ភ្នំពេញ ប៉ុស្តិ៍
ក្រុងឡាសវេហ្គាសៈ កីឡាករប្រដាល់សញ្ជាតិអាមេរិក Danny Garcia បានផ្តួលឲ្យកីឡាករ Amir Khan របស់ចក្រភពអង់គ្លេសសន្លប់នៅក្នុងទឹកទី៤ដើម្បីបន្ថែមការឈ្នះ ខ្សែក្រវាត់របស់ស្ថាប័ន WBA នៅក្នុងប្រភេទទម្ងន់៦៣,៥គីឡូក្រាមទៅលើខ្សែក្រវាត់ពីស្ថាប័ន WBC របស់គេលើសង្វៀនក្នុងទីក្រុង Las Vegas កាលពីថ្ងៃសៅរ៍។
Khan ដែលបានទទួលជ័យជម្នះ២៦លើក ចាញ់៣លើក និងផ្តួលដៃគូឲ្យសន្លប់១៨លើក និងហាក់មានប្រៀបនៅដើមទឹកនោះ បានប្រើកណ្តាប់ដៃវាយទៅលើគូប្រកួតយ៉ាងលឿន ប៉ុន្តែវិធីសាស្ត្រនៃការការពាររបស់ Garcia នៅតែរឹងមាំ និងមានប្រសិទ្ធភាព ហើយបន្ទាប់មកក្នុងទឹកទី៣ គេបានប្រើកណ្តាប់ដៃឆ្វេងចំពេញទំហឹងដែលធ្វើឲ្យ Khan ដួលលើសង្វៀន។
កីឡាកររបស់អង់គ្លេសរូបនេះ បានព្យាយាមងើបឡើងវិញដើម្បីបន្តការប្រកួត ប៉ុន្តែជើងទាំងពីររបស់គេនៅតែស្ថិតក្នុងសភាពញ័រ ស្របពេលដែលកណ្ដឹងបានបន្លឺសំឡេងបញ្ចប់ទឹក។
ការប្រើកណ្តាប់ដៃឆ្វេងបានធ្វើឲ្យ Khan ដួលម្តងទៀតនៅក្នុងទឹកទី៤ ហើយបើទោះបីរូបគេអាចទប់លំនឹងរបស់ខ្លួនមុនការរាប់ដល់១០ក៏ ដោយ ប៉ុន្តែលោកអាជ្ញាកណ្តាល Kenny Bayless បានបញ្ចប់ការប្រដាល់នេះ បើទោះបី Khan បានគិតថា ការបញ្ឈប់នេះ អាចនឹងឆាប់ពេកក៏ដោយ។
Garcia បាននិយាយថា គេមានអារម្មណ៍ថា កីឡាកររបស់អង់គ្លេស បានមើលស្រាលទៅលើរូបគេ។
Garcia ដែលបានបង្កើនជ័យជម្នះរហូតដល់ទៅ២៤លើក មិនធ្លាប់ចាញ់ និងផ្តួលដៃគូឲ្យសន្លប់១៥លើកនោះ បានឲ្យដឹងថា៖ «យើងបានដឹងថា Khan នឹងវាយយ៉ាងរហ័ស ពីព្រោះគេបានគិតថា ខ្ញុំមិនមានថាមពល។ ប៉ុន្តែខ្ញុំបានរង់ចាំ និងបានបង្កើនការវាយ ហើយបានប្រើល្បឿន និងថាមពលដែលខ្ញុំមាន»។
នៅក្នុងការប្រកួតមួយគូទៀត អតីតម្ចាស់ខ្សែក្រវាត់ទម្ងន់ធ្ងន់ពិភពលោក David Haye បានផ្តួលមិត្តរួមសញ្ជាតិអង់គ្លេសរបស់គេ Dereck Chisora ឲ្យសន្លប់នៅក្នុងទឹកទី៥ដើម្បីទទួលជម្នះលើការប្រកួតប្រកបដោយ គំនុំរបស់ពួកគេនៅលើសង្វៀន Upton Park ភាគខាងកើតទីក្រុងឡុងដ៍។
ការប្រដាល់នៅលើទីលាននៃក្លិបកីឡាបាល់ទាត់ West Ham United របស់ក្របខ័ណ្ឌ English Premier League សម្រាប់ខ្សែក្រវាត់ទម្ងន់ធ្ងន់អន្តរជាតិ WBO និង WBA មួយនេះ ត្រូវបានទទួលការអនុញ្ញាតដោយសហព័ន្ធកីឡាប្រដាល់លុចសំបួ។
ក្រុមប្រឹក្សាកីឡាប្រដាល់ចក្រភពអង់គ្លេស មិនបានអនុញ្ញាតឲ្យរៀបចំការប្រកួតនេះ ឬក៏ផ្តល់អាជ្ញាប័ណ្ណដល់កីឡាករឡើយ៕ IS
