ភ្នំពេញ ប៉ុស្តិ៍
ក្រុងវ៉ាស៊ីនតោនៈ មន្រ្តីអាមេរិកជាន់ខ្ពស់ម្នាក់ បាននិយាយកាលពីថ្ងៃព្រហស្បតិ៍ថា អាមេរិកនឹងសង្កត់ធ្ងន់«ពីការភ្ជាប់ខ្លួន និងកិច្ចសហប្រតិបត្តិការជាមួយចិននៅឯកិច្ចចរចាសន្តិសុខនៅខែ ក្រោយនេះនៅអាស៊ីភាគអាគ្នេយ៍ ដែលប្រទេសជាច្រើននឹងប្រយ័ត្នប្រយែង ជាប់កុនក្នុងការប្រជែងគ្នារបស់ប្រទេសមហាអំណាច។
ឧបការីរដ្ឋមន្រ្តីការបរទេសអាមេរិកទទួលបន្ទុកកិច្ចការអាស៊ីខាងកើត និងប៉ាស៊ីហ្វិក លោក ឃើត ខែមបែល បានថ្លែងថា អាមេរិក និងចិន នឹងប្រកាសពីគំនិតផ្តួចផ្តើមសហប្រតិបត្តិការថ្មីៗនៅឯ វេទិកាតំបន់របស់សមាគមប្រជាជាតិអាស៊ីអាគ្នេយ៍ នៅកម្ពុជា។
មហាអំណាចទាំងពីរ នឹងប្រកាសផែនការជាច្រើនដើម្បីធ្វើការរួមគ្នាលើជំនួយ សង្គ្រោះមហន្តរាយមនុស្សធម៌ និងការការពារសត្វព្រៃជាគម្រោងមិនចម្រូងចម្រាសដែលឆ្លុះបញ្ចាំង« ពីការតាំងចិត្តរឹងមាំរបស់យើង ដែលយើងចង់ធ្វើការជាមួយចិន»។
លោកបានបញ្ជាក់ថា៖ «យើង នឹងមានការខ្វែងគំនិតគ្នាច្រើន។ យើងនឹងមានចំណុចជាច្រើនដែល យើងនឹងបញ្ចប់តាមបែបធម្មជាតិ ប៉ុន្តែ វានឹងសំខាន់ណាស់ ដើម្បីបញ្ជូនសារច្បាស់លាស់មួយថា...យើង ចង់បង្កើតភាពជាដៃគូរឹងមាំ និងស្ថិតស្ថេរជាមួយចិន។
ជំនួបប្រចាំឆ្នាំ២០១២ នៅរាជធានីភ្នំពេញ បានកើតឡើង ពីរឆ្នាំ បន្ទាប់ពីកាំជ្រួចបានផ្ទុះឡើងរវាងអាមេរិក និងចិន នៅឯជំនួបវេទិកាតំបន់អាស៊ាន ដែលមានសមាជិក២៧ប្រទេសនៅក្រុងហាណូយ។
កាលពីឆ្នាំ២០១០ រដ្ឋមន្រ្តីការបរទេសអាមេរិក លោកស្រី ហ៊ីឡារី គ្លីនតុន បានសម្តែងការគាំទ្ររបស់អាមេរិកសម្រាប់កិច្ចប្រឹងប្រែងរបស់ អាស៊ានក្នុងការស្វែងរកដំណោះស្រាយពហុភាគីមួយលើជម្លោះជុំវិញការ ទាមទារជា ច្រើននៅសមុទ្រចិនខាងត្បូងដែលធ្វើឲ្យរដ្ឋនៅអាស៊ីភាគអាគ្នេយ៍ ជាច្រើនមានជម្លោះនឹងចិន។
សំណើសាកល្បងរបស់លោកស្រីហ៊ីឡារីនោះ បានទាក់ទាញការ ឆ្លើយតបវិជ្ជមានមួយពីប្រទេសអាស៊ានជាច្រើន បណ្តាលឲ្យមានសម្តីប្រឆាំងនឹង«ប្រទេសតូចៗ»ពីរដ្ឋមន្រ្តី ក្រសួងការបរទេសចិនលោក យ៉ាង ជាឈី ។
ការក្អេងក្អាងរបស់ចិននៃការទាមទារទឹកដីខ្លួន ដែលបង្ហាញឡើងពីឧបទ្ទវហេតុរវាងនាវាចិន និងនាវាវៀតណាម និងហ្វីលីពីន បានបង្ខំឲ្យប្រទេសទាំងនោះស្វែងរកទំនាក់ទំនងកាន់តែជិតស្និទ្ធជាមួយអាមេរិក៕ NR
