ភ្នំពេញ ប៉ុស្តិ៍
ក្រុងហុងកុងៈ ប្រទេសឥណ្ឌូនេស៊ី នឹងទទួលបានកំណើននាំចេញតិចតួច ឬមិនកើនឡើងទាល់តែសោះនៅឆ្នាំនេះ ដោយសារវិបត្តិបំណុលនៅអឺរ៉ុប ធ្វើឲ្យប៉ះពាល់ដល់ទិសដៅកំណើននាំចេញទៅបរទេស ដែលបានព្យាករនាពេលកន្លងមកថានឹងមានកំណើន ១២ភាគរយនោះ។ នេះបើតាមលោកលោក Bayu Krisnamurthi អនុរដ្ឋមន្ត្រីពាណិជ្ជកម្មរបស់ឥណ្ឌូនេស៊ី។
លោក Krisnamurthi បានឲ្យដឹងក្នុងបទសម្ភាសមួយកាលពីម្សិលមិញនៅទីក្រុងហុងកុង ថា រដ្ឋាភិបាល មិនបានរំពឹងថា បញ្ហានឹងផ្ទុះឡើងនៅប្រទេសក្រិក អេស្ប៉ាញ និងអ៊ីតាលីទេ នៅពេលខ្លួនធ្វើការព្យាករពីកំណើននាំចេញកាលពីដើមឆ្នាំនោះ។
លោកបានបន្តថា៖ «ភាពមិនប្រាកដប្រជានៅតំបន់អឺរ៉ុប នៅតែមានកម្រិតខ្ពស់។ បើយើងអាចទទួលបានកំណើននាំចេញប្រហាក់ប្រហែលនឹងកំណើនកាលពីឆ្នាំ មុននោះ យើងពេញចិត្តណាស់ទៅហើយ។ កំណើនកម្រិតទាប អាចនឹងកើតមាន»។
អ្នកបង្កើតគោលនយោបាយនៅក្នុងតំបន់ បានស្ថិតនៅក្រោមសម្ពាធកាន់តែខ្លាំង ក្នុងការការពារសេដ្ឋកិច្ចរបស់ខ្លួនពីការធ្លាក់ចុះតម្រូវការ ពិភពលោក ហើយប្រទេសឥណ្ឌូនេស៊ី បានឲ្យដឹងកាលពីខែមិថុនាកន្លងទៅនេះថា ខ្លួននឹងអនុវត្តវិធានការជំរុញ ដើម្បីបង្កើនតម្រូវការប្រើប្រាស់ និងចំណាយផ្នែកហេដ្ឋារចនាសម្ព័ន្ធ។ ការនាំចេញរបស់ឥណ្ឌូនេស៊ី បានធ្លាក់ចុះកាលពីខែឧសភា និងមេសា ធៀបនឹងរយៈពេលដូចគ្នាកាលពីឆ្នាំមុន។
លោក Krisnamurthi បានថ្លែងនៅដើមសប្តាហ៍នេះថា កំណើននាំចេញ អាចកើនឡើង ៥ភាគរយនៅឆ្នាំនេះ។ កាលពីខែមករាលោកថ្លែងថា រដ្ឋាភិបាលរំពឹងថាការនាំចេញនេះ នឹងកើនឡើងរហូតដល់ ២៣០ពាន់លានដុល្លារនៅឆ្នាំនេះ៕ BP
