ភ្នំពេញ ប៉ុស្តិ៍
- Prev
- 1 of 3
- Next
ភ្នំពេញៈ ឧទ្យានជាតិព្រះមុនីវង្សបូកគោដ៏ស្រស់ត្រកាលដែលបានបន្សល់ទុក តាំងពីសម័យអាណានិគមនិយមបារាំង បច្ចុប្បន្នកំពុងស្ថិតក្រោមគម្រោងអភិវឌ្ឍន៍របស់ក្រុមហ៊ុនសុខា បាននិងកំពុងក្លាយជាតំបន់ទេសចរណ៍ធម្មជាតិដ៏ទាក់ទាញបំផុតរបស់ កម្ពុជា។ ទន្ទឹមនឹងការចាប់ផ្តើមគម្រោងអភិវឌ្ឍន៍ដ៏ធំមួយនេះ គម្រោងប្លង់ផ្ទះវីឡាប្រណីតៗដែលមិនទាន់នឹងចាប់ផ្តើមការសាងសង់ នៅឡើយនោះត្រូវបានដាក់លក់ ហើយមានអតិថិជនជាច្រើនបានកក់ទិញគម្រោងផ្ទះវីឡាទាំងនោះ។
ភ្នំបូកគោមានទីតាំងស្ថិតនៅក្នុងទឹកដីខេត្ដកំពត មានចម្ងាយ៤២គីឡូម៉ែត្រពីក្រុងកំពត។ ក្រុមជនបរទេស បានមកដល់ខេត្តនេះដំបូងគេនៅឆ្នាំ១៩១៧ លុះក្រោយមកជនជាតិបារាំងម្នាក់ឈ្មោះ រូ លួស បានរៀបចំរមណីយដ្ឋាននេះឡើង នាថ្ងៃទី១៣ ខែមេសា ឆ្នាំ១៩២២ ក្នុងរជ្ជកាលព្រះបាទស៊ីសុវត្ថិ។ ភ្នំបូកគោ ត្រូវបានរៀបចំឡើងសម្រាប់ជាទីកន្លែងសម្រាកលម្ហែរបស់អាណានិគម បារាំងនៅលើកំពូលភ្នំដែលមានកម្ពស់១០៧៥ ម៉ែត្រ ធាតុអាកាសនៅទីនោះមាន ភាពត្រជាក់បង្គួរ។
លោក សម្បត្តិ ឧត្តម អ្នកកាន់គម្រោងផ្នែកលក់បុរីបូកគោពពកវិល បានឲ្យដឹងថា គម្រោងអភិវឌ្ឍន៍ភ្នំបូកគោត្រូវបានចែកចេញជាពីរខ្ពង់រាបដែលមាន ផ្ទៃ១៤០ ០០០ហិកតា។ ខ្ពង់រាបទី១ សម្រាប់ធ្វើការសាងសង់សណ្ឋាគារ ខុនដូ និងអគារកម្សាន្តខ្ពស់ៗជាច្រើនប្រភេទ រីឯខ្ពង់រាបទី២ សម្រាប់សាងសង់បុរីបូកគោពពកវិល។ លោកបានបន្តថា បុរីបូកគោពពកវិល នឹងត្រូវសាងសង់នៅលើផ្ទៃដីទំហំ៤៦៥ហិកតា ដែលអាចសាងសង់ផ្ទះវីឡាប្រណីតៗចំនួន១៩៨៩ប្លង់ ហើយផ្ទះវីឡាទាំងនោះមានផ្ទៃប្លង់ពីរប្រភេទគឺប្លង់ទំហំ៦០០ ម៉ែត្រការ៉េ និងប្លង់ទំហំ១២០០ម៉ែត្រការ៉េ។
អ្នកជំនាញផ្នែកលក់រូបនេះបាននិយាយថា៖«សម្រាប់ខ្ពង់រាបទី២ មានផ្ទៃដី៤៦៥ហិកតាហ្នឹង យើងអាចសាងសង់ផ្ទះវីឡាបាន១៩៨៩ប្លង់ ហើយផ្ទះវីឡាទាំងនោះស្អាតៗមានប្រមាណ១១ម៉ូដចម្រុះគ្នា មានទាំងម៉ូដបរទេស និងម៉ូដបែបខ្មែរយើង»។
ដោយសារតែគម្រោងអភិវឌ្ឍន៍នៅលើខ្ពង់រាបទាំងពីរមានទំហំធំស្ទើរ ក្លាយជាទីក្រុងដ៏ប្រណីតមួយនោះ ទើបគម្រោងអភិវឌ្ឍន៍ភ្នំបូកគោបានសាងសង់ឡើងដោយគិតជាចម្បងពី តម្រូវការនានារបស់អ្នករស់នៅ។ លោក សម្បត្តិ ឧត្តម បានឲ្យដឹងថា នៅក្នុងបុរីបូកគោពពកវិល នឹងមានសាងសង់កន្លែងកម្សាន្ត និងផ្សារទំនើបប្រមាណជា៣០ប្រភេទ ដូចជា កន្លែងជិះទូក ជិះកង់ ហែលទឹក និងផ្ទះបៃតងជាដើម។
ផ្ទះវីឡាប្រណីតៗស្ថិតក្នុងបុរីបូកគោពពកវិលលើភ្នំបូកគោដែល មានកម្ពស់៩៥០ម៉ែត្រពីនីវ៉ូទឹកសមុទ្រនេះ នឹងត្រូវបើកការដ្ឋានសាងសង់នៅក្នុងខែសីហា ឆ្នាំ២០១២ខាងមុខនេះ តែទោះបីជាយ៉ាងណាប្លង់ផ្ទះវីឡាជាច្រើនរយប្លង់ត្រូវបានលក់ និងកក់ពីអតិថិជនរួចហើយ។ គេសង្កេតឃើញថា អ្នកទិញគម្រោងទាំងនោះភាគច្រើនជាអ្នកមានជីវភាពធូរធារខ្លាំង គេទិញសម្រាប់ជាការលម្ហែ និងសម្រាប់រស់នៅពេលដែលពួកគេមានវ័យច្រើន។ នេះបើតាមការបញ្ជាក់របស់ក្រុមហ៊ុន។
លោក ឧត្តម បាននិយាយថា៖«យើងនឹងបើកការដ្ឋានសាងសង់បុរីនោះ នៅក្នុងខែប្រាំបី ខែក្រោយនេះ ហើយនៅពេលនេះយើងកំពុងលក់គម្រោងប្លង់ផ្ទះនោះក្នុងតម្លៃពិសេស។ គម្រោងនេះអតិថិជនមានការចាប់អារម្មណ៍ខ្លាំង ហើយផ្ទះដែលនៅជាប់នឹងស្ទឹងគេកក់អស់ហើយ។ ពួកគេទិញសម្រាប់លម្ហែកាយនៅពេលសម្រាក ហើយមួយចំនួនទៀតទិញទុកនៅពេលពួកគេចាស់ ធុញថប់នឹងទីក្រុង»។
ទោះបីជាគម្រោងអភិវឌ្ឍន៍ត្រូវបានធ្វើឡើងក្នុងទ្រង់ទ្រាយធំក្តី តែលោក សម្បត្តិ ឧត្តម បានអះអាងថា គម្រោងនោះនឹងមិនបង្កផលប៉ះពាល់ដល់សម្បត្តិធម្មជាតិឡើយ ដោយលោកបានបញ្ជាក់ថា ក្រុមហ៊ុននឹងរក្សាធម្មជាតិទាំងនោះនៅដដែល ព្រោះវាជាអ្វីដែលអតិថិជនចង់បាន។
អតិថិជនទាំងអស់អាចនឹងទទួលបានផ្ទះវីឡាប្រណីតៗនៅកំពូលភ្នំ ចាប់ពពកបានមួយនេះ ដោយការទិញបង់ប្រាក់ផ្តាច់ និងមានបង់រំលស់រហូតដល់រយៈពេល១០ឆ្នាំ៕
