ភ្នំពេញ ប៉ុស្តិ៍
ក្រសួងធនធានទឹក និងឧតុនិយម បានអំពាវនាវ សុំឲ្យអាជ្ញាធរដែនដី និងប្រជាពលរដ្ឋ ដែលរស់នៅតាមដងទន្លេមេគង្គកម្ពុជា ទន្លេសាប ទន្លេបាសាក់ និងនៅតំបន់ជុំវិញបឹងទន្លេសាប បង្កើនការប្រុងប្រយ័ត្នខ្ពស់ ចំពោះស្ថានភាពប្រព័ន្ធសម្ពាធទាប ដែលកំពុងបង្កជាព្យុះភ្លៀងជន់លិចតំបន់មួយចំនួននៅភាគខាងលើនៃអាងទន្លេមេង្គ ដើម្បីចៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ។
លោកលឹម គានហោ រដ្ឋមន្ត្រីក្រសួងធនធានទឹក និង ឧតុនិយម នៅថ្ងៃនេះ បានចេញសេចក្ដីជូនដំណឹងមួយ ស្តីពី ស្ថានភាពទឹកជំនន់ទន្លេមេគង្គ ដោយបានបញ្ជាក់ថា បច្ចុប្បន្ន ប្រព័ន្ធសម្ពាធទាប (ITCZ) ដែលកំពុងអូសកាត់ពីលើ អាងទន្លេមេគង្គ (ពីប្រទេសមីយ៉ាន់ម៉ា ទៅមហាសមុទ្រប៉ាស៊ីហ្វិច ខាងកើតប្រទេសហ្វីលីពីន បាននិងកំពុងមានឥទ្ធិពល មកលើអាងទន្លេមេង្គ ដោយបង្កឲ្យមានភ្លៀងធ្លាក់ច្រើន នៅក្នុងប្រទេសកម្ពុជា ឡាវ ថៃ ពិសេសនៅក្នុងអាងទន្លេមេង្គភាគខាងលើ។
លោកបានបញ្ជាក់ក្នុងសេចក្ដីជូនដំណឹងនោះទៀតថា៖«ស្ថានភាពនេះ នឹងបណ្ដាលឲ្យទឹកទន្លេមេគង្គកម្ពុជា ទន្លេបាសាក់ ទន្លេសាប និងទឹកក្នុងអាងបឹងទន្លេសាប ចាប់កើនឡើង ធ្វើឲ្យតំបន់ទំនាបមួយចំនួន ដែលស្ថិតនៅអមដងទន្លេខាងលើ ចាប់ផ្ដើមលិចជាបន្តបន្ទាប់ ដែលការលិចនេះក៏នឹងធ្វើឲ្យមានការប៉ះបាល់ដល់ដំណាំ កសិកម្មរបស់ប្រជាពលរដ្ឋនៅក្នុងតំបន់នោះផងដែរ»។
លោកបានអំពាវនាវ សូមឲ្យអាជ្ញាធរដែនដី និង ប្រជាពលរដ្ឋដែលរស់នៅតាមដងទន្លេទាំងនោះ ចាត់វិធានការប្រមូលកសិផលឲ្យទាន់ពេលវេលា និងសូមបង្កើនការយកចិត្តទុកដាក់ប្រុងប្រយ័ត្នខ្ពស់ ចំពោះស្ថានភាពទឹកជំនន់ខាងលើ ដើម្បីចៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ។
សូមរង់ចាំអានព័ត៌មានពិស្តារក្នុងកាសែតភ្នំពេញ ប៉ុស្តិ៍
