការណ៍មួយកាលពីម្សិលមិញថា ក្រុមហ៊ុនរបស់ខ្លួន មានបំណងបង្កើតបច្ចេកវិទ្យាផលិតកម្មធំមួយសម្រាប់ទូរទស្សន៍ OLED នៅឆ្នាំក្រោយនេះ។ ក្រុមហ៊ុនទាំងពីរ មិនទាន់បានកំណត់កាលបរិច្ឆេទសម្រាប់ការផលិតទូរទស្សន៍ OLED នៅឡើយទេ។
នេះគឺជាការចាប់ដៃគូជាលើកដំបូងរវាងអង្គភាពផលិតទូរទស្សន៍ធំៗទាំងពីររបស់ក្រុមហ៊ុនទាំងពីរ ដែលកំពុងខាតបង់ ដោយសារកំណើនថ្លៃប្រាក់យ៉េន បានកាត់បន្ថយប្រាក់ចំណេញនៅក្រៅប្រទេស និងដោយសារការប្រកួតប្រជែងពីក្រុមហ៊ុន Samsung Electronics Co និងក្រុមហ៊ុន LG Electronics Inc របស់កូរ៉េខាងត្បូង កាន់តែមានសភាពតានតឹងខ្លាំង។ ក្រុមហ៊ុនផលិតទូរទស្សន៍របស់កូរ៉េខាងត្បូងទាំងពីរនេះ បានឲ្យដឹងថា ក្រុមហ៊ុនរបស់ខ្លួននឹងដាក់បង្ហាញទូរទស្សន៍ម៉ូដែល OLED នេះនៅថ្ងៃទី៣១ ខែធ្នូខាងមុខនេះ។
