ភ្នំពេញ ប៉ុស្តិ៍
- Prev
- 1 of 2
- Next
ភ្នំពេញៈ ការប្រកួតដណ្តើមខ្សែក្រវាត់ K Cement ទម្ងន់៦៥គីឡូក្រាមកាលពីថ្ងៃម្សិលមិញនៅលើសង្វៀនទូរទស្សន៍កង យោធពលខេមរភូមិន្ទប៉ុស្តិ៍លេខ៥ បានបង្ហាញឲ្យឃើញថា កីឡាករ ផល សុផាត មកពីក្លិបកងរាជអាវុធហត្ថរាជធានីភ្នំពេញ ទទួលបាន៣ពិន្ទុបន្ថែមទៀត បន្ទាប់ពីគេបានប្រកួតឈ្នះ កីឡាករ យឹម ឌៀប មកពីសមាគមក្រសួងការពារជាតិ។
សរុបជារួម ផល សុផលា កំពុងមាន៦ពិន្ទុក្នុងដៃដោយស្ថិតនៅកំពូលនៃតារាងពូល B។ ចំណែកឯ កីឡាករ យឹម ឌៀប ដែលបានប្រកួតចាញ់ ផល សុផាត មានពិន្ទុតែ៤ប៉ុណ្ណោះដែលស្មើជាមួយកីឡាករជាម អាដាំ មកពីក្លិបឃ្លាំងមឿង ខណៈកីឡាកររូបនេះបានប្រកួតឈ្នះកីឡាករពុទ្ធ ហ៊ុច មកពីក្លិបពុទ្ធសេរីវង្ស។
នៅក្នុងចំណោមកីឡាករ៤រូបនៅក្នុងពូល B ដែលឆ្លងកាត់ពីរប្រកួតដូចកីឡាករ ផល សុផាត មាន៦ពិន្ទុ កីឡាករ ជាម អាដាំ និងកីឡាករ យឹម ឌៀបមាន៤ពិន្ទុ កំពុងតែប្រទាញប្រទង់គ្នាដណ្តើមយកច្រកចេញដោយរង់ចាំមួយប្រកួត ទៀតសម្រាប់កាត់ក្តី ប៉ុន្តែកីឡាករ ពុទ្ធ ហ៊ុច ដែលចាញ់ពីរប្រកួតហើយនោះគ្មានសំណាងនឹងបានឆ្លងផុតពីពូល B នេះឡើយ។
ស្ថានភាពប្រកួតជាក់ស្តែងលើសង្វៀន
ការទទួលបានជ័យជម្នះរបស់កីឡាករ ផល សុផាត មិនមែនកើតឡើងដោយងាយស្រួលនោះឡើយ ពីព្រោះស្នៀតជើងទាត់របស់ យឹម ឌៀប ធ្ងន់ ប៉ុន្តែកណ្តាប់ដៃរបស់គេហាក់ដូចជាវាយមិនចំគោលដៅបានល្អ។
ទោះបីយ៉ាងណា យឹម ឌៀប មានពិន្ទុនាំមុខនៅក្នុងទឹកទី១ និងទី៣។ ផល សុផាត មានស្នៀតកណ្តាប់ដៃលឿនរហ័សវាយចំគោលដៅ និងមានស្នៀតដកថយ គេចរហ័ស មិនឲ្យដៃគូវាយត្រូវទាន់នោះឡើយ។
សុផាតមានប្រៀប៣ទឹក គឺទឹកទី២ទី៤និងទី៥ ដែលបានធ្វើឲ្យចៅក្រមកាត់សេចក្តីឲ្យឈ្នះទាំងប្រផិតប្រផើយ ក្រោយការប្រកួតបាន៥ទឹកពេញ។
ចំណែកឯកីឡាករ ជាម អាដាំ ដែលមានជំនាញប្រើកណ្តាប់ដៃក៏មានភាពរហ័សរហួនគេចផុតពីទម្ងន់ ជើងរបស់កីឡាករ ពុទ្ធ ហ៊ុច ផងដែរ។
មិនតែប៉ុណ្ណោះស្នៀតកណ្តាប់ដៃរបស់ អាដាំ បានវាយកាន់តែល្អនៅពេលការប្រកួតឈានចូលដល់ទឹកទី៤និងទី៥។ ចំណែកឯ ពុទ្ធ ហ៊ុច ដែលមានជំនាញទាត់ផងនោះ មានការលំបាកប្រើស្នៀតជើង ពីព្រោះគេទាត់មិនត្រូវដៃគូ ដោយសារ ជាម អាដាំ គេចបានរហ័ស ហើយជាញឹកញាប់ ពុទ្ធ ហ៊ុច ច្រើនដួលដោយខ្លួនឯង ខណៈដែលគេវាយមិនចំគោលដៅ៕
