ភ្នំពេញ ប៉ុស្តិ៍
ក្រុងបៃរូតៈ អ.ស.ប. បានប្រទះឃើញឈាម ផ្ទះឆេះជាច្រើនខ្នង និងស្លាកស្នាមនៃការបាញ់កាំភ្លើងធំនៅភូមិស៊ីរីឈ្មោះ ត្រេមសេះ កាលពីថ្ងៃសៅរ៍ ប៉ុន្តែគេមិនអាចបញ្ជាក់ពីរបាយការណ៍របស់ក្រុមសកម្មជនដែលថា មនុស្សប្រមាណ២២០នាក់ ត្រូវគេសម្លាប់រង្គាលនៅក្នុងការវាយប្រហារមួយដែលបង្កជាកំហឹង អន្តរជាតិទេ។
អាមេរិក បានចាត់ទុកក្រុមមេដឹកនាំស៊ីរីថា ជាឃាតក បន្ទាប់ពីការវាយប្រហារពីទាហានរបស់ប្រធានាធិបតីស៊ីរី លោក បាសារ អាល់-អាសាដ ប៉ុន្តែពុំមានការបំបែកភាពទាល់ច្រក ក្នុងចំណោមមហាអំណាចពិភពលោក ជុំវិញរបៀបបញ្ចប់ការបង្ហូរឈាមទេ។
មុននេះស៊ីរី បានបដិសេធការចោទប្រកាន់អំពីការសម្លាប់រង្គាល និងបាននិយាយថា ការវាយប្រហារពីថ្ងៃព្រហស្បតិ៍ ជាប្រតិបត្តិការ យោធាជោគជ័យមួយ ដែលបានសម្លាប់«ភេរវករ»មួយចំនួនធំ និងមិនមែនជនស៊ីវិល។
សេចក្តីថ្លែងការណ៍មួយរបស់បេសកកម្មអ.ស.ប. នៅក្រុងដាម៉ាស់បាននិយាយថា ក្រុមសង្កេតការណ៍មិនអាចបញ្ជាក់ពីចំនួនស្លាប់ ឬគ្រោះ ថ្នាក់បានទេ ប៉ុន្តែថាបានត្រឡប់ទៅវិញនៅថ្ងៃអាទិត្យ ដើម្បីស៊ើបអង្កេតបន្ត។
ក្នុងសេចក្តីថ្លែងការណ៍មួយដែល គេផ្ញើតាមសាអេឡិចត្រូនិកអ្នកនាំពាក្យបេសកកម្មអ្នកសង្កេតការណ៍ អ.ស.ប. បាននិយាយថា៖ «ការវាយប្រហារលើភូមិ ត្រេមសេះ បានបង្ហាញពីការយកក្រុម លំនៅដ្ឋាន ភាគច្រើនជាទាហានផ្តាច់ខ្លួន និងក្រុមសកម្មជនជាគោលដៅ។ អាវុធច្រើនប្រភេទ ត្រូវបានគេប្រើប្រាស់ ដែលរួមមានកាំភ្លើងធំ កាំភ្លើងត្បាល់ និងកាំភ្លើងដៃផងដែរ»។
ក្រុមសកម្មជនប្រឆាំង និយាយថា ទាហានរដ្ឋាភិបាលបានសម្លាប់ មនុស្សប្រមាណ២២០នាក់នៅក្នុងភូមិនេះ។ ក្រុមអ្នកសង្កេតការណ៍អ.ស.ប. បាននិយាយថា ពួកគេ បានរកឃើញសាលារៀនឆេះមួយខ្នង និងផ្ទះខូចខាតដោយអគ្គិភ័យជាច្រើន»។
អគ្គលេខាធិការអ.ស.ប.លោក បាន គីមូន ក៏បានថ្កោលទោសរួចជាស្រេចនូវអ្វីដែលជាបេសកកម្មសង្កេតការណ៍ អ.ស.ប. មួយកាលពីថ្ងៃសុក្រ ។ លោកថ្លែងថា វាគឺជាការទម្លាក់គ្រាប់«ឥតរើសមុខ»លើភូមិមួយនៅខេត្តហាម៉ា មានទាំងបាញ់គ្រាប់រ៉ុក្កែតពីឧទ្ធម្ភាគចក្រ។ លោក បានចោទសួរពីការប្តេជ្ញារបស់លោកអាសាដ ចំពោះផែនការ សន្តិភាពដែលគាំទ្រដោយ អ.ស. ប. សម្រាប់ស៊ីរី៕ NR
