ភ្នំពេញ ប៉ុស្តិ៍
ភ្នំពេញៈ សប្តាហ៍ទី៥នៃការប្រកួតដណ្តើមខ្សែក្រវាត់ K Cement ទម្ងន់៦៥គីឡូក្រាមនៅថ្ងៃអាទិត្យនៅស្ថានីយ ទូរទស្សន៍កងយោធពល ខេមរភូមិន្ទប៉ុស្តិ៍លេខ៥ បានតម្រូវទៅលើកីឡាករនៅក្នុងពូល B គឺអ្នកឈ្នះនៅជុំទី១ត្រូវប្រកួតគ្នា និងអ្នកចាញ់ប៉ះជាមួយអ្នកចាញ់។
ផល សុផាត មកពីក្លិបកងរាជអាវុធហត្ថរាជធានីភ្នំពេញដែលមាន៣ពិន្ទុក្នុង ដៃត្រូវប្រកួតជាមួយយឹម ឌៀប មកពីសមាគម ក្រសួងការពារជាតិដែលមាន៣ពិន្ទុដូចគ្នា ចំណែកឯ ជាម អាដាំ មកពីក្លិបឃ្លាំងមឿងដែលទើបតែមាន១ពិន្ទុត្រូវប៉ះជាមួយ ពុទ្ធ ហ៊ុច មកពីក្លិបពុទ្ធសេរីវង្សកីឡាដែលមានមួយពិន្ទុដូចគ្នា។
សម្រាប់ ជាម អាដាំ និង ពុទ្ធហ៊ុច ប្រសិនបើអ្នកណាចាញ់គឺនឹងបាត់ឱកាសឆ្លងផុតពីវគ្គជម្រុះតាមពូលជាមិនខាន។
លោក វ៉ែន សុផល គ្រូបង្វឹករបស់ ផល សុផាត បានអះអាងថា កូនសិស្សរបស់លោកនឹងឈ្នះ យឹម ឌៀប ដោយបច្ចេកទេសកណ្តាប់ដៃ ដោយលោកសង្ឃឹម៨០ភាគរយ។ ចំណែកលោក ឈិត សារឹម គ្រូបង្វឹករបស់ យឹម ឌៀប មិនសូវមានទំនុកចិត្តលើកូនសិស្សរបស់ខ្លួនឡើយហើយលោកសង្ឃឹមឈ្នះ តែ៥០ភាគរយប៉ុណ្ណោះ ដោយលោកបានបញ្ជាក់ថា គេមានកម្លាំងល្អ ស្នៀតល្អ តែទឹកចិត្តប្រកួតអន់ និងយឺត។
កីឡាករទាំងពីរធ្លាប់ប្រកួតគ្នាចំនួនពីរដង ដោយឈ្នះម្នាក់ម្តងហើយការប្រកួតចុងក្រោយ ផលសុផាត បានឈ្នះ ជាម អាដាំ រីឯយឹម ឌៀប ឈ្នះ ពុទ្ធ ហ៊ុច ដោយពិន្ទុដូចគ្នា។
រីឯ ជាម អាដាំ និង ពុទ្ធ ហ៊ុចកំពុងតែស្ថិតនៅក្នុងក្តីបារម្ភរៀងៗខ្លួនពីព្រោះពួកគេ ទាំងពីរត្រូវតែមានម្នាក់ឈ្នះ ហើយអ្នកចាញ់នឹងត្រូវខ្ទាតចេញពីពូល។
លោក សុខ វិជ័យ គ្រូបង្វឹករបស់ ជាម អាដាំ បានអះអាងថា ជាម អាដាំ មិនអាចចាញ់បានទេ ពីព្រោះគេហ្វឹកហាត់បានល្អ និងមានបទពិសោធល្អជាងដៃគូ។ ដោយឡែក លោក យឹមឈឿន គ្រូបង្វឹករបស់ ពុទ្ធ ហ៊ុចវិញ បាននិយាយថា លោកមិនហ៊ានអះអាងពីការឈ្នះនោះទេប៉ុន្តែ ពុទ្ធ ហ៊ុច មានក្បាច់ពិសេសទៅតាមស្ថានភាព។ លោកបានបន្តថា៖ «កូនសិស្សខ្ញុំនៅខ្ចីជាងប៉ុន្តែមានឱកាសផ្តួលដៃគូបាននៅពេល ប្រកួតជាក់ស្តែង»៕
