ភ្នំពេញ ប៉ុស្តិ៍
វិធីការពារស្បែកពីពន្លឺព្រះអាទិត្យ
ដោយសារការកើនឡើងនៃកម្តៅព្រះអាទិត្យ ធ្វើឲ្យស្បែកងាយទទួលរងផលប៉ះពាល់ និងអាចបង្កឲ្យកើតមហារីកស្បែក។ ដូច្នេះ យើងគួរតែថែរក្សាស្បែកតាមវិធីងាយៗមួយចំនួនដូចតទៅ។ អ្នកមិនគួរនៅក្រោមកម្តៅថ្ងៃដោយផ្ទាល់ចាប់ពីម៉ោង១០ព្រឹកដល់ម៉ោង៤រសៀលទេ ហើយគួរគប្បីស្លៀកសម្លៀកបំពាក់ណាដែលជិតៗ ដូចជាអាវដៃវែង មួក ឬក៏វ៉ែនតាជាដើម។ ការប្រើប្រាស់ឡេការពារកម្តៅថ្ងៃពិតជាសំខាន់ណាស់សម្រាប់ការពារស្បែក យ៉ាងហោចណាស់ក៏យើងត្រូវប្រើប្រាស់ឡេដែលមានស្រទាប់ការពារ១៥ជាន់ដែរ ទើបអាចការពារស្បែករបស់យើងទាំងស្រទាប់ក្នុង និងក្រៅបាន៕
មួកសុវត្ថិភាពអាចជួយការពារក្បាល មុខ និងជីវិតរបស់អ្នក ព្រមទាំងកាត់បន្ថយការរងរបួសផ្សេងៗនៅពេលធ្វើដំណើរ។ ពិសេសជាងនេះទៀត វាជួយកាត់បន្ថយសំឡេងរំខានពីខ្យល់ដែលមកប៉ះត្រចៀក មុខ និងភ្នែករបស់យើង ហើយថែមទាំងជួយការពារមិនឲ្យមានសត្វល្អិត និងកម្ទេចធូលីផ្សេងៗ។ ក្រៅពីអត្ថប្រយោជន៍ទាំងនេះ មួកសុវត្ថិភាពអាចបង្ហាញឲ្យឃើញថា យើងជាមនុស្សដែលមានទំនួលខុសត្រូវ មិនថាច្បាប់ចែងយ៉ាងណានោះទេ វាឆ្លុះបញ្ចាំងនូវអាកប្បកិរិយានិងភាពថ្លៃថ្នូររបស់យើង។ ការពាក់មួកឲ្យបានត្រឹមត្រូវ ទី១ ដាក់គន្លឹះដែលនៅក្រោមចង្ការឲ្យបានត្រឹមត្រូវ ទី២ រឹតខ្សែសុវត្ថិភាព និងស៊កមួកឲ្យបានត្រឹមត្រូវ និងទី៣ ត្រូវប្រាកដថាមួកសុវត្ថិភាពនោះសមល្មមនឹងទំហំក្បាលរបស់អ្នក៕
វិធីថែរក្សាស្បែកនៅជុំវិញភ្នែកឲ្យស្រស់ថ្លា
សម្ជស្សនៅលើផ្ទែមុខគឺជារឿងមួយសំខាន់។ ស្បែកនៅជុំវិញភ្នែកក៏ជារឿងមួយដែលត្រូវយកចិត្តទុកដាក់ដែរ។ វាមានសភាពស្តើង និងស្ងួតហើយងាយនឹងរងនូវប្រតិកម្ម។ មិនត្រឹមតែងាយនឹងហើមនោះទេ ថែមទាំងងាយជ្រីវជ្រួញទៀតផង។ ដូច្នេះយើងត្រូវតែយកចិត្តទុកដាក់ខ្ពស់ ដោយយកផលិតផលសម្រាប់ថែរក្សាភ្នែកមកញីថ្នមៗនៅត្រង់ចំណុចដែលខ្សោយ ជាងគេ។ យើងអាចប្រើជា ជេល ក្រេម ឬក៏ប្រេងមកម៉ាស្សាថ្មមៗនៅជុំវិញភ្នែកកាន់តែញឹកញាប់កាន់តែល្អ វានឹងមិនធ្វើឲ្យភ្នែករបស់អ្នកងាយជ្រីវជ្រួញ។ រីឯចំណុចចុងក្រោយនោះ គឺទទួលទានដំណេកឲ្យបានគ្រប់គ្រាន់ នោះស្បែកដែលនៅជុំវិញភ្នែកមិនជាំខ្មៅនោះទេ៕
វិធីកំណត់គោលដៅសម្រាប់អាជីពទៅថ្ងៃអនាគតសិស្ស-និស្សិតគ្រប់រូបសុខចិត្តចំណាយពេលយ៉ាងយូរសម្រាប់ការព្យាយាម សិក្សារបស់ពួកគេ។ ពួកគេមានគោលដៅជារួមតែមួយគត់គឺអនាគតដែលបវររុងរឿង។ ដូច្នេះដើម្បីឲ្យប្រាកដថា ការប្រឹងប្រែង ការចំណាយពេលវេលា និងថវិការបស់ពួកគេមិនអត់ប្រយោជន៍នោះ ពួកគេត្រូវធ្វើការសម្រេចចិត្តយ៉ាងប្រុងប្រយ័ត្នទៅលើកត្តាបីជាចម្បង គឺជាដំបូងពួកគេត្រូវសួរខ្លួនឯងថា តើគេចូលចិត្តសិក្សាមុខវិជ្ជាអ្វី? តើមុខវិជា្ជនោះស័ក្ដិសមសម្រាប់ទីផ្សារបច្ចុប្បន្នដែរឬទេ? ជាចុងក្រោយតើពួកគេមានទេពកោសល្យដែរឬទេ? សរុបមកគឺស្វែងរកឲ្យច្បាស់ពី ចំណង់ចំណូលចិត្ត ទីផ្សារការងារ និងទេពកោសល្យផ្ទាល់ខ្លួន៕
គន្លឹះបើកបរពេលយប់ងងឹត
ការបើកបរពេលយប់ ប្រឈមនឹងគ្រោះថ្នាក់ជាងពេលថ្ងៃ ពីព្រោះវាងងឹត ងងុយដេក ឬក៏អស់កម្លាំង ដែលអាចធ្វើឲ្យអ្នកបើកបរបាត់ម្ចាស់ការ។ សារធាតុស្រវឹងក៏ដើមចមបង្កគ្រោះថ្នាក់មួយផងដែរ។ ដូច្នេះមុនពេលបញ្ជាដៃចង្កូត អ្នកគួរតែសម្អាតចង្កៀងមុខ ចង្កៀងក្រោយ ភ្លើងស៊ីញ៉ូ និងបង្អួច។ ជាពិសេស កុំបើកបរនៅពេលស្រវឹងពីព្រោះវាអាចប៉ះពាល់ដល់សមាធិ និងធ្វើឲ្យអ្នកវង្វេងវង្វាន់។ ម្យ៉ាងវិញទៀត អ្នកគួរតែបើកភ្លើងហ្វាប្រសិនបើមានអ្វីមួយសង្ស័យ ពីព្រោះវាអាចជាសញ្ញាដល់អ្នកបើកបរដទៃ។ បន្ថយល្បឿន និងសម្លឹងមើលឲ្យឆ្ងាយ។ នៅពេលដែលធ្វើដំណើរពីក្រោយរថយន្ដដទៃ អ្នកគួរតែទម្លាក់ភ្លើងហ្វាចុះ ដូច្នេះ អ្នកមិនបញ្ចាំងត្រូវភ្នែកអ្នកដទៃទេ។ ប្រសិនបើរថយន្ដមកពីខាងមុខ មិនទម្លាក់ភ្លើងហា្វចុះទេ កុំព្យាយាមសម្លឹងភ្លើងនោះចំអី សូមបង្វែរមកមើលចង្អូរផ្លូវវិញ៕
