ភ្នំពេញ ប៉ុស្តិ៍
ខ្ញុំបាទឈ្មោះ មែរ ច័ន្ទប៉ូលីដេត កើតក្នុងឆ្នាំ១៩៩៣ ហើយសព្វថ្ងៃនេះខ្ញុំកំពុងតែសិក្សាថ្នាក់អាហារូបករណ៍នៅសាកលវិទ្យាល័យភូមិន្ទភ្នំពេញ ផ្នែកប្រព័ន្ធផ្សព្វផ្សាយ និងសារគមនាគមន៍។ កាលដែលខ្ញុំជ្រើសរើសការសិក្សាផ្នែកគ្រប់គ្រងប្រព័ន្ធផ្សព្វផ្សាយ និងសារគមនាគមន៍មិនមែនជារឿងចៃដន្យនោះទេ ប៉ុន្តែវាជាមុខវិជ្ជាមួយដែលខ្ញុំប្រាថ្នាតាំងពីនៅក្មេងមកម្ល៉េះ។ ខ្ញុំអាចទទួលការបណ្តុះបណ្តាជាច្រើនមុខវិជ្ជា និងជំនាញដែលខ្ញុំស្រឡាញ់ និងចូលចិត្តនៅសាកលវិទ្យាយល័យមួយនេះដូចជា៖ ផ្នែកទំនាក់ទំនង សរសេរអត្ថបទ ផលិតកម្មវិធី ថតនិងកាត់តសំឡេងវីដេអូផ្សេងៗ។ល។
មូលហេតុដែលធ្វើឲ្យខ្ញុំចាប់អារម្មណ៍សរសេរអត្ថបទនៅទស្សនាវដ្តីLIFT គឺដោយសារតែខ្ញុំចង់ហ្វឹកហាត់ជំនាញសរសេរ និងបង្កើនចំណេះដឹងផ្នែកសារព័ត៌មានរបស់ខ្ញុំឲ្យកាន់តែប្រសើរឡើងជាងមុន។ ខ្ញុំចាប់ផ្តើមសរសេរនៅទស្សនាវដ្តីLIFTនេះចាប់តាំងពីឆ្នាំ២០១១មកម្ល៉េះ។ ទស្សនាវដ្តីLIFTនេះផងដែរបានផ្តល់ឲ្យខ្ញុំលើសពីជំនាញនៃការសរសេរទៀត គឺខ្ញុំបានរៀនចេះនូវជំនាញក្នុងផ្នែកទំនាក់ទំនង ការរៀបចំខ្លួន និងអាកប្បកិរិយាចួលក្នុងសង្គម បទពិសោធក្នុងការងារ និងការដោះស្រាយបញ្ហាពេលដែលខ្ញុំជួបការលំបាកជាដើម។
មានពេលខ្លះ ដែលខ្ញុំជួបការលំបាកក្នុងការធ្វើបទសម្ភាស ក៏ដូចជាការសរសេរអត្ថបទ ខ្ញុំធ្លាប់គិតថាចង់បោះបង់ចោលការងារនេះទៀតផង ប៉ុន្តែដោយសារតែមានការលើកទឹកចិត្ត និងជួយជំរុញពីអ្នកដែលនៅជុំវិញខ្លួន ពិសេសគឺការីនិពន្ធ និងការីនិពន្ធរង ដែលបានធ្វើឲ្យខ្ញុំអាចជម្នះនូវរាល់ឧបសគ្គទាំងនោះបាន។ បន្ទាប់ពីចំណាយពេលជិតមួយឆ្នាំសរសេរអត្ថបទនៅទស្សនាវដ្តីនេះ ខ្ញុំទទួលស្គាល់ថា ខ្ញុំហាក់បីដូចជាធំដឹងក្តីជាងមុន និងយល់ដឹងពីទិដ្ឋភាពសង្គម ព្រមទាំងវិធីដោះស្រាយបញ្ហាបានល្អជាងមុន។ នៅពេលខ្លះដែលខ្ញុំជួបបញ្ហា ខ្ញុំតែងតែប្រាប់ខ្លួនឯងថា កុំអាលអស់សង្ឃឹមបោះបង់ខ្លួនឯងចោលឲ្យសោះ ដរាបណាយើងនៅតែមានឱកាសត្រូវប្រឹងព្យាយាមឲ្យអស់ពីលទ្ធភាពដើម្បីដោះស្រាយបញ្ហានោះ៕
