ភ្នំពេញ ប៉ុស្តិ៍
ភ្នំពេញៈ ក្រសួងអប់រំយុវជននិងកីឡា កាលពីម្សិលមិញ បានប្រកាសបិទ គ្រឹះស្ថានបឋមសិក្សា មត្តេយ្យសិក្សារដ្ឋនិងឯកជនទូទាំងប្រទេសមុនកាលកំណត់ឈប់ វិស្សមកាល គឺចាប់ពីថ្ងៃទី១៨ ខែកក្កដា ដើម្បីទប់ស្កាត់ជំងឺមរណៈកុមារដែលបង្កឲ្យមានពងបែកនៅដៃ ជើង និងក្នុងមាត់ដែលគេហៅថា(EV-71) បន្ទាប់ពីមានរបាយការណ៍មកពីខេត្តមួយចំនួនមានភាពមិនប្រក្រតីចំពោះសុខភាពកុមារ។
យោងទៅតាមលិខិតដែលបានចុះហត្ថលេខាដោយលោកអ៊ឹម សិទ្ធី រដ្ឋមន្ត្រីក្រសួងអប់រំ យុទ្ធជន និងកីឡា បានឲ្យដឹងថា នៅក្នុងឆ្នាំសិក្សា ២០១១-២០១២នេះ សាលាបឋមសិក្សា និងមត្តេយ្យសិក្សារាជធានីខេត្ត ត្រូវបានអនុញ្ញាតឲ្យឈប់សម្រាកមហាវិស្សមកាលចាប់ពីថ្ងៃទី១៨ ខែកក្កដានេះតទៅ ដោយអនុលោមទៅតាមចំណាររបស់លោកនាយករដ្ឋមន្ត្រីហ៊ុន សែនចុះពីថ្ងៃទី១៧ ខែកក្កដា ឆ្នាំ ២០១២ ស្តីអំពីការបញ្ឈប់ដំណើរការសិក្សាដំណាច់ឆ្នាំ២០១១-២០១២។
លោកម៉ក់ វ៉ាន់ រដ្ឋលេខាធិការក្រសួងអប់រំយុវជន និងកីឡា បានឲ្យដឹងថា ជាធម្មតា តាមកាលកំណត់គ្រឹះស្ថានបឋមសិក្សា និងមត្តេយ្យសិក្សា ត្រូវបានកំណត់ឲ្យឈប់នៅក្នុងថ្ងៃទី៣១ ខែកក្កដា តែឆ្នាំនេះដោយសារតែមានជំងឺមរណៈកុមារ(EV-71) ក្រសួងបានស្នើសុំគោលការណ៍ទៅលោកនាយករដ្ឋមន្ត្រីហ៊ុន សែន អនុញ្ញាតឲ្យសិស្សឈប់មុនកំណត់ដើម្បីបង្ការជំងឺឆ្លងថ្មីលើកុមារ។ លោក បានឲ្យដឹងថា ៖ «ជំងឺនោះ បង្កគ្រោះថ្នាក់ដល់កុមារខ្លាំងណាស់ ហើយវាធ្វើឲ្យកុមារស្លាប់រហ័សជាទីបំផុត ដូច្នេះហើយបានជាយើងស្នើសុំទៅសម្តេចនាយកឲ្យកុមារឈប់មុនកាល កំណត់»។
លោក បានឲ្យដឹងទៀតថា មូលហេតុដែលបណ្តាលឲ្យក្រសួងធ្វើការបញ្ឈប់បន្ទាន់នោះដោយសារតែ របាយការណ៍មកពីតាមបណ្តាខេត្តមួយចំនួនដូចជាព្រះវិហារ រតនគិរី មណ្ឌលគិរី ប៉ៃលិន កំពង់ចាម កំពត សៀមរាប បន្ទាយមានជ័យ ស្វាយរៀង ព្រៃវែង កំពង់ស្ពឺ បាត់ដំបង កំពង់ឆ្នាំង និងក្រចេះ មានកុមារឈឺច្រើនដូចជាក្តៅខ្លួននិងផ្តាសាយ ហើយដើម្បីការពារជំងឺឆ្លងថ្មីក្រសួងក៏អនុញ្ញាតឲ្យសាលាមត្តេយ្យ និងបឋមសិក្សាទាំងឯកជន និងរដ្ឋឈប់មុនកាលកំណត់ដើម្បីទប់ស្កាត់ឲ្យទាន់ពេល។ លោកបានឲ្យដឹងទៀតថា៖ «យើងពុំមែនបំភ័យនោះទេ គឺយើងគ្រាន់តែជួយសម្រួលការព្រួយបារម្ភរបស់អាណាព្យាបាលសិស្សតែ ប៉ុណ្ណោះ»។
សាលាមត្តេយ្យសិក្សានៅទូទាំងប្រទេសមានចំនួន២៥៧៥ ហើយសាលាឯកជនមានចំនួន១៧៤ រីឯ សាលាបឋមសិក្សាមានចំនួន៦៨៤៩ សាលាឯកជនមានចំនួន២២២។ ចំនួនសិស្សមត្តេយ្យសិក្សាមានចំនួន១២១៣០៦នាក់ ឯកជនមានចំនួន២០២៤៣។ សិស្សបឋមសិក្សាមានចំនួន២១៤២៤៦៤នាក់ សិស្សឯកជនចំនួន៥២២៥២នាក់។ លោក បន្តថា ៖ «ចំពោះការឈប់នោះសាលារដ្ឋនឹងចូលវិស្សមកាលវិញនៅក្នុងខែតុលា រីឯសាលាឯកជនវិញយើងមិនបានកំណត់ឲ្យចូលនៅពេលណានោះទេ គឺយើងគ្រាន់តែសុំឲ្យគេផ្អាក់មួយរយៈសិនតែប៉ុណ្ណោះ»។
កុមារាជីវ សុខហួរ អាយុ ១១ឆ្នាំ ជាសិស្សថ្នាក់ទី៦ នៃសាលាបឋមសិក្សាអង្គតាសោម ខេត្តតាកែវ បានឲ្យដឹងថា សាលារបស់គាត់ត្រូវបានអនុញ្ញាតឲ្យឈប់នៅព្រឹកថ្ងៃទី១៨ ខែកក្កដា។ កុមារារូបនេះ បានឲ្យដឹងទៀតថា៖«គ្រូរបស់ខ្ញុំមិនបានប្រាប់អំពីមូលហេតុដែលឲ្យ ឈប់មុនទាក់ទងនឹងជំងឺនោះទេ គឺគ្រាន់តែប្រាប់ថាគាត់ខ្ជិលបង្រៀនណាស់ទើបឲ្យឈប់ ហើយរៀនគួរក៍មិនឲ្យមករៀនដែរ»។
អ្នកនាងប៉ោ សុភា ប្រធានផ្នែករដ្ឋបាលសាលា Home of English បានឲ្យដឹងថា សាលារបស់អ្នកនាង បានអនុវត្តតាមការណែនាំរបស់ក្រសួងរួចហើយ គឺបានអនុញ្ញាតឲ្យសិស្សឈប់ចាប់ពីថ្ងៃទី១៩ កក្កដា ហើយចូលសិក្សាវិញនៅថ្ងៃទី៣០ កក្កដា។
លោក វេជ្ជបណ្ឌិត សុខ ទូច ប្រធាននាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល បានថ្លែងថា រហូតមកដល់ពេលនេះជំងឺដៃ ជើង និងមាត់ដែលជាជំងឺកើតឡើងជាញឹកញាប់ទៅលើកុមារ និងទារកនោះទូរលេខគឺនៅដដែល។
សេចក្តីប្រកាសព័ត៌មានរួមមួយដែលធ្វើឡើងដោយក្រសួងសុខាភិបាល និង WHO កាលពីសប្តាហ៍មុនបានឲ្យដឹងថា ជំងឺនេះបានឆ្លងដល់កុមារ ៥៩ នាក់ ហើយបានផ្តាច់ជីវិតពួកគេ ៥២ នាក់ ខណៈមន្ទីរពេទ្យគន្ធបុប្ផាបានរាយការណ៍ថាមាន ៦៦ ករណីឈឺគិតតែនៅក្នុងមន្ទីរពេទ្យមួយនេះប៉ុណ្ណោះ ដែលក្នុងនោះ ៦៤ នាក់បានបាត់បង់ជីវិត៕
