ភ្នំពេញ ប៉ុស្តិ៍
ក្រុងរ៉ូមៈ តម្លៃស្បៀងអាហារ ត្រូវបានរំពឹងថានឹងកើនឡើងនៅទសវត្សរ៍ក្រោយនេះ ដោយសារតម្លៃប្រេងខ្ពស់ នឹងបង្កើនថ្លៃដើមផលិតកម្ម ក៏ដូចជាតម្រូវការជីវៈឥន្ធនៈ។ នេះបើយោងតាមការឲ្យដឹងពីអង្គការដើម្បីកិច្ចសហប្រតិបត្តិការ និងអភិវឌ្ឍន៍សេដ្ឋកិច្ច(OECD) និងអង្គការស្បៀង និងកសិកម្មនៃសហប្រជាជាតិ (FAO)។
ទន្ទឹមនឹងនោះដែរ អង្គការ OECD និងអង្គការ FAO បានសរសេរក្នុងរបាយការណ៍រួមគ្នាមួយ និងបានចេញផ្សាយកាលពីម្សិលមិញថា កំណើនទិន្នផលកសិកម្ម នឹងធ្លាក់ចុះនៅអំឡុងឆ្នាំ ២០១២ ដល់ ឆ្នាំ២០២១ ខណៈតម្លៃស្បៀងកើនឡើង ដោយសារផ្ទៃដី និងទឹកសម្រាប់ធ្វើកសិកម្មថយចុះ និងដោយសារថ្លៃដើមកើនខ្ពស់ជាងនេះ។
អង្គការ FAO បានបន្តឲ្យដឹងថា ទិន្នផលកសិកម្ម ចាំបាច់ត្រូវកើនឡើង ៦០ភាគរយក្នុងរយៈពេល ៤០ឆ្នាំខាងមុខ ដើម្បីឆ្លើយតបនឹងតម្រូវការស្បៀង ដែលកំពុងកើនឡើងឥតឈប់ឈរ ដោយសារកំណើនប្រជាជន និងការផ្លាស់ប្តូរចំណីអាហារ។
អង្គការ OECD និងអង្គការ FAO បានបន្តឲ្យដឹងទៀតថា វិសាលភាពក្នុងការបង្កើនដីកសិកម្មនៅមានកម្រិត ហើយដីកសិកម្មប្រមាណ ២៥ភាគរយ ខូចគុណភាពខ្លាំង។
អង្គការទាំងពីរ បានបន្តឲ្យដឹងនៅក្នុងរបាយការណ៍ដដែលថា៖ «ភាពរាំងស្ទះនៃកំណើនធនធាន សម្ពាធបរិស្ថាន និងថ្លៃដើមវត្ថុធាតុដើមខ្ពស់ នឹងកាត់បន្ថយការផ្គត់ផ្គង់ ដើម្បីឆ្លើយតបនឹងតម្រូវការស្បៀងស្ទើរគ្រប់តំបន់។ ការប្រមើលមើលនេះ បង្ហាញថា យើងគួរតែចាប់អារម្មណ៍បង្កើនកំណើនផលិតភាពកសិកម្មប្រកបដោយនិរន្តរភាព»។
របាយការណ៍ដដែលនេះ បានបន្តឲ្យដឹងថា តម្លៃស្បៀងដែលមិនរួមបញ្ចូលអត្រាអតិផរណាដែរ នោះ នឹងមានស្ថិរភាព ឬក៏ ធ្លាក់ចុះ ធៀបនឹងតម្លៃនាពេលបច្ចុប្បន្ន ខណៈតម្លៃស្បៀងនេះ នៅតែមានតម្លៃជាមធ្យមខ្ពស់ជាង១០ ទៅ ៣០ភាគរយ ធៀបនឹងតម្លៃស្បៀងកាលពីអំឡុងពេល១០ឆ្នាំមុន៕ BP
